Dios xanen ibujaidatun bake jawen unanuma jiweti kainxanikiaki, na janchadan
9
Galilea mai pakea anu Zabulón maewan inun Neftalín maewan anu ja dapi nawabun Dios ikunwanbuma jiweabu, Jene Jordán kexa ukedi inun Ianenwan Mediterráneo kexa betsaudi nawabu jiweabu Diosun ja dukun jatu ichakawabiapaunixun ana betsatian Dios jabuwen nuikin jatu duajaidawaxanikiki.2 Ja yudabu meshu medan punu nuka mapua keskabu
en jatu medabewaya bin ewapa chaxa taxnia
ea jawa unanbuma ja nawabu meshu medan jiwea keskabun ja bin uinxankanikiki.
3 Jehováan, jawen benimati ewapa min ma yunuaki,
nun jawen benimajaidaidan.
Nukun yunu tseka keyutan nun benimamisbu keskai,
dasibi mia bebunua benimachakayamaxankanikiki.
Tsuabunda jawada mabu jawendua pepa jatu paxkaxunabu bi benimai keskai
mia bebunua benimaxankanikiki.
4 Tsuanda jatu tsuma waxun jatu bika tenemaibu inun,
bika betsa betsapa jabun meaibu inun,
xanen ibubun jatu ichakawamisbudan,
jabudan, min jatu nemakin putamaxanaii,
ja Madián nawabu min jatu yamawani keska wakinan.
5 Soldadobu detenamei jatun bichi tae keyatapa sawea
badux badux ibainmisbu inun,
jatun tadi jimi jas mapumisbu jabudan,
chiwen min jatu yamawakin kuaxanaii.
6 Jamen betsadan,
Diosun jawen kushipawen dasibi betsa wakin
bakeishta nuku inanxanikiki.
Ja bake nuku anu yunua kainxanikiki.
Jatun kushipa bitan xanen ibujaidaxanikiki.
Jawen kena tibi inankinan, eska waxanikiki:
Jawen yubakani nun jaskaxanai unanmanika pejaidaki.
Dios kushipajaida tsuan binutidumaki.
Epa jiweibi jiweaki.
Jawen taea Diosbe unanuma jiwetiki.
7 Ja yumetan tsauidan,
David xanen ibuni anu tsauxanikiki.
Xanen ibujaidakin jawen kushipawen
mai jidabi anu xanen ibukin tsuma keyubaunxanikiki.
Jawen unanuma jiweaibu keyuama inun
jawen yunuti kushipa keyuama ipakexanikiki.
Ja xanen ibujaidaidan, mesten tsuan maewakin
tsekatiduma jabias ipakexanikiki.
Dios kushipajaida dasibi binua jawen nui pae
tsuan nuka watidumatun nuku jaska waxunxanikiki.
***************