Mɨ₄cuɨng₅ jë₁ca₂të́₂ guio₃
8
Jme₁ca₂niá₃ guëꞌ₂ táng₃ Guein₂ Jáꞌ₂ Chaꞌ₂ jë₁ca₂të́₂ guio₃ mɨ₄cuɨng₅ quióꞌ₅ mɨ₂si₂ a₂rë₂bɨn₅, jaun₂ ca₂të₁tsɨꞌ₅₄ tei₄ gueiꞌ₅₄ i₂juɨ́g₃ conꞌ₂ ca₂jau₅₄ hora.
2 Ján₃ bá₄ ca₂jɨn₄ jniá₂ ta₁guion₃ ángeles i₂tión₂ ne₄ Diú₄. ꞌÉi₂ guëꞌ₂ në́₃ ca₂ŋɨi₂ guio₃ ŋí₂ trompetas.
3 Cang₂ jaun₂ ca₂já₃ táng₃ jan₂ ángel ca₂o₃náu₃ ne₄chei₂, chi₁chanꞌ₂ caun₂ ŋí₁ tóꞌ₅ chen₂, a₂lë́₅ jmáꞌ₃ cu₄nióg₄. Jaun₂ ca₂ŋɨi₂ ꞌlióng₂ chen₂, jaun₂ jénꞌ₃ co₂dsia₅ quianꞌ₅₄ jág₁ a₂chi₂líꞌ₂ ca₂le₃jɨ́n₃ dsa₂ i₂tén₅ le₃quióꞌ₅ Diú₄,a dsia₃ ne₄ ne₄chei₂ a₂lë́₅ cu₄nióg₄ a₂chíꞌ₅ ꞌuɨg₅₄ ne₄ta₁.
4 Jaun₂ ca₂jŋáu₂ jme₁ŋi₁ chen₂ liaꞌ₂ jma₃quianꞌ₅₄ jág₁ a₂chi₂líꞌ₂ dsa₂ quián₅ Diú₄, qui₂ca₂ꞌuë₂ o₄gú₃ ángel le₃ne₄ Diú₄.
5 Jaun₂ ca₂tɨ́n₂ ángel ŋí₁ a₂tóꞌ₅ chen₂, jaun₂ ca₂jme₃cainꞌ₂ mɨ́g₂ si₂táꞌ₃ tioꞌ₅₄ ne₄chei₂, jaun₂ ca₂guiaꞌ₃ jaun₂ në́₃, ne₄ guaꞌ₅₄ ꞌuë₃. Jaun₂ ca₂lë₃ gau₂ ca₂quiaꞌ₂ ŋíꞌ₃, ca₂të₁tsɨꞌ₅₄ co₂mɨꞌ₅₄, qui₂ca₂ꞌnéꞌ₃ si₁ŋíꞌ₃, ca₂i₁bi₅₄ ꞌuë₃ në́₃.
Ŋí₁ trompetas
6 Jaun₂ në́₃, le₃guion₃ ángeles i₂le₁chanꞌ₂ ŋí₁ trompetas, ca₂jmo₃ co₂jŋia₅₄ a₂jéi₂ ŋí₁ quióꞌ₅.
7 Jaun₂ ca₂jéi₂ jë₁le₂ꞌuɨg₅₄ ángel ŋí₁ quióꞌ₅, jaun₂ dsɨ₂juɨ₅ le₂jaun₂ ca₂séiꞌ₂ mɨ₂dsɨ́₅ quianꞌ₅₄ mɨ́g₂ si₂táꞌ₃ a₂qui₂rë₂cónꞌ₅ jmɨ₂, ca₂tang₂ ne₄ guaꞌ₅₄ ꞌuë₃. Jaun₂ guë́₄ ca₂cáu₂ ca₂quiꞌ₅₄ quióꞌ₅ ꞌnɨ₅ quióꞌ₅ guaꞌ₅₄ ꞌuë₃; qui₂ca₂cáu₂ ca₂quiꞌ₅₄ quióꞌ₅ ꞌnɨ₅ quióꞌ₅ nɨ₁ꞌma₂ a₂cha₂ ꞌŋa₁; qui₂ca₂cáu₂ guë́₄ ca₂le₃jë́₃ nau₂ rëꞌ₂.
8 Jaun₂ ca₂jéi₂ jë₁ca₂të́₂ on₃ ángel ŋí₁ quióꞌ₅, jaun₂ ca₂jnia₃ ŋó₃ ca₂quɨꞌ₃ a₂lë́₅ liaꞌ₂ lë́₅ máꞌ₂ ne₄ jmɨ₁ŋíꞌ₄, jniá₂ chi₁guíꞌ₂ si₂ ŋó₃. Jaun₂ ca₂lë₃ jmɨ₂ ca₂quiꞌ₅₄ quióꞌ₅ ꞌnɨ₅ quióꞌ₅ jmɨ₁ŋíꞌ₄.
9 Jaun₂ ca₂dsan₃ ca₂quiꞌ₅₄ quióꞌ₅ ꞌnɨ₅ juɨ₁liaꞌ₂ jáꞌ₂ i₂chan₂ jmɨ₁ŋíꞌ₄, jaun₂ ca₂ꞌen₃ ca₂quiꞌ₅₄ quióꞌ₅ ꞌnɨ₅ juɨ₁liaꞌ₂ nɨ₁barcos ján₃.
10 Jaun₂ ca₂jéi₂ jë₁ca₂të́₂ ún₂ ángel ŋí₁ quióꞌ₅, jaun₂ ca₂táꞌ₂ caun₂ nei₅ pa₁a chi₁guíꞌ₂ si₂ ca₂táꞌ₂ gueiꞌ₅₄ dsi₂güɨg₂, qui₂cau₂ liaꞌ₂ cau₂ nɨ₁quɨ₂; ca₂táꞌ₂ ne₄ ca₂quiꞌ₅₄ quióꞌ₅ ꞌnɨ₅ ca₂le₃jë́₃ cuá₃, ne₄ ca₂le₃jë́₃ o₄tu₁ jmɨg₂ në́₃.
11 Nei₅ jaun₂ chei₂ Nei₅b Dsiꞌ₃. Jaun₂ ca₂lë₃ dsiꞌ₃ ca₂quiꞌ₅₄ quióꞌ₅ ꞌnɨ₅ juɨ₁liaꞌ₂ jmɨg₂ cha₂ guaꞌ₅₄ ꞌuë₃. Jaun₂ juɨn₅ lɨn₃ dsa₂ i₂ca₂dsan₃ ia₁ ca₂ꞌɨnꞌ₃ jmɨg₂ dsiꞌ₃ jaun₂, ꞌuɨg₅₄ ia₁ a₂ca₂lë₃ dsiꞌ₃ jmɨg₂.
12 Jaun₂ ca₂jéi₂ jë₁ca₂të́₂ quén₂ ángel ŋí₁ quióꞌ₅, jaun₂ ca₂i₃ba₅₄ ca₂quiꞌ₅₄ quióꞌ₅ ꞌnɨ₅ quióꞌ₅ ꞌiog₂, ca₂quiꞌ₅₄ quióꞌ₅ ꞌnɨ₅ quióꞌ₅ tsɨꞌ₂, ca₂quiꞌ₅₄ quióꞌ₅ ꞌnɨ₅ juɨ₁liaꞌ₂ nei₅ në́₃, ia₁jaun₂ néi₃ ca₂quiꞌ₅₄ quióꞌ₅ ꞌnɨ₅ ca₂le₃jë́₃ a₂jaun₂, ia₁jaun₂ tsá₃ ma₃jnia₃ ca₂quiꞌ₅₄ quióꞌ₅ ꞌnɨ₅ a₂jmɨ₂, ján₃ bá₄ le₂jaun₂ a₂ꞌuë₂.
13 Jaun₂ ca₂jág₃ jniá₂ táng₃, ca₂jɨng₅₄ jan₂ i₁mɨg₂ i₂ŋɨ₅ ꞌen₅ dsi₂güɨg₂, ca₂néꞌ₂ tiá₂ jág₁ quióꞌ₅, i₁juáꞌ₄:
―¡Juɨ́g₂! ¡Juɨ́g₂! ¡Juɨ́g₂ guë́₄ lɨn₃ juɨ₁liaꞌ₂ i₂chan₂ ne₄ guaꞌ₅₄ ꞌuë₃, ꞌuɨg₅₄ ŋí₁ trompetas a₂në₃ guë́₄ dsɨ₃ꞌein₅₄ a₂jéi₂ le₃ún₂ ángeles i₂ꞌnióꞌ₅ guë́₄ ꞌéi₂!