Jawen tsuma katunikidi Jehová Dios jatuki chaninikiaki, na janchadan
42
Dios jatuki chani: “Uinkanwen. En tsuma en katunidan,en bechipaiai ea benimawamiski.
En Yushin kushipa en yunua medabewaya
ja en tsumapan jawen yunuti kushipa pepakidi
yudabu xukuabu tibi yuibaunxanikiki.
2 Jawen jui kushipawen jawa janchama
unanxubida janchai jawen jancha kaiain
bis bis ikamaken bai namaki mapuxun ninkama ixankanikiki.
3 Chanimajaida jawen yunuti kushipawen chakabu maemakin binudiama
yudabuwen nuikin tawa yushtu puaka keskabu
juinti babubiabun jatu dananma ixanikiki,
bin paji ibubis nukabiaya nukawama keska wakinan.
4 Januxun jawen yunuti kushipawen chakabu binudiama
jawa juindukuanma inun jawa punu nukai unanyamasama ixanikiki.
Nawa xukua betsa betsapabu Ianenwan Mediterráneo kexa anu jiwexun
en tsumapan jancha ninka pewaxankanikiki”, aka
5 Ja Jehová Diosun nai jidabi dami wakin kainmani inun,
mai dami wakin taxnimani anu jaki jamapai benemisbu inun,
yudabu jaki jiweabu jiwea jatu inankin jatu juinsinamamistun
jawen tsuma yuikin:
6 “Ea Jehová Diosun en mekenen mia metsunxun en mia kenaniki,
jau mia ikunwain minwen taea ea anu piskuxanunbunan.
Mia jaska wamakatsi minwen en yubakaniki,
nawa xukuabu tibi unanti wati bin pexea keskakin
min jatu chaxa waxanunan.
7 Jaska wakin bexuxbu min jatu uinmaxanaii.
Bichiti jiwe medan jatu bichiyamabu min jatu taxnimaxanaii,
tsuabuda meshu anu jiwea keska jatu taxnima keska wakinan.
8 Eadan, en Jehováki, en kena kayabidan.
Jau tsuada betsan en kushipa jawena keska wakin
jau madias duawayamanunbun en jatu yunuismaki,
jancha pepawen ea besti duawakatsi ikama
dami yushin duawaibuwen taexunan.
9 Uatian en matuki chaninidan,
dasibi bebunkidi en yuini en ma akin keyuaki, menekinan.
Na jabiatianan, ana jaskaxanai bebunkidi kaka bena en matu tapinmaii,
matu bebun taxnidiama bebunkidi man unankubainxanunbunan.
Dios kenwain kantai jawenduakin benimawatikiaki, na janchadan
10 Kantati bena betsawen Jehová Dios kantaxunkanwen.
Nenumajaida mai kesua anuxun kenwanbaunkanwen.
Tsuabuda man ianenwan xaxuwanwen mapuabu inun,
man ianenwan medan yuinaka jiweabu inun,
mai pakea tibi ianenwan kesua anu man yudabu jiweabunan,
Dios kenwankanwen.
11 Mai tsusin jawama anu inun ja maewanibu,
jau benimanunbunwen.
Quedar nawabu jatun tadi jiwewen jiweabu
jau benimadianunbunwen.
Selá mae anu jiweabudan, shinan chankain jau kantanunbunwen.
Ja dikabi mati keyatapa betsa binu keyua mamaki mapeketan nia min juiwen
benimakin mimawakanwen.
12 Ianenwan kexa mai pakea tibi anuxun
Jehová Dios pepawakin xabakabi duawakin jau kenwanunbunwen.
13 Jehová Dios jawa dateama mentsisipa keskai kainkidanxanikiki,
jatu maematanun ika detenamenika keskai bebukainidan.
Jatu maemanun ika bui jadi sai sai ibainmisbu keskakin
jawen jui taxnimaxanikiki,
jaska kainkin jaki sinataibu yamawanun ikadan.”
14 Jehová Diosun ana yuikin:
“Jatixuinda en nishma dakani inun en pes dakanidan,
en jui en ana meketidumaki.
Jakia natian ainbu bake kainun ika bis imis keskai inun,
ana teneama tsekeden imis keskai en jaskaxanaii.
15 Mati keyatapabu inun mati jatiubuma yamawakin
dasibi ni jukunmisbu en tsusinwankin keyuxanaii.
Dasibi jene netsukin mai tsusinwankin en jawa jayama waxanaii.
Ian tibidi en netsu keyudiaxanaii.
16 Bexuxbu jatu iyukinan, bai tanamabainkin
janu uin buisbuma anu en jatu iyuxanaii.
Meshu anu buaibu jatu bebunxun bin jatu chaxawaxunkin
mai chakabu panpa wakin bebunkidi jawamawakin en jatu pewaxunxanaii.
Na jabu jaska tibidan, jawa yupatidubuma en jatu axunxanaii.
17 En jatu jaska wabainaya dami yushin inun jawen kenwanti tibi tsuabunda jatu yuikin:
‘Matudan, man nukun diosbuki’, jatu amisbudan,
jabudan, jatun damiki dakekin jenebainxankanikiki”, itan
Israelbudan, bexux keska inibukiaki, na janchadan
18 Diosun ana jatu yuikin:
“Patabuun, ninkakanwen.
Bexuxbuun, shinankin unankanwen.
19 Israel en jancha bunika wakin en katubiani
yuda betsabu tsua jaskamabiaken
Israelbu en jancha bunikabubia
man bexux keskabu inun man pata keskabu man en tsumabuki.
20 En betsa betsapa matun bedubi axuain uinbiakubidani
ja shinankin man uinkatsi ikabumaki.
Ninkabiakin man jawa ninka pewabumaki.
21 Jehová en matun Dios piskumanikatun
en yusian jawenduawen en matu e imati ewapa axunbiakubaina
22 jakia man Israelbudan, matuki sinataibun matu anua yumetsukin inun
matun jamapai mebin keyubainkin
matu achitan dasibi matu bichikin iyumisbuki.
Jadi matu bichimabu tsua matun medabenan kaxun
matu kainmakin bepenxuinsmaki”, ikaya
23 januxun Isaíasin jatu yuikin:
“Matu jaska wabia,
¿jaskakin uintan man shinan betsa waisbumamen?
Jamen jaskaxanaibudan,
¿tsuan jaska ninkakatsis ikimenkain?
24 Jacobun enabu, Israelbudan, jau jatu achitan bichixanunbun
¿tsuan jatu yununimen?
¿Chanimen, Jehová Diosun jatu anidan? Chanimaki.
Jabu Dioskidi chakabujaidakin
jawa chiban pewama bai kayatapia jatu unanti wamabiakubaina
jawa jawen yusian ninkakin chibanxunabumaki.
25 Jaskawen taexun Dios jabuki sinatakin kupikin
detenamenikabu Diosun yunua jawaidabidan chiwen jatu kuaniki.
Jatu jaska wabia jawa betsan taska uintan tapinkatsi ikama inibuki.”