Diosun Jerusalén anu jiweabu ana jatu medabewakin jatu daewaxanikiaki, na janchadan
40
Eska matun Diosun matu yuikiki:“Enabu medabewai jatuwen nuikin ea jatu daewaxunkanwen.
2 Jancha duapawen Jerusalén anuabu medabewakin ea jatu jancha waxunkanwen.
Jatu yuikinan, matu tsuma wanixun matu dayamamisbudan, ma keyuaki.
Man kanechakayamakubainmiswen taexun
en kupiti kushipajaida bestikima en ma matu tenemakubainimaki.
Jaska memakin matun chakabu en ma matu pakamaimaki”, ikaya
3 janiada jui taxni sai ikin yuikin:
“Janu tsua jiweabumanu bai pewakin
Xanen Ibun bai pesaxunxankanwen.
Janu jawa jayamajaida anu bai yushtuma wakin kayatapinbainkin
nukun Dios bai pewaxunxankanwen.
4 Napaku tibi pewakin mai mata wakin
mati matipa panpa wakin
mai xantu xantupa inun mati matipa betsa wakin
dasibi sapa wabainkin pewaxunxankanwen.
5 Man ma jaska waxunken
januxun Xanen Ibun jawen kushipa pepa jatu uinmai juaya
dasibi yudabu jaki ichaxun uinxankanikiki.
Jamebi Xanen Ibun jaska yuikiki”, ikaya
6 janiada jui ana taxni sai ikin ea yuikin:
“¡Sai iwe!” ea waya
Ean yukakin: “¿Jadakidi sai ipa?” en aka
ea yuikin: “Yudabu dasibidan, basi keskabu bestiki.
Jatun kushipadan, ni jua keska bestiki.
7 Xanen Ibun jatu mamakixun xun akaya
basi chushi inun jua utsi xanamiski.
Yudabudan, chanimajaida basi keskabu bestiki.
8 Basi chushiaya jua utsi xanamiski.
Jakia nukun Diosun janchadan,
ja besti jawa betsama mesten ipakenunbadikiki”, ikin
9 Sión yuikin: Siónaan, mati keyatapa jawen jenea mamaki mapeketan
jui kushipawen sai ikin kaka pepa chaniti jatu banabimadiwe.
Jerusaléen, jawa dateama min jui taxnimakin
kaka pepa Judá maewan tibi anu jiweabuki jatuki eska chanidiwe:
“¡Na jabia matu dapiki, matun Diosdan!” jatu wakinan.
10 Uian. Xanen Ibu jawen kushipaya
jawen pe yunutiwen jatu pe mekei ma juikiki.
Jawenabu medabewakin jatu piskumatan
jatun manakuti pepa jatu inanxanikiki.
11 Chaxuwan mekenikatun jawen chaxuwan xukua jatu mekemis keska wakin
chaxuwan bake bitan
jawen xuchi anu ikubainkin inun
dama kain benabu meke pewamisbu keska wanun ika ma juikiki, nukun Xanen Ibudan.
Israelin Dios ja kayadan, kushipajaidakiaki, na janchadan
12 Ianenwan itamamai panidan,
¿tsuan jawen meken janakubainkin ma tananimen?
Nai natukanan, ¿tsuan jawen mekenen meshantan ma tanakubainimen?
Mai mishpu kudu mai jidabi anuadan,
¿tsuan ichawaxun kukiki ma tananimen?
Mati tibi betsa betsapadan,
¿tsuan ma ichawaxun ma pisa keyunimen?
13 Jehová Diosdan, ¿tsuan jawen shinan unanti wakin medabewanimen?
¿Tsuan medabewakin yusinimen?
14 Jau Diosun ninkatan yunu pewanunan,
¿tsuan jawen shinan betsa inanimen?
Kaneama pepa inun chakabu jau unanti wanunan,
¿tsuan yusinimen?
Damini inun yumeai jau unanun, ¿tsuan tapinmanimen?
Jau unanepanun, ¿tsuan jawen shinan tapinmakubainimen?
15 Diosun shinanan, eskaki.
Nawa xukua tibi uiainan, unpax tusua keska bestiki.
Pisati anu mai mishpu bestichai jana keskabuki.
Ianenwan anu natukan mai tibidan,
jawen kadudan, mashi bedu bestichai keskaki.
16 Mai pakea Líbano dasibi ni xukua anua
jaska Diosun yuinaka bechipai keska menuxuntidubu damaki.
Ja inun, jabianudi kadu waxun ja yuinaka menutidubu damadiki.
17 Nawa xukua tibi dasibi jiwebaunabudan,
ja bebunuadan, jawamajaidabuki.
Jatun jabukidi shinanan, jawenadan,
jamen jawa kadumajaidaki.
18 Matubun Dios man unanti wakin shinanan,
¿jadatu keskamen?
¿Jadatu dami besu keskamen?
19 ¿Juni yuda dami wanikatun
juni keska wakin dami wamisdan,
jaska keskamen, Diosdan?
Tsuanda mane dami wakin juni wa
januxun oro pewanikatun jawen yuda orowen puxatan
plata mane dispi chiwetameya sawemakin
jawen yuda kainmamiski.
20 Jamen jabu pei jexe jayamatun ji kushipa katutan
ji dami wanika unanjaidai bechitan yunukin
dami jamebi tin itiduma jatu amamiski.
Jaska keskamajaidaki, nukun Diosdan.
21 Matubunan, ¿jaskadan, man unanmajaidamen?
Jaska yuinibudan, ¿man ninkaismamen?
Bebunkididan, ¿matu yuiama inibumen?
U unu mai dami waitianan, ¿ninkakin man unanma inimen?
22 Nukun Diosdan, nain mai achia mamaki
jawen xanen ibu janu tsauti jayaki.
Jadi tsauxun junibu uinkinan, shini keska jatu uinkiki.
Naiwen jatu achi keyukin jawen jatu bepu keyuaki.
Tadi jiwe chumia jatu puntea keska wamiski.
23 Juni xanen ibubiaken betsa wakin jawama jatu wamiski.
Mai anu yununika kushipabubiaken jatu mitanuma wamiski.
24 Jabudan, miban betsa dama banabu
jatun tacha mai anu jawen tapun jayadiama mestendiama keskabuki.
Diosun jatu mamaki xun aka chushimis keskabuki.
Uiyabi niwewan bekin jawen pei xana nuyamabainmis keskabuki.
25 Dios medibitun junibu yukakin:
Matubunan, ¿en tsua keska man ea shinain?
¿Tsua ea keska itidumen?
26 Bewenikitan naiudi matun beduwen uinkanwen.
Ja dasibidan, ¿tsuan dami wanimen?
Jaska bishi tibi chaxa kaiankeakeai
jatun kenawen en jatu kenamiski.
Jaskawen taea Diosun jawen kushipa tibiwen jatu mekea jatun chaxa jawa benutidubumaki.
27 Jacobun enabu Israelbuun,
¿jaskai man ja ikai?
¿Jaskakin man eska yuiai?:
“En jiwe chakabiaken Jehová Dios ewen nuikin ea medabewamaki.
Diosun ea shinanmaki”, ikin
28 matubunan, ¿man unanmamen? ¿Man ninkaismamen?
Nukun Jehová Dios ikibi ini mai jidabi bawakin dami wanidan,
jadan, punu nukatiduma inun jin itidumaki.
Jaska dasibi shinankin unan keyuai tsuan ninkakin tana keyutidumaki.
29 Punu nukabu ana jatu kushipa inankin
babubu medabewakin ana jatun yuda kushipa wamiski.
30 Bedunanbubia punu nukai juinti nishmatidubuki.
Kushipabubia jin iki di itidubuki.
31 Jakia tsuabuda Jehová Dioski chiti ikabudan,
ana kushipa bena jayakubainkanikiki.
Kushikaini jawa punu nukatiduma inun
bai tanabaini jawa babutidubumaki,
ishmin jawa pexukuama nuyakaunai keskaidan.