Jehová Dios ja besti piskumanikakiaki, na janchadan
43
Jakia natianan, Jacobun enabu Israelbuun, ninkakanwen.Jehová Diosun matu dami wanitun matu yuikin:
“Dateyamakanwen, matu iyunibu jadia jatu putamabidankin en matu taxnimabidanimaki.
Ean matu katunixun matun kenawen kenakin ena en matu waniki.
2 Man jene pukebainaya en matubetan pukekubainxanaii.
Jene besusi pukebaini man jasama ixanaii.
Matumebi man chi anu napukubia man menuama ixanaii,
ja jedepan matu dawakada akamadan.
3 Eadan, en Israelin enabun Jehová Dios medibi matun piskumanikaki.
Matu taxnimakinan, matu ana ena wakin bikatsis ikin
ja nawabu Egipto inun, Etiopía inun, Sabá jabun matu ichakawaibu
jatu matu kupixunkin Persia nawabuwen en matu taxnimabidanxanaii.
4 Matu yaushijaidakin matu benukatsi ikama en matu bechipaiaii.
Matun jiwea piskumatan matu benukatsi ikama
junibu inun mai pakea tibi jadi en matu inaniki.
5 Dateyamakanwen, en matube niakidan.
Matunabu ana ichawakin nenuma badi juaikidia inun badi kaikidia
jatu iwekin en chintunwanxanaii.
6 Nortekidi jiweabu ean jatu yuikin:
‘Enabu ea ana jatu nichinxundikanwen’, akin
surkidi jiweabu jatu yuikin:
‘Enabu ana jadi yaushiama
en juni bakebu inun en ainbu bakebu
nenuma mai kesukauna anua ea jatu iwexundikanwen.
7 Dasibi enabu en kenaya
jabun ea duawakin yudabu en kushipa jau uinmaxanunbun
jatu dami wakin en bawanidan, ea anu ana jatu iwedikanwen’ ”, iwanan,
8 “Enabudan, ea anu nichinkanwen.
Jabudan, beduyabia bexuxbuki.
Pabinkiyabia ninkaisma patabuki.
9 Mae tibi anuabu inun nawabu man xukuakeakeabudan,
janus jatube man ichatiduki.
Jaska Diosun jawenabu medabewai kai
¿tsuan bebunkidi unantan yuitidubu ikimamen?
Jaska chanimamenkain, tsuanda uinmaxun nuku bebunua chanikanwen,
nun ninkanunan, jaska yui kayabimenkainan”, ikin
10 Jehová Diosun jawen jancha kaneama mestenwankin:
“Jabia man matubuki, en chaninikabudan,
man en tsumabu inun ean en matu katunidan.
Ea unantan ea ikunwain eki chiti ikin
en Jehová Dios dasibi binua
man ea unanunbun en matu katuniki.
En idiamaken tsua dios betsa jayama iniki.
Ja inun, uatian ea kachu betsa jayatidumajaidaki.
11 Ea besti en Jehová Dioski.
Eamaki jawa tsua betsa piskutidubumaki”, itan
12 Jehová Diosun jawen jancha kaneama mestenwankin:
“Ea bebunkidi matuki chani janchanixun piskumakin en matu paxawaniki.
Yushibu betsan matu mekekin matu axuanma ini matun ibubu inun matubunan, uinixun man unanjaidaii.
13 Ea en taxninidan, jawa betsama jabias en ipakeaii.
En kushipa mebinkin tsuan ea jenematidumaki.
Jawada en akai tsuan ea binumakin chakabuwatidumaki.”
14 Israelin Jehová Dios medibi
jatu mebikinankunkainmis jatuki chani:
“Matu jadi paxawakinan, Babilonia junibu en jatu yunuxanaii.
Jadia matu taxnimabidankatsidan, bai tibi en matu bepenxunxanaii.
Caldea nawabun matu iyui matuwen benimabiabainibu jabundi bika tenexankanikiki.
15 Eadan, en jabia Israelin damiwanika medibi Jehová en matun xanen ibuki.”
16 Januxun Jehován ianenwan medan bai tapintan
jene mesebiaken janu bai watan
17 detenamenika mentsisipabu jatun detenameti caballo inun jawen tadanbainti ja baiwen buaibu
janu jatu yamawakin ana jaska benitima wakin
janu besti jatu desunxanikiki,
bin paji ji ikai nukawa keska wakinan.
18 Jaska waxanaiwen taexun Jehován jawenabu jatu yuikin:
“Jaska uatian man jiwekunkidanshina ana shinanyamakanwen,
man bika tenekubidanshina ana jas shinanma jakimaidan.
19 Eanan, man jaska jiweisma betsa bena en matu axuain
natian taxniai ibubis man uinxanaii.
Janu tsua jiweabuma anu en matu bai pesaxunxanaii.
Ja mai anu jawa jukuinsma anu jene tuekin en jabawaxanaii.
20-21 Jabu enabu wakin jau ea kenwanxanunbun en jatu katuni
jabu ekidi chanibaunxankanikiki.
Janu tsua jiweabuma inun janu jawa jukuinsmanu
unpax tuekin en jatu jabawaxunxanaii.
En jatu jaska waxuna ja unpax akaibun
januxun yuinaka pianan betsa betsapabu inun, kaman inu inun, pupun jabundi ea duawaxankanikiki.
22 Jacobun enabu man Israelbu matunan,
ea kenakatsi ikama eki chikishi man ma ea jakimaki.
23 Ea benimawakin chaxuwan man ea menuxunama inun
ea duawakin man ana ea jawa inankuinsmaki.
Man ekidi jakimaya ana matun inankuin inun xeni ininipa:
‘Ea inankanwen’, iwanan, matu bika wai:
‘Menan, menan’, ikin en matu yukama ikunkainimaki.
24 ‘Jawada ininipa peiwen bitan man ea benimawanun’, ikai
en matu yunuama inun,
ja binumakin: ‘Yuinaka xeni ea kuaxunkanwen’, iwanan,
en matu jawa yunuamaki.
Jamen jaskama matudan, atimapa tibikin ea dananmakin chakabukin
man ea bika tenemakubainaii.
25 Man puben sinatapabubiaken ea en matun Dios matuwen nuikin
matun chakabu ana tanakatsi ikama matu tede axuntan en ana shinanma ixanaii.
26 En matu jaska wamismenkain, man ea chitekatsis ikaidan,
unanepa pewanika anuxun pewanankanwen.
Man ea chitekin pepa kainmaimenkain, chanikin ea uinmai bekanwen, nun uinananunan.
27 Ja dukun matun xenipabu chakabui taeniki.
Matun yusinanbun en jancha chibanma ea dananibuki.
28 En Templo xanen ibu mekenikabun atimapa wakin ea chiban pewabumaken
en jatu bextekubainiki.
Na jaska tibiwen taexun Jacobun enabu man Israelbu
jau matuki kaxekin nuitapa wayununbun jatu yunukin en matu jeneniki”, itan,