Jan₂ dsa₂ mɨ́₂ quianꞌ₅₄ cua₁ dragón
12
Jaun₂ ca₂jnia₃ gueiꞌ₅₄ i₂juɨ́g₃ caun₂ léi₄ juëꞌ₂ a₂dsɨ₃góꞌ₃ dsɨ₅: jan₂ ꞌio₅₄ i₂rë₂lión₃ co₂tág₅ liaꞌ₂ jniá₂ ꞌiog₂. Le₃néꞌ₃ ja₁chéinꞌ₄ ton₅ tsɨꞌ₂. Caun₂ guëꞌ₂ corona ꞌi₄ dsi₅₄, le₁ton₅ guia₃-tɨ́n₂ nei₅.
2 ꞌIo₅₄ ꞌéi₂ quiain₂₃ guein₂, a₂guióꞌ₅ co₂mɨꞌ₅₄ a₂chain₂ uɨg₅ a₂le₃chan₂ guein₂.
3 Jaun₂ guë́₄ ca₂jnia₃ léi₄ siáꞌ₂ táng₃ gueiꞌ₅₄ i₂juɨ́g₃: jan₂ cua₁ dragóna guén₂ i₂pan₅₄ lɨn₃ i₂quian₅ guio₃ mɨ₂dsi₄ quianꞌ₅₄ guia₃ mɨ₂juɨ́₁. Jma₃cáun₃ corona tioꞌ₅₄ liaꞌ₂ ca₂mɨ́g₂ mɨ₂dsi₅₄.
4 Quianꞌ₅₄ ne₁con₅ jáꞌ₂ ꞌéi₂ qui₂ca₂tsë́ꞌ₃ ca₂quiꞌ₅₄ quióꞌ₅ ꞌnɨ₅ juɨ₁liaꞌ₂ nei₅ i₂jme₁le₁ꞌɨ́n₄ gueiꞌ₅₄, jaun₂ qui₂ca₂guiainꞌ₃ ne₄ guaꞌ₅₄ ꞌuë₃. Jaun₂ ca₂nau₂ cua₁ dragón ne₄ ꞌio₅₄ i₂jë₁ca₂rë₃chán₃ guein₂, ia₁jaun₂ quɨinꞌ₂ guein₂ dsɨ₂juɨ₅ jë₁ma₂ca₂rë₃cháin₃.
5 Ca₂rë₃chán₃ rëꞌ₂ guein₂ quiáin₅, jan₂ guein₂ dsa₂ ŋeꞌ₂ i₂ꞌi₄ ꞌéiꞌ₃ gon₃ ne₄ ca₂le₃jë́₃ juɨg₂ quianꞌ₅₄ ꞌma₂ꞌɨꞌ₅₄ a₂lë́₅ nɨ₁ŋí₁ ꞌuaꞌ₂.b Jaun₂ ca₂jŋiaꞌ₃ bá₄ guein₂ ꞌéi₂ ca₂tág₃ Diú₄ i₃guá₃ ne₄ta₁ quióꞌ₅.
6 Jaun₂ ca₂cuɨng₃ ꞌio₅₄ juɨ₅ ꞌuë₃ quein₂ co₂ꞌŋiog₅ ja₁ma₂lë́₅ co₂jŋia₅₄ quióꞌ₅ Diú₄, ia₁jaun₂ le₃tain₅₄ ca₂liaꞌ₂ ca₂dsɨn₃ caun₂ mei₅ rë₂tón₂ tɨn₃ ꞌŋiá₂-láu₂ rë₂dsɨ́₂ ꞌnagꞌ₂ ne₂guióg₂ (1260) jmɨg₄.
7 Jaun₂ ca₂lë₃ ꞌnei₂ gueiꞌ₅₄ i₂juɨ́g₃: ca₂jmo₃ ꞌnei₂ Mi₂gue₅₄ quiainꞌ₅₄ ángeles quiáin₅, ca₂quɨ́inꞌ₂ ca₂cuë́ꞌ₃ cua₁ dragón. Ján₃ guëꞌ₂ le₂jaun₂ ca₂jéinꞌ₃ dragón quiainꞌ₅₄ ángeles quiáin₅.
8 La₁ tsá₃ ca₂tióꞌ₃, jaun₂ tsá₃ ma₃ja₁ca₂rë₃chá₃ guë́₄ ja₁cuɨn₅ jmɨg₄ tóinꞌ₃ gueiꞌ₅₄ i₂juɨ́g₃.
9 Jaun₂ ja₁jaun₂ ca₂jŋiaꞌ₃ cau₅ dragón juɨnꞌ₂ ꞌéi₂, dsɨ₂mɨꞌ₂ guiꞌ₅₄ i₂jme₁chan₂ ma₂lɨ́gꞌ₂, i₂të́ꞌ₂ i₂së₃dsen₃, i₂chen₂ Satanás në́₃, i₂jme₂gan₅ dsa₂ ta₁caun₂ mɨ₂güɨ́g₃. Ca₂i₃gainꞌ₅₄ ca₂të₂ guaꞌ₅₄ ꞌuë₃, liaꞌ₂ jma₃quiainꞌ₅₄ ángeles quiáin₅.c
10 Jaun₂ ca₂néꞌ₂ jág₁ tiá₂ gueiꞌ₅₄ i₂juɨ́g₃, i₁juáꞌ₄:
Në₃ guë́₄ ca₂të́₂ jmɨg₄ quióꞌ₅ Diú₄ a₂lión₂ dsa₂,
ca₂dsióg₃ jmɨg₄ ja₁lé₂ juɨ₅bí₂ ꞌéiꞌ₃ quióꞌ₅ Diú₄ quián₂
a₂gon₂ ꞌéi₂ quiainꞌ₅₄ I₂rë₂ꞌɨ́n₁ quiáin₅.
Ia₁ ca₂guiainꞌ₃ ꞌuë₃ i₂jme₁bógꞌ₂ dso₄ quióꞌ₅ rɨnꞌ₅₄ jniog₄
le₃ne₄ Diú₄ liaꞌ₂ ꞌuë₂-jmɨ₂.
11 Ca₂tióꞌ₃ bá₄ ꞌéi₂
të₂le₃ quianꞌ₅₄ jmɨ₂ ꞌan₅₄ Guein₂ Jáꞌ₂ Chaꞌ₂,
të₂le₃ quianꞌ₅₄ jág₁ dsau₅ në́₃
a₂ma₂qui₂ma₂jángꞌ₃ ꞌéi₂;
ia₁ tsá₃ ca₂dsán₃ dsɨ́₅ jme₂dsí₂ quióꞌ₅
o₁jŋiaꞌ₅₄ ca₂dsain₃.
12 Jaun₂ lë₃, ꞌioꞌ₂ jmo₄ ꞌniaꞌ₂ i₂juɨ́g₃,
quianꞌ₅₄ guëꞌ₂ ꞌniaꞌ₂ i₂tiánꞌ₅ ja₁jaun₂.
¡La₁ ꞌe₂ guë́₄ juɨ́g₂ juɨ₁liaꞌ₂ i₂chan₂ guaꞌ₅₄ ꞌuë₃,
quianꞌ₅₄ guëꞌ₂ i₂chan₂ néꞌ₃ jmɨ₁ŋíꞌ₄!
Ia₁ ma₂sión₃ i₂së₃dsen₃ ja₁conꞌ₂ ꞌniaꞌ₂;
ma₂ꞌi₄ ꞌnei₂ dsɨ́₅, ia₁ ma₂ŋi₅ rë₂ bá₄,
ca₂juɨg₄ jmáꞌ₅ jmɨg₄ cha₂ guë́₄ quióꞌ₅.
13 Jme₁ca₂rë₃líꞌ₄ dragón a₂ma₂ŋó₅ juɨ₅ guaꞌ₅₄ ꞌuë₃, jaun₂ ꞌéi₂ në́₃ ca₂ꞌein₃ ꞌio₅₄ i₂ca₂rë₃chán₃ guein₂ dsa₂ ŋeꞌ₂ quián₅.
14 La₁ ꞌio₅₄ ꞌéi₂ në́₃, ca₂ŋɨi₂ tsɨ₁rë₂cu₅ ca₁caꞌ₅₄ a₂lë́₅ liaꞌ₂ lë́₅ tsɨ₁rë₂cu₅ i₁mɨg₂, ia₁jaun₂ ꞌɨin₃ juɨ₅ ja₁quióꞌ₄, ja₁lë́₄ ꞌuë₃ quein₂ co₂ꞌŋiog₅, ja₁lë́₄ ꞌí₁ ꞌnɨ₅ ŋi₂ të₂ ca₂jau₅₄ le₃ne₄ dsɨ₂mɨꞌ₂.
15 Jaun₂ ca₂ꞌuë́ꞌ₃ dsɨ₂mɨꞌ₂ jmɨg₂ juɨ₅ mɨ₂ꞌo₅₄, në₂jag₄ bá₄ caun₂ cuá₃ juëꞌ₂, ia₁jaun₂ dsɨ₃ŋɨ₃ ꞌio₅₄ ꞌéi₂ quianꞌ₅₄ jmɨg₂.
16 La₁ ca₂jme₃ꞌo₅₄ guaꞌ₅₄ ꞌuë₃, ca₂jme₃ꞌoin₅₄ ꞌio₅₄, ca₂niá₃ ꞌuë₃ ca₂nágꞌ₃ jmɨg₂ cuá₃ jaun₂ a₂ca₂ꞌuë́ꞌ₃ dragón juɨ₅ mɨ₂ꞌo₅₄.
17 Jaun₂ ca₂rë₃ꞌné₃ dragón le₃ja₁con₂ ꞌio₅₄, jaun₂ ŋei₅₄ i₁quɨinꞌ₅₄ quiainꞌ₅₄ tsɨ₁jon₂ i₂ca₂chón₃ quián₅ ꞌio₅₄, co₂ꞌnióꞌ₄ i₂jme₂ti₃ ꞌéiꞌ₃ quióꞌ₅ Diú₄ i₂le₁quian₅ jág₁ dsau₅ quióꞌ₅ Jesús në́₃.
18 Jaun₂ ca₂nau₂ ꞌéi₂ cheiꞌ₅₄ jmɨ₁ŋíꞌ₄.d