Dios yukama Egipto anua medabe yuka ikaibu Diosun bechipaiama inikiaki, na janchadan
31
Tsuabunda man Egipto anu medabe yukai man buaibudan,¡man peidaxankanwan!
Caballo ichapa man jayatidu inun,
jaki tadanbainti ichapa man jayatidu inun,
caballoki katsaumebainmisbu midima man jayawen taea
ana tsuki dateama jaki chiti itan
shinankin man ikunwantidubia jadan, jamenki,
Israelin Dios medibi anu chintunkin
man shinan betsa wai uinmakin benakatsi ikamadan.
2 Jakia ja Diosdan, unanepajaidaki.
Jamapai tibi atiduki.
Chakabu watidu unainkiki.
Jawada yuitan maewakin ana shinan betsa waismaki.
Juni chakabubu jatuki sinatakin jatu kupixanikiki.
Jabun chakabuwaibu tsuanda jatu medabewamisbu jatuki sinatadiamiski.
3 Egipto nawabudan, junibu bestiki, diosmadan.
Jatun caballodan, nami inun xau besti jayaki, yushinmadan.
Diosun jawen kushipa yunukin jatu kupiaitian ikidan, eskaxankanikiki.
Egipto nawabun jawen kushipawen mekenikabu inun
Israelin enabu jatuki iduaibu
ja dabe mawai dasibi janus di ixankanikiki, benui keyuidan.
4 Jehová Diosun ea yuikin:
“Ea Jehová kushipajaida dasibi binu keyua
Mati Sión anua enabu Israelbu
jatu medabewai jui en eskakidanxanaii.
Inu betsa león inawan chaxuwan bitan piaya
chaxuwan mekenikabun león datekin kushimanun itan
janus ichatan sai sai abiabu león jawa dateama imis keskai
eadi jaska keskadiai en juxanaii.
5 Isapan jawen bake mekea ja mamaki nuyakaunmiski.
Jaska keskadiai Jehová Dios dasibi binua Jerusalén mekei en jaskaxanaii.
Eadan, en jawen mekenanki.
En jawen piskumanikaki.
En jawen mepamanikaki.
Nuitapaibu en jatun paxawanikaki”, ea wakubainikiki.
6 Israelin enabuun, man jabun Dios bedabinwankin man danan paepawabiaidan,
shinan betsatan Dios anu bedikanwen.
7 Oro mane inun plata mane matun mekenen dami watan kenwain man chakabumisdan,
jawatianda matu dasibibun matun dami danankin man putaya
8 man jaska waitian Asiria nawabu machatu chaipawen debuxankanikiki.
Jabu jaskaidan, junibun kushipawen ikama ixanikiki.
Detenameaibutian ja nawabu jatunabu paxaxankanikiki.
Detenamenika betsabun ja bedunan betsabu detenamenikabu
jatu tsuma wakin esclavo waxankanikiki.
9 Jatu jaska waibun jatun xanen ibujaida date paepai kainkaini kushikainxanikiki.
Jawen detenamenika xanen ibu bexmasbun jatun unanti tadi bandera pusteya
pekama jaki pechitan kushidiabainxankanikiki.
Jerusalén anuxun chiwen jatu kupikin kuati Dios jayaki,
janu jaki sinataibu januxun jatu kupitidan.
Jaska janchakin Jehován mestenwainmaki.