Egipto medabe yukabiai jamenxankanikiaki, na janchadan
30
Diosun jawen jancha mestenwankin yuikin:“En yusian ninkaisbuman bakebuun, ¡man peidaxankanwan!
Ebe janchai yubakamabia man ibubis yubakaii.
Jaska ean daya shinankin en matu yunuamabia
ibubis matumebi daya tibi akatsis ikin man katumisbuki.
Jaska shinankin man ichawamisdan,
chakabu ichapa manchian keska wakin man ewawaii.
2 Bebunkidi ebe janchakin ea yukama jawa shinanma
jawaida Egipto anuabu medabe benai jadi iduti keska
xanen ibujaida Faraón anu man benamiski,
Egipto anu jadi idui utati keska anu janu idunun ikadan.
3 Faraónen kushipa iduti man benabiai ka
iduti jayamaken jawen taea man dake bestixankanaii.
Jawen janu idui utati man benabiai ka
matu axuanmawen taea man babukidanxanaii.
4 Egipto maewan dabe Soan inun Hanés anu
jadi matun xanen ibu janchaxunikabu man yunubia
5 ja nawabun jawa matu medabewama
jamen matun xanen ibubu bushianbu dakebidanxankanikiki.
Jawa medabe inun benima matu bexuanma
chakabu inun dake pae matu bexunxankanikiki.”
6 Egipto nawabun jau jatu medabewai benunbun,
tsuabunda jatu benai buidan, eskaxankanikiki.
Jatun burro inun jatun camello kamaki
jatun mabu inun jatun inankuin pepa peumatan
ja mai pakea Egipto mae anu jamen buxunxankanikiki,
eska anu kapukebainkinan,
janu tsua jiweama Négueb anu
yuinaka mese puben ichapa jiweabu anu
inu betsa león ji ji ikai inun, dunu paepa piananbu inun,
yuinaka xeanan nuyabaunaibu anu nashui ikainkinan.
7 Egipto ana kushipa jayama inun
jawa jatu medabewatidumawen taexun
jawen kena betsa dabikin:
“Yuinaka mese atimapa jawauma ji ji ikai keskaki”, akinan.
8 Isaíasiin, uinwen. Na jabiatian ji bexa sapa bixun jaki kenediwe.
Eska netankin kenebainkinan,
ja kene chanipaketi jawa tuxkutima inunbadiai wawe.
9 Ja yuda jiweabu yusin ninkaisma sinatapabu inun
Diosun yusian chiban pewaisma unainsmapabuki,
jabun Diosun yusian jawa ninkakatsi isbumadan.
10 Ja jabun jaskaxanai bebunkidi unanmisbu jabiabundi jatu yuikin:
“Nama keskakin ana uinyamakanwen”, ikin
januxun Diosun jancha yuixunikabudi yuikin:
“Jaska chanima man uiain ixanai nukuki chaniyamakanwen.
Jawada nun ikai jawen nuku dake wama nuku jancha pe besti wakanwen.
Nun kanebiaya jaskaida nuku nemayamakanwen.
11 Nenu ana mapuama nuku dapaxkadikanwen,
Diosun bai kayabi mextebainidan.
Israelin enabun Dios medibi bebun ana nuku nichinyamakanwen”, ikaibun
12 jaskaibuwen taexun Israelin enabun Dios medibitun jatu yuikin:
“Bebunkidi jaska en matu yuibia man ja danaiin.
Detenamei itimaskai inun chakabuwabauni
jaki besti chiti ikin jatun matu medabewatidu keska man ja benaii.
13 Jaskawen taea ja chakabu tibi man akaidan,
jawen kupiti man biaidan, matunaki.
Mae mishkiwen kenebaunibu keyatapabia
chakabui taei tuax ikunkaini jakidi man shinanmaken
pikutan jawaida di iki bedanmetidu keska man jaska keskaki.
14 Mai shumuwan chakabui pusi tudeke tudeke ichakayama
jawa jawen tude betsa bitan chi deken jawen beatidubuma inun
tude betsawen unpax kini anua man unpax bitidubuma keska
man jaska keskai yamaxanaii.”
15 Ja Israelin enabun Dios medibitun jatu yuikin:
“Eanu chintuntan unanuma man bashikuaidan,
man piskuxanaii.
Ja unanuma man jawen jiwei jawa dateama man jaki chiti ikaidan,
janu man jawen kushipaii”, en matu wabia
jakia matubu man jaskakatsi ikamaki.
16 Jaska shinanma janchakin yuikin:
“Nenua en jaskakatsi ikamaki.
Caballoki katsaumetan en paxai kaii”, man ikaya
peki. Chanima jaskai man paxatidubuki.
Ana matun yuikin:
“Caballon tadanbaintiki tsautan nun kushimabainxanaii”, man ikaya
peki. Chanima man kushikaini paxayadan, jabudi kushibainkin matu chibanxankanikiki.
17 Juni bestichai matuki tanakidan matu mese wabidana
1,000 yudabu jawen datei man paxaxanaii.
5 junibu matuki tanadiakidan matu mese wabidanabu
jatuwen datei dasibibu man paxadiaxanaii.
Matu jaska wabu eskadabesjaida man texexankanaii,
mati keyatapa binu keyua mamaki ji bestichai nia keskai inun
jawen unanmati mati pishta anu tadi bandera puntea niwen pea pea amis keskaidan.
18 Man jaskabiaxanaya Jehová Diosun matu manaikiki,
jawen nui pae matu uinmakatsidan.
Jaska matuwen nuichakayamai matu uinmakatsi ikikiki,
ja Dios yunuti kushipa kanetiduma jayawen taeadan.
Jehová dasibi tsuabunda man manakaibuwen taea
jawen benimakanikiki.
***************