Samaria mai pakea jaskaxanai bebunkidi jatuki chaninikiaki, na janchadan
28
Samaria anu jiweabuun, ¡man peidawa!Efraínen maewan Samaria jawen maiti jawendua keska wakin
jawen kenmisbudan, jadan, jabu paenmisbun maeki.
Jua jawendua keska ibiaima ana jawenduama utsitan chapuai keska bestiki.
Mati mapanpa anuxun jatun yunu bai tenanman mai pepa uinmisbu
janu jiweabu vinowen kemui jaki nexenibun akin jeneisbumaki.
2 Jehová Diosun juni kushipa ma jatuki tanaxun pewani chipu Samaria anu yunuxanikiki.
Jawen kushipadan, badux ui mesejaida nidi ikai keskaki.
Niwe kushipajaida bekin dasibi chakabuwamis keskaki.
Ui tueketan jeneisma keskaki.
Jene bai mata chakayamakin dasibi achibainmis keskaki.
Jawen mekenen mai chakabuwakin bedankin
3 Efraínen mae jawen maiti jawendua keska anua paein jawen kenmisbudan,
jawen taewen pema pema akin yamawaxanikiki.
4 Ja jua jawenduabiaima ma utsiaya manananxun tenanman uinkin
mai pepa anua yunu banaimabu keskabia jawaida keyuxankanikiki,
ja higo bimi janu ikaitian ja dukun jushian uinkin tsekaxun pimisbu keskaidan.
5 Ja jaskaitianan, Dios dasibi binua xanen ibui
maiti pepa chaxakapa jawendua sawea keska ixanikiki.
Ja jawen mae texenibudan, jabudan,
Diosun kushipawen jawenduai pepajaidaxankanikiki.
6 Jabun unanti wanikabu tsauxun
jatu unanti waibu Diosun jatu medabewakinan,
jawen yunuti kushipa pepa jatu inanxanikiki.
Jatuki sinatai beaibu jau nemanunbun
detenamenikabun jabun mae mekeabu
jatu kushipa waxanikiki.
Bebunkidi Jerusalénkidi Dios yubakani xabakabi wakatsi jatu yuinikiaki, na janchadan
7 Betsabu ikidan, vinowen paean
ni peama kexka kexka iki
janua shia paepa aki
jawendi paenjaidai bedame bedame iki di imisbuki.
Jabu jawenabu Diosbe janchaxunikabu inun
Diosun jancha yuixunikabun ja shia paepa akawen taea
ni peama kexka kexka iki inun
vino aki paeanwen taea shinan pe watidubumaki.
Nama keskakin jabun Diosun yusian uinkin ninkabiatan
pe shinantidubumaki.
Paentan jatu unanti wakin jadatu pe inun
jadatu chakabumen, ixun jatu unantidubumaki.
8 Tapu tibikia paentan jaki jananbu janan matai keyuawen taea
jani xunpin betsa pisi mayama jayamaki.
9 Patapakidan jabu eanu bea janchakin yuikin:
“Nedi taxnikidan nuku yusinwen.
Jaska Diosun mia uinmai nuku yusinwen.
Nukubudan, nun bakeishta keskamenkainan,
10 dama jancha pesakin yuiai keskabudan:
‘ba, be, bi, bo, bu’ ”, nun ikaii,
jancha unanumas yuidan.
11 Jakia jaskabiai ja Samaria anuabun
en yusian pe ninkabumaken
nawabun jancha ninkatidubumawen jabu Diosun achixanikiki,
jaska jancha ninkabumawen jatu bika tenemakin
Diosun jatu jancha watiduma keska wakinan.
12 Bebunkidi Jehován jatu yuikin:
“Nenu nishma daka anua man juindukuntiduki.
Nenu man punu nukabu janu bashikutan
man juindukuin dakatidu jayaki.”
En jatu wabia jabun ea ninkabumaki.
13 Jaskawen taexun Jehová Diosun jatu jancha wakin
bakeishta tanainbu jatu ana yusinxanikiki,
jabun dama tapinkin uiainbu keskadan.
Jaskawen taea jabudan, ni peama pechiudi mananska tin ika keskabu ixankanikiki.
Betsabu deteaibun, betsabu bidun medan jikitan
jani paxatiduma keskabu ixankanikiki.
14 Xanen ibukin jancha atimapawen yuikin
man Jerusalén mae yunumisbuun,
Jehová Diosun jancha ninkakanwen.
15 Matun yuikin:
“Jau isin chakabu jua nukuki nukuyamaxanun ika
ja mawa mekenikabe nun ma yubakaimaki.
Mawa bumisbu anu nun ma jabe yubakaimaki.
Nun jawen idui meketidu man benaidan,
chani besti nun benaii.
Junenun ika chaniwen besti nun padananankunkainaii”, ikaibun
16 jaskaibuwen taexun Jehován jatu yuikin:
“Mishki kadujaida en katuni
ja mishki uinbain jakimatima jaki tsamabaunkin mestenwanti
Sión anu en taxnimaxanaii.
Tsuanda ja mishki bechipaikin katutan jawen datetidubumaki,
ma jaki chiti ikadan.
17 Ja jiwe benikinan, jawen tanati mane xankama dispi deduntanxun
tana pewamisbu keska jawen yunuti kushipa kanetiduma ixanikiki.
Jawen tapa yushtuma keska wakin
jawen jancha kanetidumawen en axanaii”, jatu wanikiaki.
Chanichakakin ja june iduti man benamisdan,
badux ui ikin yamawaxanikiki.
Jene bai matabidankin janu man junemisbu matu betsekanbainxanikiki.
***************