Le₃on₃ dsa₂ i₂jángꞌ₅ jág₁ dsau₅
11
Jaun₂ ca₂ŋɨg₂ ca₂ꞌnau₅₄ ꞌma₂ta₅ a₂lë́₅ liaꞌ₂ lë́₅ nɨ₁ꞌma₂ a₂quiog₂ dsa₂ ꞌéiꞌ₃. Jaun₂ ca₂nag₃ ca₂juáꞌ₂:
―Nau₂, o₂quiog₂ ꞌéiꞌ₃ quióꞌ₅ guáꞌ₅ quióꞌ₅ Diú₄, o₂quiog₂ ꞌéiꞌ₃ ne₄chei₂ në́₃. O₁ꞌén₁ dsa₂ i₂tónꞌ₅ jme₂juɨnꞌ₂ Diú₄ ja₁jaun₂.
2 Tsá₃ cánꞌ₁ ꞌéiꞌ₃ i₁dsi₅ guáꞌ₅ a₂lë́₅ le₃ca₁ꞌné₄, ia₁ a₂ma₂lë́₅ quióꞌ₅ dsɨ₂nau₂ bá₄ ja₁jaun₂; jaun₂ ꞌéi₂ bá₄ dsa₂ i₂qui₃tsóꞌ₃ ta₁caun₂ juɨg₂ jŋió₅ jaun₂ conꞌ₂ ca₂dsɨn₃ të₂láu₃-tɨn₃ tsɨꞌ₂.
3 Tsɨn₅₄ bá₄ jniá₂ on₃ dsa₂ i₂jángꞌ₅ jág₁ dsau₅ o₄quió₃, a₂qui₃ꞌë́₂ jág₁ caun₂ mei₅ rë₂dsɨ́₂ tɨn₃ ꞌŋiá₂-láu₂ rë₂dsɨ́₂ ꞌnagꞌ₂ ne₂guióg₂ (1260) jmɨg₄, le₁quiꞌ₂ ꞌmɨꞌ₂ liaꞌ₂ juɨ₁liaꞌ₂ a₂quɨ́ꞌ₅ dsa₂ ja₁ron₅ ꞌlag₄.
4 Co₂ꞌnióꞌ₄ dsa₂ on₃ i₂jángꞌ₅ jág₁ dsau₅, lë́₅ co₂ꞌnióꞌ₄ tɨn₃ nɨ₁ꞌma₂ olivos*, quianꞌ₅₄ guëꞌ₂ tɨn₃ tag₄ ja₁le₁guíꞌ₂ si₂, a₂tióng₂ ne₄ Te₁guiꞌ₅₄ i₂lɨ́n₅ juɨg₅₄ guaꞌ₅₄ ꞌuë₃.
5 Në₁juaꞌ₂ ꞌein₂ ꞌnio₃ jmógꞌ₂ dain₅₄, la₁ quianꞌ₅₄ si₂ a₂ꞌuë́ꞌ₅ ꞌo₄ bá₄ ꞌéi₂ co₂dsia₅ dságꞌ₂ dsɨ́inꞌ₂ ca₂le₃jɨ́n₃ i₂ꞌiog₅₄. Jaun₂ le₂në₅ bá₄ ca₂tɨ́n₂ dsián₃ juɨ₁liaꞌ₂ i₂ꞌnio₃ jmáꞌ₂ dain₅₄ ꞌéi₂.
6 I₂jángꞌ₅ jág₁ dsau₅ ꞌéi₂ në́₃ ꞌio₃ bí₂ a₂lé₂ jnéi₂ gueiꞌ₅₄ mɨ₂güɨ́g₃ ia₁jaun₂ tsá₃ ma₃lé₂ téin₃ jmɨ́₅ ca₂le₃jë́₃ jmɨg₄ të₁liaꞌ₂ të₂i₃nioi₅₄ qui₃ꞌë́₂ jág₁ o₄quióꞌ₄ Diú₄. Jaun₂ ꞌio₃ bí₂ ján₃ a₂lé₂ le₃jmo₃ lé₂ jmɨ₂ juɨ₁liaꞌ₂ jmɨg₂, a₂lé₂ qui₃cuë₃ ca₂le₃jë́₃ ne₅₄ jmɨ₁uɨg₅ ne₄ guaꞌ₅₄ ꞌuë₃ i₂gúꞌ₃ ráun₂ ꞌa₂ conꞌ₂ jŋiaꞌ₅₄ ꞌnio₃.
7 La₁ jë₁ma₂dsan₃ ta₁ quióꞌ₅ ꞌéi₂ në́₃ a₂qui₃jángꞌ₃ jág₁ dsau₅, jaun₂ guë́₄ o₃ꞌɨn₅ Jáꞌ₂ ꞌLɨnꞌ₅₄a ja₁ca₂jein₃ chi₁dsio₅₄. ꞌÉi₂ guë́₄ cuë₃, jo₅₄, jme₃dsiog₂₃.
8 Jë₄ calle juɨg₂ dsen₅₄ jaun₂, le₁gainꞌ₅₄ le₁ꞌlɨin₁₂ lé₂, co₂ꞌnióꞌ₄ ja₁chei₂ quianꞌ₅₄ jág₁ jángꞌ₅ léi₄, Sodoma quianꞌ₅₄ Egipto, ján₃ bá₄ ja₁ca₂tion₃ dsa₂ cróg₄ Te₁guiꞌ₅₄ quiáin₅.b
9 Conꞌ₂ ꞌnɨ₅ jmɨg₄ rë₂tón₂ conꞌ₂ dsi₃ŋíꞌ₃, ca₂le₃jɨ́n₃ dsa₂ chan₂ le₂con₂ juɨg₂, ca₂le₃jɨ́n₃ ne₅₄ dsa₂, ca₂le₃jë́₃ ne₅₄ jag₄ dsa₂, jág₃ jɨ́in₂ ꞌlag₄ ꞌéi₂. La₁ tsá₃ ꞌein₂ ŋe₂ jmɨg₄ juaꞌ₅₄ a₂dsɨ₃ꞌó₃.
10 Ca₂le₃jɨ́n₃ dsa₂ i₂chan₂ guë́₄ guaꞌ₅₄ ꞌuë₃, ꞌŋio₅ tóinꞌ₃ jmo₃ ꞌioꞌ₂ o₄quióꞌ₄ ꞌéi₂, jmo₃ jmɨg₄ a₂cha₂ qui₂dsɨ₃can₅ cuë́ꞌ₃ rɨinꞌ₅₄. Ia₁ dsa₂ on₃ quián₅ Diú₄ i₂ca₂dsan₃ ꞌéi₂, ꞌŋio₅ lɨn₃ jme₁le₁quian₅ jmɨ₁uɨg₅ ja₁con₂ dsa₂ i₂chan₂ guaꞌ₅₄ ꞌuë₃.
11 La₁ jme₁ca₂dsɨn₃ ꞌnɨ₅ jmɨg₄ tón₂ conꞌ₂ dsi₃ŋíꞌ₃ jaun₂, Diú₄ në́₃ ca₂tóꞌ₂ táng₃ jme₂dsí₂ quióꞌ₅ dsa₂ ꞌéi₂, jaun₂ qui₂ca₂nau₂ táng₃. Jaun₂ ca₂i₃góꞌ₃ dsɨ́₅ ꞌŋio₅ lɨn₃ dsa₂ i₂ca₂jág₂.
12 Jaun₂ qui₂ca₂nág₂ jág₁ tiá₂ a₂já₅ juɨ₅ gueiꞌ₅₄ i₂juɨ́g₃ a₂ca₂juáꞌ₂:
―I₂nóꞌ₅ ꞌniaꞌ₂ gueiꞌ₅₄ la₂.
Jaun₂ ca₂i₃léin₂ juɨ₅ gueiꞌ₅₄ i₂juɨ́g₃ rë₂lióin₃ jnei₅, të₃ jág₅ jaun₂ dsa₂ i₂jme₁ꞌiog₅₄.
13 Hora jaun₂ dé₄ ca₂i₁bi₅₄ ꞌuë₃ tiá₂ lɨn₃. Jaun₂ qui₂ca₂gon₃ ca₂quiꞌ₅₄ quióꞌ₅ guia₃ juɨg₂ ciudad. Guio₃ mei₅ dsa₂ i₂ca₂dsan₃ jme₁ca₂jë́ꞌ₂ ꞌuë₃. Dsa₂ i₂ca₂chón₃ guë́₄ në́₃, qui₂ca₂can₃ juë́ꞌ₅ dsɨ́₅ ꞌŋio₅ lɨn₃. Ca₂jme₃juɨinꞌ₂ Diú₄ i₂guá₅ gueiꞌ₅₄ i₂juɨ́g₃.
14 Jaun₂ co₂në₅ ca₂lë₃ jë₁ca₂të́₂ tɨn₃ jmɨ₁uɨg₅ a₂ca₂i₃ŋɨ́₂ dsa₂ jaun₂. La₁ ŋiꞌ₅₄ ta₁ jiá₃ táng₃ jë₁ca₂të́₂ ꞌnɨ₅.
Jë₁ca₂të́₂ guio₃ trompeta
15 Jaun₂ ca₂jéi₂ táng₃ jë₁ca₂të́₂ guion₃ ángel ŋí₁ quióꞌ₅, jaun₂ qui₂ca₂néꞌ₂ jág₁ gueiꞌ₅₄ i₂juɨ́g₃ qui₂i₁juáꞌ₄ tiá₂ lɨn₃:
Ja₁gon₂ dsa₂ mɨ₂güɨ́g₃ ne₄ guaꞌ₅₄ ꞌuë₃,
ma₂ca₂lë₃ ja₁gon₂ Te₁guiꞌ₅₄ quián₂ jniog₄,
ja₂gon₂ dsa₂ I₂rë₂ꞌɨ́n₁* quiáin₅ në́₃.
Jaun₂ ꞌéi₂ bá₄ i₂gon₃ ca₂liaꞌ₂ co₂tan₅₄.
16 Jaun₂ ta₁guión₂-quén₂ i₂lɨ́n₅ dsa₂ canꞌ₅₄ i₂tiánꞌ₅ ne₄ta₁ quióꞌ₅ ne₄ Diú₄, qui₂ca₂tóin₂ të₂ ꞌuë₃ rë₂ꞌéin₂ co₂ŋeiꞌ₅₄, ca₂jme₃juɨinꞌ₂ Diú₄,
17 qui₂ca₂juáꞌ₂:
Cuë₂ jniaꞌ₅₄ ti₁ꞌmagꞌ₄ ꞌne₂,
Te₁guiꞌ₅₄ Diú₄ i₂ꞌUanꞌ₂ guë́₄ lɨn₃,
ꞌne₂ bá₄ i₂lɨ́ngꞌ₅, ꞌne₂ i₂jme₁lɨ́ngꞌ₄,c
ia₁ ma₂ca₂jme₁ꞌŋióꞌ₂ ꞌne₂ bí₂ juëꞌ₂ quiángꞌ₂,
ma₂ca₂jme₁liógꞌ₄ gongꞌ₂.
18 Jme₁qui₂nau₂ ꞌnei₂ juɨg₂ guaꞌ₅₄ ꞌuë₃,
la₁ në₃ guë́₄ já₅ ꞌnei₂ a₂ꞌi₄ ꞌauꞌ₂,
ia₁ ma₂ca₂të́₂ jmɨg₄ a₂qui₁dsɨꞌ₂ ꞌéiꞌ₃ ja₁con₂ ꞌlag₄.
Tonꞌ₂ ca₂të́₂ jmɨg₄ ja₁quɨꞌ₅₄ ꞌlianꞌ₅₄ dsa₂ quiángꞌ₂
i₂ca₂jme₃ti₃ ta₁ neꞌ₅₄
i₂qui₂ma₂ꞌë́₂ jág₁ quiángꞌ₂.
Le₂jaun₂ guëꞌ₂ i₂jme₂go₃ ꞌa₂ liaꞌ₂ lɨ́nꞌ₅ ꞌne₂
liaꞌ₂ dsa₂ canꞌ₅₄, liaꞌ₂ dsa₂ meꞌ₂.
Ján₃ guëꞌ₂ ca₂të́₂ jmɨg₄ a₂ꞌéngꞌ₄
juɨ₁liaꞌ₂ i₂qui₂ꞌén₂ ne₄ guaꞌ₅₄ ꞌuë₃.
19 Jaun₂ guë́₄ ca₂niá₃ dsi₂néi₂ guáꞌ₅ quióꞌ₅ Diú₄ gueiꞌ₅₄ i₂juɨ́g₃. Ca₂jnia₃ tsɨ₁gu₅ quióꞌ₅ jág₁ a₂lɨꞌ₅₄ quianꞌ₅₄ Diú₄ dsi₂néi₂ guáꞌ₅ quióꞌ₅. Të₃jë₄ jaun₂ qui₂ca₂lë₃ si₁ŋíꞌ₃, qui₂ca₂néꞌ₂ jág₁, qui₂ca₂quiaꞌ₂ ŋíꞌ₃, qui₂ca₂i₁bi₅₄ ꞌuë₃, qui₂ca₂séiꞌ₂ dsɨ́₅ caꞌ₅₄.