Nukun Xanen Ibun nuku meke taewai juxanikiaki, na janchadan
33
Man jatu chakabuwamis
tsuan matu kupikin chakabuwadiama,
¡man peidawa!
Jawa banabimama juni betsa padantan man jatu achimis
matudi tsuanda matu padanxanaidan, ¡man peidawa!
Matun dukun jatu chakabuwakin man keyushinken
matudi chakabuwakin yamawaxankanikiki.
Jawa jatu banabimama man jatu achimakin keyushinken
matudi achitan iyudiaxankanikiki.
2 Jehová Diosuun, miki chiti ikin nun mia manaii.
¡Nukuwen nuidiwe!
Penama tibi min kushipawen medabewakin nuku uinmakubainwen.
Nun bika teneaitian nuku medabewakin piskumakubainwen.
3 Ja mae anu jiweabu min jatuki sinatai ninkabaini paxamisbuki.
Min nuku medabewai juaya
nawa xukubaunabu detenamenikabu paxai sa ibainxankanikiki.
4 Janua nawa betsabudi shini midima keskabu bekin ja nawabuki jatuki sinatai
nidi ibidan jatu maematan
jatun mabu pepa jatu mebinxankanikiki.
5 Naiudidan, Jehová Dios xanen ibu dasibi binu keyua jiweaki.
Ja nukun Diosunan, Sión anu jawa kanetiduma inun
jawen yunuti kushipa pepawen achixanikiki.
6 Badi tibi jawenabu jawa putama jatu mestenwankubainmiski.
Jawen unanepati inun jawen chakabu inun pepa unantidan,
jadan, keyuisma pepajaida jiweatun nuku piskumatiduki.
Diosun matu jawen datemaidan, jawendua pepa meseki.
 
7 Ninkakanwen. Juni detenamenikabu kushipabu
bai tanabidani sai sai ikaibu
jabu jaki sinataibube unanuma jiwenun ika
jatube yubakabiatanshina ja xanen ibu janchaxunikabu ma kaxakanikiki.
8 Jatun bai anu ana jadi mapuabuma inun
tsua janu buabumaki.
Jatube yubakai janchanamekin daya yuishinabu ma mexteabuki.
Tsua jatuki mesekin jatu ninkabumaki.
9 Ja mai pakea anu jiweabudan,
punu nukai juinti nishmatan kaxakanikiki.
Líbano ji xukua jamen jawen pei jawendua ibiaima ma xanai dakekanikiki.
Napanpa Sarón jawendua ibiamis betsai ana jawa jayamaikiki.
Basán mae inun Mati Carmelo mai pepajaidabia betsai
janu ana jawa jayama mai beden aka keskabuki.
 
10 Jaskabiaibun Jehová Diosun yuikin:
“Natianan, eska en aka en matukidi shinaiin.
Ean en jatu binu keyua xanen ibu kushipajaida
dasibibu en kushipa en jatu unanmakatsis ikaii.
11 Man jaska yubakamis inun man jaska dayamisdan,
matubudan, man xeki xaka keska inun
man chaka ichawaxun putamisbu keskabuki.
En xun akaya chi ketikainkin dasibi achi keyutiduki.
12 Enabuki sinataibu ja nawabu en chiwen
jatun yuda menua mapu bestitidubuki,
muxa mexteimabu chiwen kua keska jatu wakinan.
13 Man chai jiweabunan, jaska en ashian man ninkaxanaii.
Ja inun, man udama jiweabunan,
en kushipa unankin man uinxanaii”, ikaya
 
14 Sión anu juni chakabu jiwexun chakabuwamisbu
datei jabu saki saki ikaibun
jabu patapai chakabumisbu date paepakin
jabun yuikin:
“Diosun chiwen nuku kupikin yamawai inun
jawen chi nukaisma ikibi ikanudan,
nukubudan, ¿tsuabu nun jadi jiwetidubumen?” ikaibun
 
15 eskabu besti jiwexun yuimisbu, jabu paxatiduki.
Jabu pe jiwekunkainkin jancha chanima yuimisbu inun,
jabu mabuwen kemui jiwekin betsabu ichakawaisbuma inun,
mabu inankuin bitan jatu jawen padankin jatun shinan betsa wamaisbuma inun,
pubenbun shinan jabun ninkatan jatu chibainsma inun,
chakabuaibu jatu uinkin chibankatsi ikama bekua keskaxun shinanmisbudan,
16 jabudan, chanima jatun jiwea mestenki.
Janu paxai jiwei meketidubudan,
jatun jiwe kushipadan, mishki jiweki.
Jabu jiweabu anudan, piti jamen ikai inun unpax jawa yupama ixankanikiki.
 
17 Isaíasin ana jatu yuikin:
Dasibibun ja xanen ibujaida jawen kushipa
chaxa chaxa ikai matun beduwen man ana uinxanaii.
Chaijaida jiwebiabaunxun jawen mai pakea ana xeka ibubis man uinxanaii.
18 Jaska betsa betsapawen matu bika tenemabu
ja shinain man jawen datei jiwemisxun yuikin:
“Jabun nukun pei impuesto bitan tanamisbudan, ¿jania?
Jabun nukun pei impuesto bitan jawen xankama unantiwen unanmisbudan, ¿jania?
Nukun uinbaunti jiwe keyatapa anuxun jabu nukuki sinataibu beaibu bechinun ixun uinmisbudan, ¿jania?”
19 Jancha atimapaibube ana jatube jusia jiweama inun
nawabun jancha bikajaida man jaskatan ninkatidubuma anu
man ana jabube jiweama ixanaii.
20 Sión maewan uinkanwen,
januxun Dios kenwain nun besi peaibudan.
Ja Jerusalén maewan kushipa
januxun tsuan matu ana bikawatiduma anu shinankanwen.
Ja maewanan, tadi jiwe puntekin mestenwan keska
tsuan jawen nichin tibi betsetidubuma inun
jawen dispi tesatidubuma keskaki.
21 Janu Jehová jawendua kushipa pepa
nukube jiwexun nuku uinmaxanikiki.
Ja maewan anu jene jaxpa jabai kushipai jayaxanikiki.
Janu matuki sinataibu jabun matu detenun ika jatun xaxuwan tuein mapuabu kushipabu
ja jenewen ana jikitan mapuama ixankanikiki.
22-23 Ja xaxuwan nachankanki jawen dispi tibiki ja tadi jaki puntea
niwe bekin ana puntes wamawen taea ja tadi pea pea itiduma ixanikiki.
Jatun xaxuwan ana jadakidi katidumaken
jaki inatan jabu nukuki sinatamisbun mabu pepa dasibi mapematan
mabu nun paxkaibun
bekunbu inun tekeyabundi jabuna bixankanikiki.
Ja jaskaibutianan, Jehovádan, nukun Xanen Ibu inun,
nukun unantinanika inun,
nukun jancha pewatan chibanmanika ixanaiwen taea
jatun nuku piskumaxanikiki.
24 Jaskaibutian ja maewan anu jiweabu betsa taska:
“En isin tene jayaki”, iwanan, yuiama ixankanikiki.
Jerusalén anu jiweabu chakabumisbu Jehová Diosun jatun chakabu ana shinanma jatu buaxunxanikiki.
***************