Xanen ibujaida benan yunuti kushipa pepawen jatu mekexanikiaki, na janchadan
32
Uatian xanen ibujaida bena xanen ibuidan,yunua pepawen yunuxanikiki.
Jawen xanen ibu bexmasbu xanen ibuxunkinan,
yunuti kushipa pepawendi ixankanikiki.
2 Jabu tibidan, eskabu ixankanikiki.
Niwe beaya janu idutidubu keska inun,
ui niweya beaya janu paxatidubu keska inun,
mai tsusin anu mibankin bai tibi waimabu anu
janu jene jabai keska inun,
janu jawa jayama anu badin kuajaidai anu
mishkipanwan dakaxun mai utawamis keskabu ixankanikiki.
3 Jabun bedudan, pejaida jatu uinun ika bedu jan ikabu inun
ninka pewanun ika pawexpai keyutan jatu ninkakatsis ixankanikiki.
4 Jatun akadan, shinantans akin kaneama
jakia bebunkidi shinan pewatan akubainxankanikiki.
Jabun jamapai jatu yuikinan,
xabakabijaida jatu unanmaxankanikiki.
5 Ja xanen ibubu xanen ibuaibun yudabu atimapai daya peisma
jatu kenwanbiamisbu ana jatukidi pe janchama ixankanikiki.
Jamen uinbain kemutapa tsaubiamisken ana yudabun duawakin:
“Min nukun xanen ibu kushipaki”, akin ana yuiama ixankanikiki.
6 Yudabu atimapai daya peisma jawen beyawen taea
jaska janchamis jeneama inun,
jaska chakabu shinain keska yubakatan jeneama akubainmisbuki.
Chakabu besti kainmatan jiwenun ika jamapai atimapati benakubaini
Jehová Dioskidi jancha chakabu yui chanichakamisbuki.
Jabunan, bunibidanaibu jawa jatu inanma inun
unpax manubidanaibu jatu amakin pewatan jatu nichinsbumaki,
jatu nuitapawakinan.
7 Ja yudabu atimapai daya peisbuma machupakin
jatu padan bestikin jawadawen kemuti watan jatu jawen achimisbuki.
Nuitapaibu jatu padan paepa watan ana jatu chakabuwamisbuki.
Jawa jayabuma: “Yunuti kushipawen ea medabewakin axunwen”, ibiaibun
jatu padan bestimisbuki.
8 Jamen ja juni shinan pepa duapabudan,
jabu janchai yubakatan pe besti waxankanikiki.
Jaska yubakashina jawa betsa wama mestenwantan apakexankanikiki.
Ainbuaibu nuimakidi yusiankiaki, na janchadan
9 Matu man ainbuaibu nuibumaan,
matu yuinun ea ninkakanwen.
Ibubis man kenmis ainbuaibuun,
en jancha ninkakanwen.
10 Natian man ainbu dayakapa matuki chiti ikubainmisbudan,
año bestichai kai binuaya
ana miban tibi jawaida jushianma inun uva bimi man tsekatiduma
jawen taea dakei man datexankanaii.
11 Man ainbuaibu nuima jiweabuun, datei saki saki ikanwen.
Matuki chiti ixun man ainbuaibu matu kenwanmisbuun,
ana jaska shinanma date paepakin
matun bachi jawendua pekatan
jawen nui bika tenei unanmati bachi bexa sawedikanwen.
12 Ja miban bai pepa anua inun uva bai kemutapa anua
matun piti keyuxanaiwen taexun
jaska man jatuwen nuiaiwen taea
xutidin xutidin ikin jatu uinmakanwen.
13 En mai pakea anua ji muxaya inun nishi muxaya benexanikiki,
ja mae anua matun jiwe tibi anua jaibunantan nawai
man beyusmisbu anudan.
14 Ja inun, xanen ibujaidatun jiwe jawendua jenexankanikiki.
Ja maewan medan yudan kaian jiwebiamisbu janu ana tsua jiweama ixanikiki.
Jatun iduti mishkiwen kenebaunkin kushipa wanibu jenekibi jenexankanikiki.
Jaska wabainibu anu asno unanjaida jadi benimai jiwea anu
jabianudi ina awan basi pixankanikiki.
15 Jehová Dios dasibi damiwanikatun jawen kushipa ana nuku anu yunua juaya
janu jawa miban jayamabiaken betsa maewakin
mai anu dayati pepa wakin
janu miban pepa benemis anu
ana bimijaidati jayaxanikiki.
16 Jawen jancha chanima inun jawen yunuti kushipa pepa
dasibi mai pakea jiwebaunabu anu jayaxankanikiki.
17 Jawen yunuti kushipa pepa beneidan,
jawa jawen datetima unanuma jiweti ipakexanikiki.
18 Enabu jiweidan, mae pes daka anu jiwexankanikiki,
jawa dateamadan, janu jiweabu tsuan jatu metidubuma anudan.
19 Jaska inun, badux ui nidi ikin ni xukua yamawaya
ja maewan babubiaya
20 ui midima ikin matun yunu cha aka beneaya
janua matun burro inun matun ina awan piti basi benemakin pewaya
matubudan, benimai man jiwekunkainxanaii.