Jesén baba betsa jawen yunuti kushipa pepawen xanen ibujaidakin jatu unanuma jiwemaxanikiaki, na janchadan
11
Jesén enabu Asiria nawabun jatu ichakawakinan,ji dedakin jatu jawen budu keska besti wanibuki.
Jakia ja ji budu anua ana takuxanikiki.
Jawen tacha anua jawen tapun betsa jukunmis keskai
juni betsa ana kainxanikiki.
2 Diosun Yushin kushipa jabe ketaxametan putama eska wamakubainxanikiki.
Ja juni Diosun Yushinin medabewa jadatu bai pepa inun
jadatu bai chakabu unanmatidu wakin inun,
jawen unanepati inankin inun,
jawen shinan bebunkidi pewanika inankin inun,
kushipa inankin inun,
Jehová Dioski mesetidubu unanmanika ixanikiki.
3 Jatun jatu unanti wakinan,
bemakis jawen beduwen besti uintan jatu unanti wama inun,
jaska betsabun yui kakaibu ninka bestitan
jatu unanti watiduma ixanikiki.
4 Jakia nuitapai babubu jatu medabewakinan,
yunuti pepa kushipawen jatu unanti wakin
jaska betsabun jatu ichakawaibu jatu nemaxunkin
ja nuitapaibu jatun mai pakea anua jatu pewaxunxanikiki.
Jawen jancha mestenti kushipa keskawen
mai anuxun jabun jatu detenamemaibu jatu kupixanikiki.
Jawen jancha kushipawen juni chakabubu jatu tenanxanikiki.
5 Tadi saweaki jawen nanexeketi sawekin mestenwan keska wakin
yunuti kushipa pepa inun jancha chanima sawekin akawaxanikiki.
6 Janua Jesén baba ma pe xanen ibuaya
kaman inu chaxuwan bakebe dasitan menamei unanuma jiwexankanikiki.
Ja inun, inu keneya daka anu cabra bake jabe beua juindukunxanikiki.
Ja inun, ina awa bake león inu dapikea yumexanikiki.
Ja inun, dasibi yuinaka mese puben inun pubenma
bakeishtan jatu mekekin nimakubainxanikiki.
7 Ina awa inun oso ana sinatai pubeanma ibunamexankanikiki.
Jatun bake jatu dapi mapua juindukunxankanikiki.
León inawanan, basi besti pixanikiki,
ina awan pimis keska wakinan.
8 Bakeishtan chuchu jenediama dunu paepajaida cobran kini dapikea beyusxanikiki,
ana menameamawen taeadan.
Jawa dateama bakeishtan dama chuchu jeneatun cobra daka kini medan jawen meken mistuxanikiki.
9 Ianenwan matajaidamis keskai
mai pakea jidabi anu dasibibu en unanepa jayatan
ea en Jehová Dios unanxanaibuwen taea
en mati medibi anua
ana jawa sinatai ichakanikama ixankanikiki.
10 Ja jaskaibutian ja Jesén tacha ja jawen tapun betsa
benetan yudabu xukua tibibu jatun Dios jatu unanmati ixanikiki.
Jabun jatun xanen ibu benakinan,
jawen mae pejaida chaxakapaki nukunun ixun benabaunxankanikiki.
***************