Jág₁ jángꞌ₅ léi₄ juɨ₁liaꞌ₂ dsa₂ i₂jmo₅ ꞌí₁ jáꞌ₂ chaꞌ₂
10
ꞌA₂dsɨ₂jóꞌ₃ juɨ́g₂ jniá₂ ꞌniaꞌ₂, juɨ₁liaꞌ₂ i₂tsá₃ tónꞌ₅ të₂le₃ juɨ₅ o₄ꞌné₄ tsɨ₁jnɨ́₂ ja₁tionꞌ₅₄ jáꞌ₂ chaꞌ₂, a₂uɨ́g₂ juɨ₅ siáꞌ₂, dsa₂ ꞌang₂ bá₄ ꞌéi₂.
2 La₁ia₁ juɨ₁liaꞌ₂ i₂ꞌí₂ të₂le₃ o₄ꞌné₄, dsa₂ i₂jmo₅ ꞌí₁ jáꞌ₂ chaꞌ₂ bá₄ ꞌéi₂.
Jesús el buen pastor (Juan 10.1-21)
3 O₄quióꞌ₄ ꞌéi₂ bá₄ niá₅ dsa₂ i₂jmo₅ ꞌí₁ o₄ꞌné₄, jaun₂ jáꞌ₂ chaꞌ₂ në́₃, rë₂cuɨ́ꞌ₅ jág₁ quióꞌ₅ ꞌéi₂. Jaun₂ të́ꞌ₂ jáꞌ₂ chaꞌ₂ quiáin₅ ꞌŋiog₅ liaꞌ₂ chein₂, jaun₂ ꞌuágꞌ₂.
4 Jë₁ma₂ca₂lë₃ ꞌuɨ́inꞌ₂ ca₂le₃jɨ́n₃ conꞌ₂ i₂quiáin₅ ꞌŋiog₅, jaun₂ cán₂ ne₄ juɨ₅, dsó₅ ne₄ jáꞌ₂ chaꞌ₂. Jáꞌ₂ chaꞌ₂ në́₃ dsɨ₂léin₂ chi₁coꞌ₅₄ quióꞌ₅, ia₁ rë₂cuɨ́ꞌ₅ bá₄ jág₁ quióꞌ₅.
5 La₁ tsá₃ ꞌein₂₃ juɨ₁liaꞌ₂ dsa₂ i₂tsá₃ cuɨin₂₃; të₂le₃ cuɨng₂₃ bá₄ ja₁con₂ ꞌéi₂, ia₁ tsá₃ cuɨ́ꞌ₅ jág₁ quióꞌ₅ dsa₂ siánꞌ₂.
6 Ca₂juáꞌ₂ Jesús jág₁ a₂jángꞌ₅ léi₄ në₅, la₁ tsá₃ ca₂rë₃ŋɨ́ꞌ₂ dsa₂, ꞌe₂ jein₅ jág₁ jaun₂ a₂juáꞌ₂.
Jan₂ Jesús i₂dsen₃ i₂jmo₅ ꞌí₁ jáꞌ₂ chaꞌ₂
7 Jaun₂ në́₃ ca₂juáꞌ₂ táng₃ Jesús ca₂tsɨ́ꞌ₃ dsa₂:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, jniá₂ bá₄ lɨ́ng₅ o₄ꞌné₄ juɨ₅ ja₁dsɨ₂tonꞌ₅₄ jáꞌ₂ chaꞌ₂.
8 Ca₂le₃jɨ́n₃ i₂ma₂o₃lén₂ jŋiá₅ guë́₄ conꞌ₂ guë́₄ jniá₂, dsa₂ ꞌang₂ bá₄ ꞌéi₂; la₁ jáꞌ₂ chaꞌ₂ në́₃, tsá₃ juɨ₅ ca₂tonꞌ₂ quióꞌ₅.
9 Jniá₂ lɨ́ng₅ o₄ꞌné₄; juɨ₁liaꞌ₂ i₂tónꞌ₅ juɨ₅ le₃quió₃, tɨ́inꞌ₄ bá₄. Jaun₂ qui₃dsɨ₃toinꞌ₅₄, qui₃ꞌuɨ́in₃, jaun₂ dsioꞌ₂ bá₄ ŋi₂maꞌ₂ a₂guë́ꞌ₃.
10 ꞌDsa₂ ꞌang₂ në́₃, jmáꞌ₃ ta₁ jaun₂ bá₄ ja₂: a₂ꞌang₃, a₂jme₃dsiog₂₃, a₂qui₃ꞌéin₂ në́₃; jniá₂ në́₃ guio₃ ia₁jaun₂ le₃chain₂, a₂le₃chain₂ qui₂rë₂tsón₂.
11 Jniá₂ bá₄ lɨ́ng₅ juɨg₅₄ dsen₃ i₂jmo₅ ꞌí₁ jáꞌ₂ chaꞌ₂.a Guen₅ ꞌmú₃ juɨg₅₄ dsen₃ o₄quióꞌ₄ jáꞌ₂ chaꞌ₂;
12 la₁ juɨ₁liaꞌ₂ dsa₂ i₂jmo₅ ta₁ a₂ꞌliainꞌ₅₄, jë₁ma₂ca₂jág₃ já₅ dsɨ₂jɨꞌ₅₄ náu₂, téin₂ bá₄ jáꞌ₂ chaꞌ₂ jaun₂ cuɨng₂₃ bá₄ ꞌŋiog₅, ia₁ on₃juaꞌ₅₄ juɨg₅₄ i₂quián₅ jáꞌ₂ chaꞌ₂ ꞌéi₂. Jaun₂ dsɨ₂jɨꞌ₅₄ náu₂ në́₃, tsáinꞌ₂ jáꞌ₂ chaꞌ₂, jaun₂ jmo₂₃ le₁jan₅₄ jáꞌ₂.
13 Dsa₂ ꞌéi₂ në́₃, cuɨng₂₃ ia₁ a₂ꞌliainꞌ₅₄ bá₄ jmo₂₃ ꞌí₁; tsá₃ dsan₂ dsɨ́₅ jáꞌ₂.
14 Jniá₂ bá₄ lɨ́ng₅ juɨg₅₄ dsen₃; i₂cuɨ́n₅ bá₄ jniá₂ jáꞌ₂ chaꞌ₂ quiáng₃; ꞌéi₂ në́₃ cuɨg₂₃ jniá₂.
15 Le₂jaun₂ juɨ₁liaꞌ₂ cuɨg₅ Ŋeꞌ₃ jniá₂, ján₃ bá₄ cuɨ́n₅ jniá₂ ꞌéi₂ në́₃. Guén₅ jniá₂ ꞌmú₃ o₄quióꞌ₄ jáꞌ₂ chaꞌ₂ quiáng₃.
16 Ján₃ bá₄ tionꞌ₅₄ jáꞌ₂ chaꞌ₂ siánꞌ₂ quiáng₃ i₂tsá₃ tionꞌ₅₄ ꞌŋióꞌ₃ jnɨ́₁ la₂; ján₃ bá₄ ca₂tɨ́n₂ jniá₂ i₁te₁ ꞌéi₂. Ján₃ bá₄ le₃neꞌ₅₄ ꞌéi₂ jág₁ quió₃, jaun₂ co₂nióꞌ₃ bá₄ lé₂, jan₂ guëꞌ₂ juɨg₅₄.
17 ꞌꞌUɨg₅₄ jaun₂ bá₄ ꞌnio₃ Ŋeꞌ₃ jniá₂: ia₁ jángꞌ₅ jme₂dsí₂ quió₃,b ia₁jaun₂ tɨ́ngꞌ₄ táng₃.
18 Liaꞌ₂ ꞌi₁jan₂ tsá₃ jŋiáꞌ₂ jme₂dsí₂ a₂chan₂ jniá₂, ia₁ jángꞌ₅ bá₄ jniá₂ jme₂dsí₂ a₂chang₂ a₂ꞌŋio₂ dsɨ₃ ꞌŋió₃. Jniá₂ bá₄ ꞌo₂₃ bí₂ jángꞌ₅, jaun₂ ꞌo₂₃ bí₂ tɨ́ngꞌ₄ táng₃. ꞌÉiꞌ₃ në₅ ca₂ŋɨg₂ ja₁con₂ Ŋeꞌ₃.
19 Jaun₂ ca₂lë₃ le₁dsonꞌ₅₄ táng₃ dsa₂ judíos*, jme₁ca₂nág₂ jág₁ në₅.
20 Juɨn₅ i₂ꞌéi₂ juáꞌ₂:
―I₂ꞌen₅₄ jan₂ jme₂dsí₂ je₂naꞌ₅₄ të₂dsɨ́₅ bá₄ në₅, të₂ꞌɨ₂₃ a₂ŋái₅ në́₃. ¿ꞌE₂ lë₃ tónꞌ₂ ꞌniaꞌ₂ juɨ₅ jág₁ quióꞌ₅?
21 La₁ i₂lɨn₅₄ guëꞌ₂ juáꞌ₂:
―On₃juaꞌ₅₄ jág₁ quióꞌ₅ jan₂ i₂ꞌen₅₄ je₂naꞌ₅₄ të₂dsɨ́₅ në₅. ¿Lé₂ le₃jmo₃ je₂naꞌ₅₄ a₂jág₃ juɨ₁liaꞌ₂ dsa₂ ten₄?
Tsá₃ ca₂guen₃ dsa₂ judíos Jesús
22 Jmɨg₄ jaun₂, jme₁tionꞌ₅₄ dsa₂ juɨg₂ Jerusalén jmo₂₃ Jmɨg₄ quióꞌ₅ Si₂*. Jein₂ güɨ́g₂ jme₁lë́₄,
Jesús acusado de blasfemia (Juan 10.22-42)
23 jaun₂ jme₁i₂ŋɨ₅₄ Jesús i₁dsi₅ guáꞌ₅ templo ja₁lë́₄ corredor a₂chei₂ Quióꞌ₅ Salomón,
24 jaun₂ qui₂ca₂o₃lio₃ dsa₂ judíos quióꞌ₅, jaun₂ ca₂juáꞌ₂:
―¿ꞌA₂ conꞌ₂ jmóꞌ₂ ꞌne₂ ꞌag₃ guë́₄ caun₂-tɨn₃ dsɨ₅ jniaꞌ₅₄? Chi₂juaꞌ₂ dsónꞌ₂ lɨ́nꞌ₅ ꞌne₂ I₂rë₂ꞌɨ́n₁* quián₅ Diú₄, co₂ŋeiꞌ₅₄ juaꞌ₅₄ rë₂jiá₃ jág₁.
25 Jaun₂ ca₂ŋag₃ Jesús:
―Ma₂në₂juáꞌ₃ bá₄ jniá₂, la₁ tsá₃ ca₂rë₃ꞌénꞌ₂ guëꞌ₂ ꞌniaꞌ₂. Qui₂jángꞌ₅ bá₄ jág₁ dsau₅ o₄quió₃, léi₄ a₂jmo₅ jniá₂;
26 la₁ tsá₃ ꞌénꞌ₂ ꞌniaꞌ₂, ia₁ tsá₃ lɨ́nꞌ₅ ꞌniaꞌ₂ jáꞌ₂ chaꞌ₂ quiáng₃.
27 Neꞌ₅₄ bá₄ jáꞌ₂ chaꞌ₂ quiáng₃ jág₁ quió₃; i₂cuɨg₅ bá₄ ꞌéi₂ jniá₂, jaun₂ ja₂ꞌein₂₃ chi₁coꞌ₅₄ quió₃.
28 Cuë́₅ jniá₂ jme₂dsí₂ a₂le₃chain₂ co₂tan₅₄, jaun₂ liaꞌ₂ o₁lɨ́gꞌ₂ jmɨg₄ tsá₃ dsiáin₃, on₃ guë́₄ liaꞌ₂ ꞌi₁jan₂ tsá₃ lé₂ le₃jŋiáiꞌ₂ ꞌéi₂ o₄gu₃ jniá₂.
29 Ŋeꞌ₃ jniá₂, i₂ma₂cuag₃ ꞌéi₂, lɨ́n₅ i₂juɨnꞌ₂ guë́₄ liaꞌ₂ conꞌ₂ guë́₄ ca₂le₃jɨ́n₃; jaun₂ liaꞌ₂ ꞌi₁jan₂ tsá₃ lé₂ jŋiógꞌ₂ o₄gú₃ Ŋeꞌ₃.
30 Jniá₂ quianꞌ₅₄ Ŋeꞌ₃, ca₂ne₅₄ bá₄ lág₅ jniaꞌ₅₄.
―ꞌLióng₂ lɨn₃ léi₄ dse₃ ma₂ꞌë́₃ jniá₂ ꞌniaꞌ₂ të₂le₃ quianꞌ₅₄ juɨ₅bí₂ quióꞌ₅ Ŋeꞌ₃; ¿o₄quióꞌ₄ ꞌe₂ caun₂ a₂ma₂jmo₃ jniá₂ jaun₂, a₂qui₁jnauꞌ₅₄ ꞌniaꞌ₂ jniá₂ nɨ₁cang₁?
33 Jaun₂ ca₂ŋag₃ dsa₂ judíos:
―Tsá₃ o₄quióꞌ₄ léi₄ dse₃ qui₁jnaꞌ₅₄ jniaꞌ₅₄ ꞌne₂ nɨ₁cang₁; a₂jaun₂ bá₄ ia₁ a₂ꞌɨ́ngꞌ₅ ꞌlɨgꞌ₅₄ Diú₄, a₂jmoꞌ₂ ꞌne₂ a₂lɨ́ngꞌ₅ Diú₄, tonꞌ₂ jan₂ dsa₂ mɨ₂güɨ́g₃ bá₄ lɨ́ngꞌ₅.
34 Jaun₂ në́₃ ca₂juáꞌ₂ Jesús tsɨ́ꞌ₅ dsa₂ judíos:
―¿Tsa₁ chi₁ton₅ ne₄ Si₂ ꞌÉiꞌ₂ quiánꞌ₂ ꞌniaꞌ₂: “A₂ma₂juáꞌ₃ jniá₂, a₂lɨ́nꞌ₅ ꞌniaꞌ₂ diú₄”?c
35 Chi₂juaꞌ₂ ca₂të́ꞌ₃ “diú₄” dsa₂ i₂ca₂ŋɨ₂ jág₁ quióꞌ₅ Diú₄, (jaun₂ tsá₃ lé₂ juaꞌ₅₄ tsá₃ le₃ti₃ Si₂);
36 ꞌë₂ guë́₄ bá₄ ꞌéi₂ i₂ca₂jmo₃ Diú₄ rë₂tson₄, i₂ca₂chein₃ mɨ₂güɨ́g₃. ¿ꞌNiaꞌ₂ juɨgꞌ₂ ꞌɨ́ngꞌ₅ ꞌlɨgꞌ₅₄ Diú₄ ia₁ jniá₂ në₂juáꞌ₃ a₂lɨ́ng₅ Ja₁ŋiꞌ₅₄ Diú₄?
37 Chi₂juaꞌ₂ tsá₃ jmo₅ jniá₂ ta₁ quióꞌ₅ Ŋeꞌ₃, tsá₃ juɨ₁le₂ꞌénꞌ₂ ꞌniaꞌ₂ le₃quió₃ jniá₂.
38 La₁ chi₂juaꞌ₂ jmo₅ guëꞌ₂ jniá₂, juɨ₁ꞌa₂ guë́₃ la₂ tsá₃ ꞌénꞌ₂ ꞌniaꞌ₂ të₂le₃ quió₃ jniá₂, juɨ₁le₂ꞌénꞌ₂ bá₄ ꞌniaꞌ₂ të₂le₃ quióꞌ₅ ta₁ a₂jmo₅ jniá₂, ia₁jaun₂ le₃ŋiꞌ₅₄ bá₄, ia₁jaun₂ le₃ŋɨ́ꞌ₂ ꞌauꞌ₂ ꞌniaꞌ₂,d a₂ꞌen₅₄ Ŋeꞌ₃ ja₁cong₂, le₂jaun₂ guëꞌ₂ táng₃, a₂ꞌen₅₄ jniá₂ ja₁con₂ Ŋeꞌ₃.
39 Jaun₂ jme₁ꞌnio₃ táng₃ dsa₂ jme₁tsáunꞌ₂, la₁ ca₂lóin₂ bá₄ o₄gú₃ ꞌéi₂.
40 Jaun₂ në́₃, ŋó₃ táng₃ Jesús të₂le₃ quióng₄ Cuá₃ Jordán, jaun₂ ca₂jŋia₃ ja₁jaun₂ ja₁jme₁ꞌen₅₄ Juan₅₄ le₂jŋiá₅ choin₂₃ jmɨg₂ dsa₂.\f + \fr 40\ft lit. “tiáin₂ dsa₂ jmɨg₂”
41 Juɨn₅ lɨn₃ dsa₂ ca₂i₁len₅₄ i₁jag₅₄, qui₂ca₂juáꞌ₂:
―Të₃dsónꞌ₂ bá₄, o₁jŋiaꞌ₅₄ tsá₃ ꞌe₂ léi₄ juëꞌ₂ ca₂jmo₃ Juan₅₄, la₁ ca₂le₃jë́₃ ꞌe₂ a₂ca₂juáꞌ₂ a₂ꞌɨin₂₃ dsa₂ në₅, dsau₅ bá₄.
42 Ja₁jaun₂ ca₂rë₃ꞌén₂ juɨn₅ dsa₂ le₃quióꞌ₅ Jesús.