Uva bai miyuidan, Judán enabu keskakiaki, na janchadan
5
En jaibu pepajaida en jakidi kantai ea ninkakanwen,jawen uva bai bechipaimiskidi en kantaxunaidan.
En jaibudan, uva bai jayaki.
Jawen bai anudan, mai pepajaida jayaki.
2 Pukinbainkin mai pewakin mishki putakin pewatan
jawen uva tacha pepa bitan banaimaki.
Januxun jawen bai nemaki januxun uinbaunti jiwe pishta keyatapa waimaki.
Ja inun, januxun tsinikin vino wanti pewaimaki.
En jaibun jaska watan jawen uva banaima
uva batapa manabiaya
jakia jawen uva bexeai anu uva bimi pe ikama
bimi bunkash besti jayashinaki.
3 Ja maewan Jerusalén anu man Judán enabu jiweabuun,
natian en matu yukai ea yuikanwen:
Ja uva bimi bunkashdan,
jadatu tsua chakabumenkainan, en uva baimenkain, en eamenkainan.
4 Ja en uva bai anudan, ana jawa jusitibiaken
¿en jaska wama ikimamen?
¿En jawa jakimatan akama ikimamen?
Uva batapa ikai en manabiaya
¿jaskai uva jaska ikama bunkash ishianmen?
5 Eskaki. Matu yuinun ea ninkakanwen,
en uva bai jaska wakatsi jakidi en shinainan.
En jawen jatu nemakin keneima daka pekati, jau chakabuwanunbunan.
En mishki kenebaunima daka en bedanti, jau jaki pai pai inunbunan.
6 Jaska watan jaki pechikainkin en jenebainkin
ana pewakin en ana jawa damexteama inun en ana basi mexatidumaki.
En jaska wabaina janu ni xuxu benei inun
jau mae muxa benechakayamaxanunwen.
Ja inun, jau ana jamamaki ui iyamanun
nai kuin en nemaxanaii.
7 Na uva baikidi miyuidan,
Jehová dasibi kushipajaidatun jabu bechipaikin
uva bai banayama keskadan,
Israel jiweabu jatun mai pakea inun
Judán enabun mai pakeaki.
Januxun jawen yunuti inun jawen nematiki mesekin jau chibankubainxanbun
Jehová Diosun jatu manabiaya
jabu anudan, sinatai inun detenameaibu besti jayaki.
Ja inun, jawen yunuti kushipa pepa katuaibu jatu manabia
jaska jiweama jatu nuitapawaibu
isin tenei biski ikaibu en ninka bestikubainaii.
***************