ISAÍAS
Judán enabu chakabujaida jiwenibukiaki, na janchadan
1
Jaska ikunkainxanai Amozin bake Isaías nama keskawen Diosun jawen jancha xabakabi bebunkidi unanmanikiaki, jawenabu Judákidi inun jatun maewan Jerusalénkidi jatun xanen ibujaidabu Ozías inun, Jotam inun, Ahaz inun, Ezequías Judá anu jabu xanen ibujaidakubainaibutianan.2 Nai inun maiin, matun Jehován matu yuiai ninkakanwen.
“Matun bakebu en jatu yumewabia jabu juni ewatan
jakia jabun ea danain eki sinatakanikiki.
3 Awa bene ana pubenmawakin jawen jubu mexteabu ana pubenma jatun ibu unanti wamamisbuki.
Ja inun, asnon ja jiwe anu janu ibuan uxanmis unandiamiski.
Jakia Israel enabu wakin en jatu katubiani ea unanbuma inun
ekidi daki shinan jayabumaki.”
4 Man junibu chakabujaidadan, ¡man peidakanwan!
Man yudabu atimapa chakabu bestiwen kemui man jiweadan,
matun ibubun chakabuwakubainibuwen taea
man jawen bakebun jabias chakabu chibainbu inun,
man jawen bababun jaska adiaibudan,
jaska wakin man ma Jehová jeneaki.
Israelin Dios mekenan medibi man jayabia putatan
man ma xununbainaki.
5 Matudan, ¿jaskai man danananain sinatai jenekatsi ikamamen?
jawen ea kupi shadawe, ikadan.
Matun yudadan, tsuan jani matu ana kushati jayamaki.
Matun buxka ma matu makush makush akabu man isin teneaii.
Jaskawen taea matun kushipa benui man ma babui keyuaki.
6 Matudan, matun buxka yuda jidabiyabis man jawa pe jayamaki.
Man dasibi dete kextuki,
matu kushakin matu pexa pexa akabudan.
Man jaskabiaken tsuan matu daunkin matu tsamianbumaki.
Man isin tenejaidai jawen man mainun
xeniwen tsuan matu dapuxabumadiki.
7 Matun mai pakea anu ana tsua janu jiwetima wakin ma chakabuwakubainimabuki.
Matun maewan tibi chiwen ma matu kuainmabuki.
Man uinbiaya matun bedubi matuki sinatamisbun
matun miban man banaima jabun pikanikiki.
Sodoma maewan Diosun yamawani keska
matun mai pakea dasibi matunadi ma jayamaki.
8 Sión maewan anudan, jawa betsa bashikuamajaidaki.
Jabu jenebainimabudan, uva bai anu pean xubu besti jayaki.
Badan betsa melón bexea bai namakis anudi pean xubu besti jayaki.
Ja maewan kexebauna jiweabudan, matuki sinataibu besti jayaki.
9 Jehová Dios dasibi binuatun jawa nukunabu eskadabes nuku jatube texewama inidan,
na jabiatianan, ja nawabu Sodoma inun Gomorra anu jiweabu
Diosun jatu yamawani keska nun ikeanaii.
Ana chintuntan Dios kayabi kenwantikiaki, na janchadan
10 Maewan Sodoma xanen ibu inibu keskabuun, Jehován jancha ninkakanwen.
Maewan Gomorra anua keskabuun, ninka pejaida wakanwen,
nukun Diosun matu yusiainan.
11 Jehová Diosun matu yuikin:
“¿Jaskakin jatida matun inabu ea inankin man ea menuxunmismen?
Matun chaxuwan bene inun ina awa bene babupan xeni man ea menu keyuxunmisdan,
ma en jabu jatsanki.
Jaskawen taexun ina awan jimi inun, chaxuwan benen jimi inun, cabra baken jimi
chanima ana jabu uinkatsi ikama en dananjaidaii.
12 Matubu ea bebun juxun man ea uinmaidan,
¿tsuan en jiwe anu matu bichia man ikai?
en jemaintinki meseama janu mapubaunkin
man ea ichakawaidan.
13 Matun inankuin en ana bechipaiamaki.
Ana jamen ea bexunyamakanwen.
Jabun kuin inabainaidan, en ana xetekin tenetidumajaidaki.
Matubu uxe bena taxniai tibitian inun,
juindukunti sábadotian matunabu ichawatan kein benimai man besimiski.
Jakia man jiwe chakamiswen taea ja besi man imis
bechipaiama en dananjaidaii.
14 Uxe bena taxniaitian inun jaska ichatan man pi beyuskunkainaidan,
man jaskabiakubainaiwen taea en matuki chikishchakayamaii.
Man jaskakin ea bika tenemai ¡en ana jaska tenetidumajaidaki!
15 Matun meken meshantan ebe janchakin man ea yukabiaya
en matukidi uinkatsi ikamajaidaki.
Man ea yuka chakayamabiaya
man meken jimi jaswen taexun en matu jawa ninkamaki.
16 ¡Matun meken mepanui pedikanwen!
¡En uiain anua jawada chakabu man amis jenedikanwen!
¡Man chakabuwai janun bextekedikanwen!
17 ¡Pepa besti atikidi tapindikanwen!
¡Tsua ana padantima menan pepati jawaida benakanwen!
¡Jatu ichakawaibu jatu medabewakanwen!
¡Yunuti janchawen taexun bake ibuuma
jatu ichakawama jatu medabewa bestikubainkanwen!
¡Beneyabiani ana beneumabu
jawen jiweawen bika teneai medabewai janchaxunkubainkanwen!” itan
18 Jehován ana matu yuiai ninkakanwen:
“Matube janchakin matun jiwea en matu pewakatsis ikai
nenu ea anu bekanwen.
Matun chakabu juni dama tenan jimi xana bidi ikai keskabiaken
matu chuka pewakin matun chakabu matu buaxunkin
juxupa keska en matu jenekatsis ikaii.
Man chakabumis atimapajaidabiaken
matu chuka pewakin matun chakabu matu buaxunkin
juxupa keska en matu jenekatsis ikaii.
19 Shinan betsatan man ea ninkakubainaibunan,
ja mai anua miban pepajaida beneai jaya man pikubainxanaii.
20 Jakia shinan betsakatsi ikama jen iyamai danananain sinatai man jeneamadan,
tsuan ana matu medabewama detenameaibu anua man mawaxanaii”,
ikin ibubis Jehován matu yuixuki.
Jehová Jerusalénwen nuikin ana jatu pewaxunxanikiaki, na janchadan
21 Jaskatan maewan ninkanikabia
¿jaskai shinan chakai min ma ainbu jininipa keskamen?
Uatian dasibi minabu pe jiwexun pe besti aki jiwekubainibuki.
Jakia eskatianan, man juni sinatapabu bestiki.
22 Min plata pei kadu keska ibiani
eskatian maei min chaka putamisbu keska bestiki.
Min uva vino pepa keska ibiani
ana jaskama chintuntan min unpax paisma keska bestiki.
23 Jaska inun, matun xanen ibubudan, sinatapa yumetsubun jaibuaibuki.
Ana pei mais jatu pewaxunkatsi ikama
jatu padankin jatun peiwen besti jatu ichakawakubainkanikiki.
daketapai ea inankuinwen ika ea ikin bena bestikubainkanikiki.
Bake ibuumabu jatu pe medabewati shinanbiai jabun jatu uins bestikanikiki.
Ja inun, ainbu beneyabiani beneumabukidi
jabun jatu medabewai pe janchaxunkatsi ikama jatuki pechiabuki.
24 Jaskawen taexun Jehová kushipa dasibi binuatun
jawen kushipawen Israel medabewamis
jawen jancha kushipawen jatu yuikin:
“¡Jatixun besti matun chakabu en tenetiduki!
Man jabu eki sinataibudan, matun chakabu tanatan
matube detenameai keskakin en matu kupixanaii.
25 Januxun ana matu kupi benawakin
sinatakauan matun chakabu atimapa tibi dasibi ichawatan
chaka putamisbu keska pewakin en kua keyukatsis ikaii.
26 Matun xanen ibu unanti wanikabu jabu dukun inibu keska
en ana matu katuxun yunuxanaii.
Matun juni unanepabu jabu dukun inibu keska
matu medabewakin ana en matu katuxun yunudiaxanaii.
Jaska tibi en ana matu waya chipu tsuabunda matu uintan yuikin:
‘Ja maewan Jerusalén anudan, ana tsua ichakanika jayamaki.
Ja maewan anuxun Dios besti chibankubainkanikiki’, ixankanikiki.
27 En ichakanika jayama inun en mekenan pepatun
man Sión anu jiweabu matun chakabu en matu putama
ea anu man ana chintunxanaii.
28 Jakia ichakanikai sinatamisbu inun chakabubu
jabu ea anu beabuma jatu kupikin en yamawaxanaii.
Jabun ea jenebaini mawaxankanikiki.
29 Man jabun ja ji itamama naman inun jua bana bechipaikin
januxun yushibu betsa betsapa man kenwankubainmisbudan,
jabudan, man dakejaidaxanaii.
30 Matudan, ja ji ewapa pei xanakaini jushinmis keska man ixanaii.
Ja inun, ja jua bana tsuan unpax tacha aisma keska man ixanaii.
31 Ja xanen ibu kushipai kenmisbudan,
ana jaskama betsai basi chushiai keska ixanikiki.
Jatun dayadan, chi pexe pexe iki jawaida nukamis keska ixanikiki.
Ja juni inun jawen daya jabia dabe janu dabes ketia ji ikai
tsuan jatu nukawatiduma ixankanikiki.”