Jawenabu jawen jatu unantidubukidi Isaíasin jawen bake kenanikiaki, na janchadan
8
Jehován ea yuikin: “Ji bexa tude sapa bitan jaki min jancha kuinwen eska kenewe: ‘Maher-salal-hasbaz’, wakinan. 2 Jaska min wai jabun uintan chanitidubu juni dabe chanichakaisma Diosbe jawenabu janchaxunika Urías inun betsa Jeberequíasin juni bake Zacarías jau unanun jatu bebunxun kenewe”, ea wa3 chipu en ain Diosun jancha yuixunikabe en jabe chutanameima ja tuyatan juni bake kainiki. Januxun Jehován ea yuikin: “Min bake kenakinan, ‘Maher-salal-hasbaz’, waxanwen, nukun janchawen yuiadan, ‘Jawaidakidan achixun yamawaki’, akinan. 4 Min bake kainma jawa jancha pesei kenannamei: ‘Papaii’, iki ‘Mamaiin’, idiamaken Damasco inun Samaria anu jiweabu Asiria nawabun jatu achixun yamawatan jatun mabu jawendua jatun xanen ibun jiwe ewapa anu buxankanikiki”, ea watan 5 Diosun ana ea yuikin:
6 “Asiria xanen ibu Resín inun Remalíasin baken jatu datekin
achikatsis ikaibuwen taea Judán enabu jatuki dateaibun
Siloé jene pes daka unanxubida jabamis
Judán enabun ichakawakanikiki.
7 Jaskawen taexun Jene Éufrates Jehován mata wakin
jatu achimaxanikiki.
Jaska yuiadan, Asiria xanen ibun jawen kushipawen jatu achi keyuxanikiki.
Jawen paxku texexa tibiwen jene jikibainkin
dasibi kenku mataismabia achikin keyukin
8 Judán mai pakea jadi binubain
jadi kesuismabia kenku tsakaxanikiki.
Isa jawen pei pesha dakamis keskakin,
Emanueliin, mai jidabi min achi keyuxanaii.
9 Nawa xukua tibibuun, matunabube ichatan jatu detexankanwen.
Mai pakea chai tibi anu jiweabuun, man eskaxanai ninkakanwen.
Detenamenun ixun matun pia man bibiabauna
chanima man datejaidaxanaii.
10 Man nukukidi yubakabia man akama ixanaii.
Jaska bechipaikin man katuxun yuibia man nuku akama idiaxanaii,
Dios nukube nashui itan nuku mekeawen taeadan.”
Jehováki besti mesei jaki datetikiaki, na janchadan
11 Jehován ea tsuma mestenwantan ja juni chakabubun shinan en jatu chibanyamanun bebunkidi ea unanmakin nemakin ea yuikin: 12 “Jabu matukidi yubakaibun jatubebis yubakayamakanwen. Jabun matu datekin mesewabiaibun jatuwen dateyamakanwen. 13 Jehová Diosun dasibi binua medibi pepa jatun nema keyutidu bestiki datekanwen. Ja bebunua besti man jaki datetiduki. 14 Eadan, matuwen taea en eskaki. En matun ichati jiwe medibi keskaki. Jakia Israelin bakebun xanen ibu dabe en mishki daka jaki juti itidubu keskaki. Eki juti ika keskatan ea danain ja xanen ibu dabe jatunabube di ixankanikiki. Jerusalén medan jiweabudan, en bidun keska anu jikitan jabudi jadakidi kaintima nuitapaxankanikiki. 15 Ichapajaida eki juti ixankanikiki. Eki juti itan di iki mawaxankanikiki. Jabudan, bidun medan jikiaibu jatu bepuabu jadakidi kaintidubuma ixankanikiki”, itan,
Jawen tsumabu bebunkidi jaskaxanaibu Isaías jatuki chaninikiaki, na janchadan
16 ana Jehován ea yuikin:
“Na en janchadan, adukin pewawe.
Jaska en mia yusinkin unanmaxudan,
mestenwantan miki chiti ikabu jatu yusinkubainwen”, ea waya
17 Jehován jawen jancha Jacobun enabukidi junebiaya
eanan, ikunwain en jaki chiti ikaii.
18 Jehován jawen bake betsabu ea anu inankin yunua jabubetan
Israelin enabu Jehován jaska bechipaiai
jawen kushipa unanmakin xabakabi wati nun ikunkainaii.
Mati keyatapa Sión anu jiwexun
Jehová dasibi kushipa binuatun nuku yunua
nun akai nun jawena nuku uinxankanikiki.
19 Jakia juni betsabun matu yuikin:
“Mawabun yushinbe janchamisbu yukakanwen.
Ja juni mukayabu jatun yushinbe janchai xei ikawen
tsuan ninkatidumawen janchamisbuki.
Yudabu jatun yushibube janchakinan,
¿mawabun unanepa jancha yukatimamen, jiweabunan,
20 jaskaxanaibu tapinkinan?
Jaska jakidi janchakin yukabiamisbudan,
jabun yuiaidan, ¡patapa unainsmapabuki!
21 Ja juni shinan pewama buni paepai
buni bestiwen nui sinatai mapubaunxankanikiki.
Jaskakin jatun xanen ibujaida inun jatun yushibu yupui
jatuki jancha chakabuxankanikiki.
Manaundi nai teskanxun uintan
22 januxun chipu main tinintan
jawa pepaki nukuama nuitapajaidai inun
meshu medan bika besti tenei
dasibi meshun besti achia uinxankanikiki.
Jabun jatu achia jadakidi shinanbaini paxatidubuma ixankanikiki.”