Mɨ₂si₂ píꞌ₁ rë₂bɨn₅
10
Jaun₂ ca₂jɨng₅₄ táng₃ jan₂ ángel siánꞌ₂, i₂ꞌuanꞌ₂ lɨn₃, ca₂jniai₃ já₅ ca₂sióin₃ gueiꞌ₅₄ i₂juɨ́g₃, rë₂lióin₃ jnei₅ rë₂lag₄ lí₁ liaꞌ₂ jniá₂ mɨ₂joꞌ₅₄ si₂ mɨ₂dsi₅₄. Jme₁tág₅ dsɨ₂ne₅₄ liaꞌ₂ tág₅ ꞌiog₂; mɨ₂tag₅₄ guëꞌ₂ në́₃, jme₁lë́₄ liaꞌ₂ lë́₅ tag₄ dsɨ₅ nɨ₁ꞌiaꞌ₂, a₂tág₅ si₂.
2 Jme₁chi₁chanꞌ₂ caun₂ mɨ₂si₂ píꞌ₁ a₂rë₂bɨn₅, a₂rë₂na₄. Jaun₂ ca₂chiꞌ₃ mɨ₂tag₅₄ ne₁ ne₄ jmɨ₁ŋíꞌ₄, tag₅₄ jen₅ guëꞌ₂ ca₂chiꞌ₃ ne₄ ꞌuë₃.
3 Jaun₂ ca₂guióꞌ₃ tiá₂, liaꞌ₂ jë₁ꞌŋióg₁ ꞌiaꞌ₂ león. Jaun₂ dsɨ₂juɨ₅ jme₁ca₂guióꞌ₃, ca₂quiaꞌ₂ ta₁guio₃ ŋíꞌ₃, qui₂ca₂ꞌuë́ꞌ₃ jág₁ quióꞌ₅.
4 Jme₁ma₂në₂dsia₃ jág₁ ta₁guio₃ ŋíꞌ₃, jaun₂ guë́₄ jme₁ma₂taun₅₄ ne₄ si₂. La₁ ca₂néꞌ₂ jág₁ a₂já₃ gueiꞌ₅₄ i₂juɨ́g₃, ca₂juáꞌ₂ tság₅ jniá₂:
―ꞌMa₄ jág₁ a₂në₂juáꞌ₂ guio₃ ŋíꞌ₃ në₅, ꞌa₃ lë₁taun₂ deꞌ₂ ne₄ si₂.
5 Jaun₂ ángel i₂ca₂jɨng₅₄, i₂chénꞌ₅ chíꞌ₅ caun₂ tag₅₄ ne₄ jmɨ₁ŋíꞌ₄ caun₂ guëꞌ₂ tag₅₄ ne₄ ꞌuë₃, ca₂chógꞌ₃ gu₂ ne₁ juɨ₅ gueiꞌ₅₄ i₂juɨ́g₃.
6 Jaun₂ ca₂juáꞌ₂ ca₂ꞌɨin₃ i₂chan₂ co₂tan₅₄, i₂ca₂jmo₃ ca₂dsia₃ mɨ₂güɨ́g₃, quianꞌ₅₄ ca₂le₃jë́₃ a₂tioꞌ₅₄ ja₁jaun₂, i₂ca₂jmo₃ gueiꞌ₅₄ mɨ₂güɨ́g₃ quianꞌ₅₄ ca₂le₃jë́₃ a₂tioꞌ₅₄ ja₁jaun₂, i₂ca₂jmo₃ jmɨ₁ŋíꞌ₄, quianꞌ₅₄ ca₂le₃jë́₃ a₂tioꞌ₅₄ ja₁jaun₂; ca₂juáꞌ₂:
―Tsá₃ ma₂uë́₂ le₃ꞌag₄.
7 La₁ jë₁ma₂të́₂ jmɨg₄ jë₁ma₂ca₂jéi₂ ángel i₂ca₂të́₂ guion₃ ꞌéi₂ ŋí₁ trompeta quióꞌ₅, jmɨg₄ jaun₂ dé₄ dsónꞌ₂ le₃ti₃ jág₁ a₂rë₂ꞌma₄ quióꞌ₅ Diú₄, a₂ca₂ꞌë́₂ ne₄ dsa₂ i₂jme₁ꞌë́₂ jág₁ quiáin₅, i₂ca₂jme₃ti₃ ta₁ ne₅₄.
8 Jaun₂ jág₁ a₂ca₂nag₃ a₂já₅ gueiꞌ₅₄ i₂juɨ́g₃ jaun₂, ca₂juáꞌ₂ táng₃ ca₂tság₃ jniá₂:
―Gua₂, o₂quian₂ mɨ₂si₂ píꞌ₁ a₂rë₂na₄ a₂chi₁chanꞌ₂ ángel i₂chénꞌ₅ ne₄ jmɨ₁ŋíꞌ₄, ne₄ guaꞌ₅₄ ꞌuë₃.
9 Jaun₂ ŋó₃ jniá₂ ja₁chénꞌ₄ ángel, jaun₂ ca₂juɨ́g₂ jniá₂ a₂cuë₃ mɨ₂si₂ píꞌ₁. Jaun₂ ca₂juáꞌ₂ ꞌéi₂ ca₂tság₃ jniá₂:
―Jánꞌ₅, tioꞌ₂ mɨ₂ꞌoꞌ₅₄ co₂dsia₅ jme₁dsia₂ quéꞌ₂. A₂jmá₂ rau₂ bá₄ në₅, la₁ jë₁ma₂dsióg₃ të₂ꞌauꞌ₂, le₃dsiꞌ₃ bá₄.
10 Jaun₂ ca₂tɨ́ng₂ si₂ a₂ca₂cuë₃ ángel ꞌéi₂. Jaun₂ ca₂tóꞌ₃ mɨ₂ꞌo₃. Dsónꞌ₂ bá₄ ráu₂ ꞌŋio₅ lɨn₃, lë́₅ liaꞌ₂ lë́₅ jmɨ₁táꞌ₄. La₁ jme₁ma₂në₂nágꞌ₃ jniá₂ në́₃, ca₂rë₃léi₄ ꞌe₂ bá₄ dsiꞌ₃ ca₂dsióg₃ të₂dsɨ₃.
11 Jaun₂ ca₂juáꞌ₂ ca₂tság₃ jniá₂:
―Tion₅₄ ꞌnióꞌ₅ o₁ꞌë́ꞌ₃ bá₄ táng₃ ꞌne₂ jág₁ ne₄ ca₂le₃jɨ́n₃ ne₅₄ dsa₂, ne₄ ꞌlióng₂ juɨg₂, ne₄ ꞌlióng₂ jág₁ jmei₅, ne₄ juɨn₅ rag₅₄ në́₃.