Jaska wakin jawen jancha yuixunika wakin Diosun Isaías katutan yununikiaki, na janchadan
6
Ja baditian Ozías xanen ibujaida mawaya Jehová Dios en uinmakidi matu yuinun ninkakanwen. Jawen tsauti keyatapajaida anu tsaua jawen Templo kexa tadi di akin keyubima tsaua en uinmaki. 2 Jawen nai tsuma betsabu serafine chi keska ja mamaki jayaki. Jabu tibidan, 6 jawen punyan peiyabuki. Jatun punyan peiya dabewen jatun besu bepuabuki. Januxun pei dabewendi jatun yuda bemakis bepuabuki. Janua pei dabewendi nuyabaunmisbuki. 3 Jabu yuinamei janchabaunkin yuikin:“Medibi pepa, pepajaida
Jehová kushipajaida nukun Xanen Ibujaidaki.
Jatunan, mai jidabi dasibi jawen kushipawen achi keyuaki.”
4 Janua jui kushipa kainkainkin Jehován kenwanti jiwe beputi taka taka aki inun jabia jiwe uke medandi chi kuin keska mataya 5 ean shinankin: “Eadan, ¡en peidawa! ¡En ma mawaii! Ibubis en beduwen en Xanen Ibujaida Jehová kushipajaida dasibi binua en uinxuki, en juni jawa pepama en kexawen chakabu en yuimis inun ja juni chakabubube en jatube jiweadan.”
6 Jaska uinkin en shinanbiaya jabiatiandi ja serafine chi ji ikai betsa en nia anu nuyakidan jawen mane tsumatiwen chi tsistu chi tapu anua tsumabidan 7 jawen en kexa ea metsamatan yuikin:
“Uinwen. Na chi tsistuwen min kexa en mia metsamaxudan,
jawen min chakabu en mia jayama waxunxuki.
Min chakabumis en mia buaxunxuki.”
8 Januxun en ninkaya Jehován jawen jui kainmakin ea yuikin:
“¿Tsuan nukun jancha nuku yuixuntidu tsua nichinpa?” ikaya
ean kemakin:
“Eadan, en nenuki.
¡Jabia menan ea nichindiwe!” en aka
9 jatun ea yuikin:
“Kaxun yudabu eska ea jatu yuixuntanwen:
‘En jancha ninkabiai jabun jawa ninka pewama ixankanikiki.
Uin bestixankanikiki, jabun jawa tapianbumadan.’
10 Jatu ninkamamakin jabun shinan jatu beputanwen.
Jatun pabinki inun jatun bedu bepukin jatu junebauntanwen.
Min jatu jaska wa
uinbiai inun ninkabiakin jawa ekidi tapianma ixankanikiki,
jau ea anu beaibu en jawa jatu xuxa wayamaxanunan”, ikaya
11 ean yukakin:
“Jehováan, jaskadan, ¿jatian kauan ixanimenkain?” akin en yuka
Jehován ea kemakin:
“Jaskaidan, na mae ewapabu ma yamawa
ana janu yuda jayama inun,
jatun jiwe medan tsua jiweama inun,
jatun bai tibi ana jawa miban jayamaken ixanikiki.
12 Ja inun, ea Jehován ja yudabu en jatu chai putaken
jatun mae anu jawa jayama xakaken
jatian ipakexanikiki.
13 Ja yudabu décima parte en jatu jeneima
jabudi en yamawaya jaskaitian ipakexanikiki.
Eska keskaidan, ji keyatapa dedabu
jawen budu besti jenemiski.
Jakia jawen budu anua jawen tuxpi betsa datakukidanmis keskai
enabu anua jawen baba betsa
medibi chakabuma taxnikaunxanikiki”, akin Jehován ea waimaki.