Yudabu Diosun jatu unanuma jiwemaxanikiaki, na janchadan
2
Na jaska ikunkainxanai Amozin bake Isaías nama keskawen Diosun jawen jancha xabakabi bebunkidi Judákidi inun jatun maewan Jerusalénkidi xabakabi unanmanikiaki.2 Janu badi jawen jenei ma kemaya
ja mati anu Dios kenwanti jiwe jayaken
Dios jakidi janchakin mestenwanxanikiki.
Ja mati binua anuxun jakidi pe shinankin mati tibi binua anu
nawa xukua betsa betsapa bexankanikiki.
3 Sión anu Jehován yusian taxni Jerusalén anu jawen jancha kainxanaiwen taea yudabu midimajaida janu jikitushitan yuikin:
“Jehován Mati Sión anu nun mapekenun bekanwen,
Jacobun mekenika Dios Jehován kenwanti jiwe anudan.
Jadixun jawen pe jiweti shinankidi nuku yusianbu
ja bai keska jawen yusian chibankin
tapin nun pepaxankanaii”, ika
bebidan bebidanxankanikiki.
4 Januxun nawa xukua tibi Jehován unanti wakubainxanikiki,
ja yudabu ichapajaidabu jawawenda ja imisbu
jadatuda pepa inun jadatubunda kaneaibu unantan jatu pewakinan.
Jatu jaska wa janua jabu maei betsaidan,
jatun nupe kenu chaipabu betsa wakin
jawen mai tsispubidanti waxankanikiki.
Ja inun, jatun chachiti betsa wakin texki machatu waxankanikiki.
Ja jaskaibutianan, ja yudabu ana jatun detenameti mabu betsawen
ana tsuabe detenameama ixankanikiki.
Ja inun, detenametikidi ana tsuan jatu yusianma ixanikiki.
5 Jacobun enabuun, ¡Jehován yusian pepa xaba keska chibanbaini
jawen jiwei taedibainankanwen!
***************