Sión mae anu yudabu ana chintunxankanikiaki, na janchadan
35
Janu tsua jiweabuma anu mai tsusin benimaxanikiki.Jua jawendua tueaya benimaxanikiki.
2 Jua ichapa jawendua tueaiwen mai tsusin benimai shinan chankanxanikiki.
Ji jawendua Líbano keska janu tsua jiweama anu
Diosun jawenduajaida waxanikiki,
Mati Carmelo inun napanpa Sarón jawen mai pepa keska wakinan.
Diosun jaska wakeakeaya dasibibun jawen kushipa jawendua uinxankanikiki,
nukun Dios jaska xanen ibu pepajaida ikunkainayadan.
3 Januxun babubu jatu shinan chankanwankin
punu nukabu jatu kushipa wakanwen.
4 Datebu jatu yuikinan:
“¡Ana dateama benimadikanwen!
Na jabia matu dapiki, matun Diosun matu piskumakatsidan.
Matu meketan matuki sinataibun jaska bechipaimisbu keska
jabun chakabumiswen jatu kupikin tenemaxanikiki.”
5 Januxun bekunbu bepexetan uinxankanikiki.
Patabu pape ikin ninka pewaxankanikiki.
6 Mestentiya tidi iki mapuabu chaxu ishchumisbu keskai
bintu bintu itan titi ixankanikiki.
Juyubu jancha pesei sai sai ixankanikiki.
Janu tsua jiweabuma anu mai tsusin anua jene tuebaini paxkukaini kushibainxanikiki.
7 Janu tsua jiweabuma anua betsai ian tsauxanikiki.
Mai tsusinjaidabia janu paxku debu ichapa jayaxanikiki.
Natian janu kaman inu besti jiwemis anudan,
tsu ati tawa inun ja una wati basi pepa benexanikiki.
8 Jabianudi kapuketi bai betsa jawen kena kenakinan,
“Bai Medibi Diosunaki”, axankanikiki.
Tsuabunda jatun chakabu pewai chukisbuma ja baiwen butidubumaki.
Ninkaisbumadi janu mapui jawen kapuketidubumadiki.
9 Ja bai anu inu betsa león jayama inun
yuinaka mese piananbu jadi buama ixankanikiki.
Ja bai medibi anudan, chakabun jatu tsumani
Diosun jatu peka ana chakabuuma
janu mapui chintunbidanxankanikiki,
10 tsuabuda Diosun jawenawakin jatu binidan.
Jawen maewan Sión anu jikibaini kantai benibainxankanikiki.
Jadi jikitan jiwea benimai jeneama ipakexankanikiki.
Jabudan, benimai shinan chankan bestixankanikiki,
jadia ana kaxai bika tenei een ikama yamakaini pes dakaxanikiki.
***************