Ja dukun Diosun jancha Isaíasin Ahaz yuinikiaki, na janchadan
7
Jotamnen bake Ahaz, Ozíasin babadan, Judá anu jatun xanen ibuaya jabiatiandi Siria nawa xanen ibujaida jawen kena Resín jawen mae anu xanen ibuaya janua Israel xanen ibujaida Remalíasin bake Pécah jatu xanen ibuxunaya ja dabe dasitan Jerusalén jatu detetan mebinun ika ibiaibun jakia jaska waxun atidubuma inibukiaki. 2 Jaskaibutian tsuanda xanen ibujaida Ahaz inun jawenabu anu jatu banabimakin: “Siria nawabu Efraín enabube dasitan matuki yubakakanikiaki”, jatu wa janua Ahaz inun jawenabun jaska ninkatan datebauni juinti bene bene iki ji xukua niwen jatu bubi bubi amis keskaibun3 januxun Jehován Isaías yuikin: “Ja tadi januxun patsamisbun basi bai anu ja baiwen katanwen. Kai paxku debu anu xantu wanibu anu ja dexun anu min juni bake Sear-iasubbe jikikain xanen ibu Ahaz jadi uin ka jaki nukutan 4 eska yuitanwen:
Siria xanen ibu Resín jawenabube inun Remalíasin bake
matuki sinatajaidai chi tsistu dekenbia
ma nukai keskabuki.
Jaskawen taea mesei jatuwen dateama
mimebi pe mekewe.
5 Siria nawa inun Efraínen enabu inun Remalíasin bake xanen ibujaida
jabun matu chakabuwanun ika yubakakanikiki.
Jabu janchai:
6 ‘Judá mai pakea anu jikibainan,
jatu datetan nun jatu maemadan, nukun xanen ibu wakinan,
Tabeelin juni bake ananxankanwen’, ibiaibun
7 jakia Jehován jabukidi yuikin:
‘¡Tsuan taska jaska watidumajaidaki!
8-9 Siria mai pakea maewan januxun xanen ibujaida jiwexun yunumisdan, Damascoki.
Resínan, Damasco xanen ibujaidaki.
Jamen Efraín mae pakea maewan januxun xanen ibujaida jiwexun yunumisdan, Samariaki.
Remalíasin juni bake xanen ibujaidai Samaria anu jiweaki.
Jaskabiakubainaibun 75 año keyudiamatian
Efraín maewan yamaxanikiki.
Jamen matudi man Dioskidi shinankin pe mestenwanmadan,
matudi jabiaskadiai mesteanma man keyuxanaii’, matu waikiki. Atanwen.”
Emanuel kainxanaikidi Isaíasin ana Diosun jancha Ahaz yuinikiaki, na janchadan
10 Ahaziin, Jehová Diosun mia ana yuikiki. Ninkawe: 11 “Min Dios Jehován jau jaska tsuan atiduma mia axunun jawen unanmati jawada yukawe, na mai bemakia kasmai, mai uke medanjaida mai medanua kasmai, manaundijaida nai anuadan”, aka
12 Ahazin Isaías ninkatan kemakin: “Ean en jaska watidumajaidaki, en xanen ibu Jehová unanti wakin jawen unanmati yukakinan”, ikaya
13 januxun Isaíasin ana yuikin:
“David xanen ibujaidani anua jawen bababuun, ea ninkakanwen, matu yuinunan:
En junin mia yunubia danankin min ea bika tenemaii.
Jakia en Dios ana dananjaidakin en Dios man bika tenemadiaii.
14 Min jaska shinanbiaya Jehová kayabitun
jawen unanmati jatun matu uinmaxanikiki.
Chipash tsuan chutadiama anua juni bake nanetan kainxanikiki.
Ibuan jawen kena kenakinan, Emanuel waxanikiki.
15 Ja juni bake kainmaxunan,
bakeishtatun awa chuchu tanki inun buna bata pikubainxanikiki.
16 Jawa chakabu inun jawa pepa unandiama jaskaitian ja mai pakea anuxun
xanen ibujaida dabetun mia dateaibudan,
jatun mai pakea jenebainabu ana tsua jayama ixanikiki.
17 Jehován mia anu chakabujaida jatianda yunuxanikiki,
min mae anu jiweabu inun minabu min jiwe jawendua anu jiweabu anu kainmakinan.
Efraín inun Judá man paxkanitian jaska man jiweisma chakabujaida matu anu taxniai man uinxanaii.
Na jaska chanidan, Asiria xanen ibujaidatun jatu axanaikidi yuinikiaki.
18 Egipto jenewan kexa ukedi chai jiwebaunabu
Jehován jatu yunua jadia ja yudabu ja baditian chupe beasxankanikiki.
Asiria anu jiweabudi xada beasdiaxankanikiki.
19 Jabu ichatan jawaidabidan janu junei mawa xankin tibi junei inun, tanpe tibi anu junediai inun, ni muxaya tibi anudi junei inun,
chacha tsaua ina awan amis anu janu junexankanikiki.
20 Ja jaskaibutian Asiria xanen ibujaida Jene Éufrates ukedi chaijaidakea
Jehován jatu yunuyutan medabewakin
Jehován nupe kenu kexni ati keskakidan
Asiria xanen ibujaidatun Israelin enabun bu inun, jatun kexni inun,
jatun bikedan dani jatu beden akin jatu ichakawaxanikiki.”
21 Ja jatu jaska waibutian tsuada jatun mai pakea yamawaibutian jabu paxaimaxun jatun mae anuxun jatun ina awa bake yuxan inun chaxuwan bake yuxan dabe yumewatan 22 jatun chuchu paipaima tsinikin jamen atan chuchu tanki pikin buna bata akubainxankanikiki.
23 Ja jatu jaska waibutiandi ja dukun uva bai 1,000 taxku banabu jawen kadu 1,000 plata pei jexe ibiamis maei muxa besti benexanikiki. 24 Mai pakea jidabi anu jadi kaidan, ja muxa beneyamawen taea piaya kaxun yuinaka tsakati besti ixanikiki. 25 Mati anu dayakin mai bedex atiwen udubiapaunibu maei muxa midima beneyamaken ana jadi ka tsua dayatidumaken inabu awa inun chaxuwanen piti besti basi benexanikiki.