9
Jaun₂ ca₂jéi₂ jë₁ca₂të́₂ ꞌŋiá₂ ángel ŋí₁ quióꞌ₅, jaun₂ ca₂jɨn₄ jniá₂ jan₂ nei₅ i₂ca₂tánꞌ₂ gueiꞌ₅₄ i₂juɨ́g₃ ca₂të₂ guaꞌ₅₄ ꞌuë₃.a Ca₂ŋɨi₂ ŋí₁ llave a₂ca₂tɨ́n₂ quióꞌ₅ ja₁ca₂jein₃ chi₁dsio₅₄.
2 Dsɨ₂juɨ₅ jme₁ca₂niá₃ ꞌéi₂ ja₁jaun₂, jaun₂ ca₂ꞌia₂ jme₁ŋi₁ ꞌŋei₂ juɨ₁liaꞌ₂ jme₁ŋi₁ a₂ꞌuë₂ tau₂ si₂ pa₁ lɨn₃ ja₁jme₂jmág₂ dsa₂ nɨ₁ŋí₁. Jaun₂ co₂dsia₅ ca₂lë₃ qui₁néꞌ₃ ꞌiog₂, dsɨ₄ mɨ₂güɨ́g₃ në́₃ quianꞌ₅₄ jme₁ŋi₁ a₂ca₂ꞌia₂ ja₁jaun₂.
3 Jë₄ jme₁ŋi₁ jaun₂ ca₂ꞌuɨn₂ i₁nɨꞌ₂ ca₂i₁nioi₁₂ tsɨ₁co₂jë́ꞌ₂ ꞌuë₃. I₁nɨꞌ₂ ꞌéi₂, ca₂ŋɨi₂ bí₂ a₂lɨ́in₅ juɨ₁liaꞌ₂ lɨ́n₅ i₁ꞌné₅ i₂chan₂ guaꞌ₅₄ ꞌuë₃.
4 Jaun₂ ca₂ŋɨi₂ ꞌéiꞌ₃ a₂tsá₃ dain₅₄ jmo₃ juɨ₁liaꞌ₂ ꞌau₂ a₂cha₂ guaꞌ₅₄ ꞌuë₃, on₃ guëꞌ₂ ꞌi₁caun₂ a₂rëꞌ₂ juɨ₁liaꞌ₂ mogꞌ₅₄ ꞌma₂ a₂cha₂ në́₃. Bí₂ jaun₂ bá₄ ca₂ŋɨi₂, a₂jmo₃ dain₅₄ jmáꞌ₃ liaꞌ₂ dsa₂ i₂tsá₃ léi₄ quióꞌ₅ Diú₄ le₁quian₅ chi₁quí₃.
5 La₁ tsá₃ ꞌéiꞌ₃ jaun₂ ca₂ŋɨi₂ juaꞌ₅₄ a₂co₂dsia₅ jme₃dsiain₂₃ dsa₂; a₂jŋiaꞌ₅₄ conꞌ₂ ꞌë₃ jmɨ₁uɨg₅ ca₂liaꞌ₂ ca₂dsɨn₃ ꞌŋiá₂ tsɨꞌ₂. Uɨg₅ a₂cuë₂₃ jaun₂ lë́₅ liaꞌ₂ lë́₅ caun₂ uɨg₅ quɨꞌ₂ juɨ₁liaꞌ₂ ja₁ꞌɨ́ꞌ₅ i₁ꞌné₅ quióꞌ₅ dsa₂.
6 Jmɨg₄ jaun₂ qui₃ꞌnoꞌ₂ dsa₂ ꞌmú₃, la₁ tsá₃ a₁jaun₂ dsioꞌ₂. ꞌƗ́n₅ dsɨ́₅ juaꞌ₅₄ dsiáin₃ bá₄ co₂ŋeiꞌ₅₄, la₁ ꞌmú₃ në́₃, cuɨng₃ ja₁coin₂.
7 I₁nɨꞌ₂ ꞌéi₂ në́₃, jme₁lɨ́n₄ liaꞌ₂ lɨ́n₅ dsɨ₂cua₁ i₂lë́₅ co₂jŋia₅₄ dsɨ₃léin₂ ne₄ ꞌnei₂. Mɨ₂dsi₅₄ guëꞌ₂ në́₃ jme₁le₁quian₅ a₂lë́₅ liaꞌ₂ lë́₅ coronas a₂lë́₅ cu₄nióg₄. Dsɨ₂ne₄ guëꞌ₂ jme₁lë́₄ liaꞌ₂ lë́₅ dsɨ₂ne₄ dsa₂ mɨ₂güɨ́g₃.
8 Jŋi₂ dsi₅₄ guëꞌ₂ në́₃, jme₁lë́₄ liaꞌ₂ lë́₅ jŋi₂ dsi₄ dsa₂ mɨ́₂. Mɨ₂jan₅₄ guëꞌ₂ jme₁lë́₄ liaꞌ₂ lë́₅ mɨ₂jan₄ ꞌiaꞌ₂ león.
9 Guion₅₄ guëꞌ₂ jáꞌ₂ qui₂rë₂lióin₃ rë₂, lë́₅ ꞌí₁ quianꞌ₅₄ a₂lë́₅ liaꞌ₂ lë́₅ nɨ₁ŋí₁. Mɨꞌ₅₄ a₂tóꞌ₅ tsɨ₁rë₂cu₅ jë₁ma₂ꞌɨ́in₂ në́₃, jme₁lë́₄ juɨ₁liaꞌ₂ lë́₅ mɨꞌ₅₄ a₂tóꞌ₅ ꞌlióng₂ ŋí₁ carretas a₂ꞌɨ́n₅ dsɨ₂cua₁ co₂ꞌei₅ ne₄ ꞌnei₂.
10 Ne₁con₅ a₂le₁dsɨ₅₄ guëꞌ₂ në́₃, jme₁lë́₄ juɨ₁liaꞌ₂ lë́₅ ne₁con₅ i₁ꞌné₅ le₁dsɨ₅₄ táun₂. Juɨ₅ neiꞌ₅₄ con₅ jaun₂, ꞌio₅ bí₂ a₂le₃jmáiꞌ₂ dain₅₄ dsa₂, conꞌ₂ ꞌŋiá₂ tsɨꞌ₂.
11 Ne₄ i₁nɨꞌ₂ ꞌéi₂ jme₁gon₂ jan₂ rag₅₄, i₂lɨ́n₅ ángel i₂niog₅ ne₄ ja₁ca₂jein₃ chi₁dsio₅₄. Jme₁chein₂ Abadón quianꞌ₅₄ jág₁ jmei₅ hebreo. Le₃quianꞌ₅₄ jág₁ jmei₅ griego guëꞌ₂, chein₂ Apolión, co₂ꞌnióꞌ₄ i₂të́ꞌ₂ I₂qui₂ꞌén₂.
12 Le₂ꞌuɨg₅₄ jmɨ₁uɨg₅ ma₂ca₂ŋag₅; la₁ ꞌei₅ guë́₄ conꞌ₂ guë́₄ tɨn₃, a₂në₅ guë́₄ ŋág₃ dsa₂.
13 Jaun₂ ca₂jéi₂ jë₁ca₂të́₂ jŋé₂ ángel ŋí₁ quióꞌ₅. Jaun₂ ca₂nag₃ jág₁ a₂ꞌia₂ jë₄ ta₁quén₂ gua₄ a₂le₁dsɨ₅₄ ne₄chei₂ a₂lë́₅ cu₄nióg₄ a₂chíꞌ₅ ne₄ Diú₄.
14 Ca₂juáꞌ₂ ca₂tsɨ́ꞌ₃ ángel i₂jë₁ca₂të́₂ jŋé₂ ꞌéi₂, i₂chanꞌ₂ ŋí₁ trompeta, ca₂juáꞌ₂:
―ꞌUɨnꞌ₅₄ le₃quén₂ ángeles i₂le₁ꞌŋeꞌ₅₄ cau₅ cuá₃ juëꞌ₂ Eufrates.
15 Jaun₂ qui₂ca₂ꞌuɨnꞌ₂ le₃quén₂ ángeles ꞌéi₂ i₂jme₁lë́₄ ꞌí₁ o₄quióꞌ₄ hora la₂, jmɨg₄ në₃, tsɨꞌ₂ la₂, ŋi₂ la₂ në́₃, i₂jme₁lë́₄ co₂jŋia₅₄ ia₁jaun₂ i₂jme₁dsiain₂₃ ca₂quiꞌ₅₄ quióꞌ₅ ꞌnɨ₅ juɨ₁liaꞌ₂ dsa₂ mɨ₂güɨ́g₃.
16 Jmáꞌ₃ liaꞌ₂ ꞌlióg₂ i₂co₁dsɨn₅₄ cua₁, tén₅ tɨn₃ ꞌŋiá₂-lón₂ millón. Ca₂nag₃ bá₄ jniá₂ ꞌa₂ conꞌ₂ téin₅ lë́₂.
17 Le₂në₅ bá₄ ca₂jág₃ a₂lë₁ca₂jág₃ jaun₂, qui₂ca₂jɨng₅₄ cua₁ quianꞌ₅₄ dsa₂ i₂co₁dsag₅₄ ꞌéi₂. Le₁lióg₃ le₁dsɨ́₅ dsa₂ jma₃cáun₃ a₂lë́₅ ꞌí₁ a₂jniá₂ guéin₂, a₂lian₂, quianꞌ₅₄ guëꞌ₂ a₂nióg₂ liaꞌ₂ nióg₂ azufre. Mɨ₂dsi₄ dsɨ₂cua₁ guëꞌ₂ në́₃, jniá₂ liaꞌ₂ jniá₂ mɨ₂dsi₄ ꞌiaꞌ₂ león. Juɨ₅ mɨ₂ꞌo₅₄ guëꞌ₂ në́₃ ꞌia₂ si₂, ꞌia₂ jme₁ŋi₁, azufre në́₃.
18 Jaun₂ ca₂dsan₃ ca₂quiꞌ₅₄ quióꞌ₅ ꞌnɨ₅ juɨ₁liaꞌ₂ dsa₂ mɨ₂güɨ́g₃ quianꞌ₅₄ ꞌnɨ₅ jmɨ₁uɨg₅ a₂qui₂ca₂ꞌuë₂ mɨ₂ꞌo₄ dsɨ₂cua₁ ꞌéi₂: a₂lë́₅ si₂, jme₁ŋi₁, quianꞌ₅₄ azufre në́₃.
19 Ia₁ bí₂ a₂jme₁le₁quian₅ dsɨ₂cua₁ jme₁ꞌio₂₃ juɨ₅ mɨ₂ꞌo₅₄ quianꞌ₅₄ juɨ₅ ne₁con₅ në́₃. Ia₁ jme₁lë́₄ neiꞌ₅₄ con₅ ꞌéi₂ liaꞌ₂ lɨ́n₅ dsɨ₂mɨꞌ₂, a₂qui₂le₁dsɨ₅₄ mɨ₂dsi₅₄. Quianꞌ₅₄ a₂jaun₂ jmo₂₃ dain₅₄.
20 Dsa₂ i₂ca₂chón₂, i₂tsá₃ ca₂dsan₃ quianꞌ₅₄ jmɨ₁uɨg₅ a₂qui₂ca₂lë₃ jaun₂, tsá₃ juaꞌ₅₄ jaun₂ qui₂ca₂tí₂ ꞌe₂ jmo₅-dsáu₅ gu₂-tag₅₄, juaꞌ₅₄ a₂tsá₃ ma₃chi₂léinꞌ₂ je₂naꞌ₅₄, on₃ guëꞌ₂ qui₂ca₂tí₂ a₂tsá₃ ma₃jme₂juɨinꞌ₂ diú₄ lag₄ i₂lɨ́n₅ quianꞌ₅₄ cu₄nióg₄ quianꞌ₅₄ cu₄tiog₂, quianꞌ₅₄ nɨ₁ŋí₁ nióg₂, quianꞌ₅₄ nɨ₁cang₁, quianꞌ₅₄ nɨ₁ꞌma₂ në́₃; on₃ i₂lé₂ ŋɨ₃, on₃ i₂lé₂ dsia₃ jág₁, on₃ i₂lé₂ jág₃, on₃ guëꞌ₂ lé₂ nag₃ në́₃.
21 On₃ guëꞌ₂ qui₂ca₂tí₂ juaꞌ₅₄ a₂tsá₃ ma₃jme₃dsiain₂₃ dsa₂ mɨ₂güɨ́g₃ rɨinꞌ₅₄, on₃ guëꞌ₂ qui₂ca₂tí₂ ta₁ a₂jme₁jmo₂₃ mɨ́₅ a₂chan₂ dsɨ́₅.b On₃ guëꞌ₂ qui₂ca₂tí₂ juaꞌ₅₄ tsá₃ ma₃nióꞌ₅ jág₁ a₂tsá₃ dsi₂ten₅₄ nióꞌ₃, on₃ guëꞌ₂ qui₂ca₂tí₂ juaꞌ₅₄ a₂tsá₃ ma₃ꞌang₃ në́₃.