Diosun Israelin enabu jatu yubanixun ana jatu medabewanikiaki, na janchadan
41
“Mai pakea Mediterráneo Ianenwan kexa anu jiweabuun,janchama pestan ea ninkakanwen.
Ana dateama juinti kushipakanwen.
Jaska man sinatanamemisbudan, nedi ichai bekanwen,
jaska en matu amamiskidi nun janchanunbunan.
2 Badi juaikidia ja xanen ibujaida Cirón nawa xukuabu tibi maemakubainmisdan,
¿tsuan yunumakin amakubainmismen?
Ja nawa xukuabu tibi jatun xanen ibu babu watan
jatu tsuma wamakubainmisdan, ¿tsuan amakubainyamamen?
Jatun machatu chaipa inun jatun kanun piayabis tekekin mesi watan
pechush sa akawakinan, ¿tsuan jatu amakubainyamamen?
3 Jatuki sinataibun jatu chibanbiabainabu
jawa tsuan jatu meama unanuma jatu dete dete abainkin
jatun taewen kati bai metsamaisma keska wakin,
¿tsuan jatu amakubainyamamen?
4 Dasibi jaska watidubu daya amakinan,
¿tsuan jawen shinanen jatu taewamanimen?
Janu yudabu dami wakin taewatan jaska jau jiwekubainxanunbun
jatu yunukubainkinan, ¿tsuan jatu akubainmismen?
Eadan, en jabia Jehová ea besti Dios kayabitun
en jatu yunukubainmiski.
Ea dukun en ini inun
jawen jenei en idiakunkainxanaii.
5 Ianenwan Mediterráneo kexa anu mai pakea tibi anu jiwebaunabu
jaskaibu uin date paepaibun
mai jidabi kesuakea pacha sakui taka taka ikaya
dasibibun chaimaxun uinun ika bexankanikiki.”
6 Jabun mabu wanikabun jawen jaibu mabu wanikadi medabewakin
jatu shinan chankanwamisbuki.
7 Dami wakin ji mabu wanikatun jawen jaibu oro mane inun plata mane wanikadi benimawamiski.
Jawen mastatiwen mane dami wakin sapa wanikatun
jatun mane mabu chusha chusha anika benimawadiamisbuki.
Januxun dami menekin ma keyutan
ja mane tsis anika yuikin: “Min pejaida wamiski”, atan
januxun ja dami jau dabeke dabeke iyamanun
pidikuwen mestenwankin mastamisbuki.
8 “Jacobun enabu Israelbuun, ea ninkakanwen.
Ja bechipaikin en katuni en tsuma en jaibu Abrahamnen man jawen bababuki.
9 Mai uke betsaudia ean en matu kenaniki,
chaijaida ianenwan dexun betsaudia matu katukinan.
Januxun matu yuikin: ‘Matudan, man en tsumabuki’, akin
ean matu katunixun en matu danainsmaki.
10 Dateyamakanwen, en matubekidan.
Dateyamakanwen. Eadan, en matun Dioski.
Matu medabewakin en kushipa en matu inanmiski.
Ea kushipa binumamistun matu tsumaxun
jawa matu jeneama en matu mekekubainaii.
11 Dasibi jabun matu danainbu en jatu dakewa babuxankanikiki.
Jabu matuki sinatakin matu detemisbu manakukin
en matu jatu yamawaxunxanaii.
12 Matuki sinatakin matu detemisbu ana jayamenkain ikin benai
man jawa jatuki nukutiduma ixanaii.
Jabun matu achitan jatidi matu detekin
jatidi matu ibu wabainmisbudan,
jawa jabun matu jaska wabuma ini keska man jatukidi shinanxanaii.
13 Jakia eadan, Jehová Dios en matun mekenikatun
matu metsuntan yuikin:
‘Ana jawa dateyamakanwen, en matu medabewakubainaiwen taeadan’ ”, akin
14 Jehová Diosun jawen jancha mestenwankin yuikin:
“Jacobun enabu Israelbuun,
ja man texeishtani man babubiadan,
jawa dateyamakanwen, en matu medabewaidan.
Eadan, Israelin Dios medibidan, en matun piskumanikaki.
15 Matubudan, jawen mai xexabainti xeta benaya keska en matu waxanaii.
Mai xexabainkin mati tibi panpa wakin man mishpu waxanaii.
Mati mishtin xekiwan xaka keska man waxanaii.
16 Man jatu beka beka aka niwen jatu buxanikiki.
Niwe shubi shubi ibidankin sa abainxanikiki.
En matu jaska waya matubu man benimaxankanaii.
Israelin mekenika en Jehová Dios medibiwen man kenxankanaii.
17 Enabu nuitapai jawa pei jayabuman unpax benabiai
ibubis bechiabumaki.
Unpax manui jatun jana taxkai tetsusinbiaibun
jakia ea Jehován en jatu amaxanaii.
Israelin mekenika Dios eanan, jenekin en jawa jatu putabainama ixanaii.
18 Janu tsua jiweabumanu mati keyatapa anua en jene jabamaxanaii.
Napaku anu chacha tibi en tsaunxanaii.
Janu tsua jiweabumanu ian pishta wakin en newexxanaii.
Mai metu anu en paxku jabamabidanxanaii.
19 Janu tsua jiweabumanu mai metu anu ji tibi en benemaxanaii,
kuxadan, olivodan, cípresdan, ji pepa betsa betsapa benemakinan.
20 En Jehová Israelin Dios Medibitun dasibi dami wakin
en kushipawen en akeakeni
jau mai jidabi anu manibaunxun uinkin ninkakin tapinkin
jau unanxanunbun en jaska wakeakekubainxanaii”, iniki.
Yushibu tibi kenwainan, jamenkiaki, na janchadan
21 Jehová Dios Jacobun Xanen Ibujaidatun yuikin:
“Damibuun, bexun matun kushipakidi ea uinmai bekanwen.
Jawada man amis bexun akin ea uinmakanwen.
22 Matu ninkanun uatian ixanai nukuki chanikanwen.
Uatian ma iyamakidi nuku yusinkin unanmakanwen.
Jamapai tibi ixanai nukuki chanikanwen,
jaska kaintan keyuxanai nun uinxanunan.
23 Jaska chipu kainbidanxanai nuku banabimakin yuikanwen.
Jaska chanima man diosmenkain, nuku xabakabi uinmakanwen.
Jaska man atidu pepa kasmai chakabu nuku axunkanwen,
matuki date paepai nun mesenunbunan.
24 Ean en matu uianan, matubudan, ¡man kushipa jayamajaidabuki,
man jawa dami betsa watidumajaidadan!
Jabu unainsmapakin man dami katumisbudan,
¡man peidakanwan!
25 Xanen ibujaida Persia badi juaikidi jiwea en kena nortekidia taxnikidanxanikiki.
Xanen ibu betsabu jatu achikin
jawen taewen pupus pema pema abidankin akawaxanikiki,
mai mabu wanikatun jawen taewen mapu pewakin katadankin biyu biyu amis keska wakinan.
26 Jaskai nun uinun badinun bebunkidijaida ja xanen ibukidi,
¿tsua jatuki chaninimen?
Ja junin axanai chanima bebunkidi yuini jaskawen taexun
nun e itan unantidubudan, ¿tsuan animen?
Damipaan, jawa betsa taska man chaniama iniki.
Man ja xanen ibukidi janchai jawa jancha man yuiai
tsuan jawa ninkamajaida iniki.
27 Jakia ea Jehová Diosunan, bebunkidi Sión anuabu
jatuki chanikin en jatu unanmaniki.
Jerusalén anu en jancha yuixunika en yununiki,
ja Israelin enabu jawaida chintunxanaibu jau jatu yuinunan.
28 Ean en uianan, jawa dami yushin betsa taxniamaki.
Jadatuda yushin damipan medabewakin junibu yusintidumaki.
Matun yushin dami en jatu yukabia ea jawa kematidubumaki.
29 Ja yushin dami tibidan, jawama jamenki.
Jawa dami watidubumajaidaki.
Jawa kushipa jayama dami bestibuki.”