Jehová besti Dios kayabikiaki, na janchadan
44
Jehován jatu yuikubainkin:“Jacobun enabu man Israelbu inun, man en tsuma en katuabuun, natian en jancha ninkakanwen.
2 Ea en matun damiwakin bawanika Jehovánan,
man kaindiama matu pe ewawakin en matu medabewakubainiki.
Jacobun enabu Jesurún ninkaisma mishtinbuun, en matu katuni,
man en tsumabudan, dateyamakanwen.
3 Man jaskawen taexun janu tsua jiweabumanu
mai jawa beneisma anu paxku wakin en unpax tuea jabaxanikiki.
Matun bababu pepawen duawakin jiwea bena inankin en jatu yunuxanaii.
4 Jabu yumei paidan, basi jexe sa itan yumemis keskai inun
ji jene kexakea jawen tacha jeneya ewai keska jabu kushipaxankanikiki.
5 Januxun betsan yuikinan: ‘Eadan, en Jehovánaki’, ikaya
betsan jamebi yuikin: ‘En Jacobun baba betsaki’, ikaya
betsan jawen meken anu kenekin netankin: ‘Eadan, en Jehována kayabi en jawen yudaki’, akin
jawen kena ana chichikin Israelin kenayabi netandiaxanikiki.”
6 Jehová Israelin xanen ibu inun
jatun medabenanika dasibi binuatun yuikin:
“Eadan, ea dukun en jiweni inun
en jawen jenea debesekeaki.
Tsuan ea binua Dios kayabi betsa jayamaki.
7 ¿Tsuan en akai keska atidu jayamen?
Ja jaska jaya janchakin jau ea tapinmanunwen.
Dami wakin taewani inun u unu iki kai inun
ma jawada taxni kema bebunkidi yuikinan,
¿tsua chanikin yuitidumen?
Jaskadan, tsua jayamaki. Ean besti en atiduki.
8 ¡En jaskaken benimai dateyamakanwen!
Nenumajaidatian yui ea en chaninidan,
matubunan, man unaiin. Man jaska ekidi chanitidubuki.
¿Dios kayabi betsa jayamen, man unanan?
Jayamajaidaki. Janu paxati betsa en uinsma en jawa unanmaki.”
Jabun kenwanti dami wamisbu Diosun jatu dananikiaki, na janchadan
9 Tsuabunda jabun yushin dami wamisbudan, jabudan, jamenki. Ja inun, jabun yushin dami watan bechipaibiamisbu, jamendiki. Tsuabunda ja dami jamenbiaken kenwainbudan, jabudan, bekun inun shinaunmabuki. Jaskabudan, jatu usain jatuki kaxeti shadaki. 10 Tsuanda mane dami wakin yushin ja kenwanti wakin januxun jaki payumis anuxun jawen kenwanti dios waidan, ja juninan, janu jamapai dayatitianbiaken benumiski. 11 Ja dasibi jabuan ja dami kenwanmisbudan, jabu jatuki kaxeti besti ixankanikiki. Ja jabun yushin dami wamisbudan, junibu bestiki. Janu Diosun jatu unanti waitian dasibi ja bebun mapuxankanikiki. Jatu jaska wa babui date paepaxankanikiki.
12 Jabun mane dami wamisbu jatun dayati mabu shinankanwen. Mane payukin chiwen kuamisbuki. Januxun jawen pewakatsi mane kushipa betsa pewati tsumaxun mastatiwen mastakin pude pude akin jatun punyan kushipawen dayamisbuki. Jakia ja mane dami wanika piama dayakin jawen kushipa keyui inun unpax akama jin imiski.
13 Ja dikabi jabun ji dami wamisbu shinanankanwen. Jaska wakatsi ikin ji tanatiwen tanamisbuki, lápizwen ja tanamabaunkin dami wakatsi bishakinan, jawen keneti betsa compáswen adiakinan. Jaska watan ji dami wanikan tanamabauni dayakin ji juni keska jawen yuda jawendua watan jatun yushin kenwanti jiwe anu nichinmisbuki.
14 Jaska inun, betsadan, tsuanda kuxa banaima uin yumewaima chipu ja kuxa ewaima jayatan dedatidubuki. Jamen jaska wama ni xukua anua ciprés kasmai ji betsa ewapa jamebi yumeima mekekubainkin ewapajaida dedatidubuki. 15 Januxun yudabun jawena watan mekinan, kadu wamisbuki. Tuax betsa kuatan jawen yumisbuki. Tuax betsa kuatan jawen misi bawamisbuki. Tuax betsa dami wakin jawen dios watan ja naman beti itan kenwanmisbuki.
16 Ja yudabu jatidibun ji senke betsa namakis tuax atan kadu watan jatun nami jawen xuixun pi yani wai pepemisbuki. Ja inun, jawen yuii janchai: “¿Jaska kadu dekenepamen? Ea jawaida xana waikiki”, imisbuki. 17 Janua ja ji tuax betsa texea dami wakin jawen kenwanti dios watan ja naman beti itan kenwankin yuikin: “Jawada bika en teneai ea nemaxunkin ea piskumawe. Min en dioski”, akin yuimisbuki.
18 Ja junibudan, jawa unanma inun jawa tapianbumaki. Beduyabia uinkin pewama bexuxjaidabuki. Jatun shinan jatu bepujaida jawa ninka pewatidubumadiki. 19 Jaska wabiakin jawa jawen shinanwen tapin pewama yuikin: “Ja ji senke namakis betsa tuax atan en ketian ji iki dekenxunwen misi en bawaxuki. En nami xuixun pidiaxuki. Jamen ja tuax betsa en ja kuama bitan dami atimapa wakin kenwanti yushin watan ji jamen en kenwaiin”, itidubuki. 20 Chanimajaida chi mapu pia keska wamisbuki, jatun shinan chakabun jatu padanjaida pepa jaska jenetan chibainan. Ja junibudan jatun chakabuwen taea jaskatan paxatidumajaidaki. Jawada junin dami watan jawen mekenen tsumatan jawen shinan pemawen taea jawa shinan pewama ja dami jatu uinmaidan, ja juni chanichaka bestikanikiki.
Jehován jatun chakabu buaxuntan Israelbu ana jatu mekenikiaki, na janchadan
21 “Man Israel Jacobun enabuun, man en tsumabunan, ea shinankanwen.
En matu dami wani man en tsumabuki.
Israelbuun, ea jakimakin ea putayamakanwen.
22 Eanan, jaska chakabukin man ea ninkaisbuma
matun chakabu en ma matu pua axunaki,
nai kuin dunua pua ibaini yamabainmis keska wakinan.
En ana ma matu mebikinain ea shinain chintundibidankanwen, ea anu beidan”, ikaya
23 Isaías benimakin yuikin:
Jehován jawen kushipa matu uinmakin
Jacobun enabu Israelbu ma ana jatu mebikinanki.
Naiin, Jehován jatu jaska waiwen taea benimakin kenwankanwen.
Mai kini keyatapajaidatuun, benimai sai ikanwen.
Mati tibi inun ni xukua inun dasibi ji mapubaunabuun,
jawen kushipa uin benima chakayamai kantakanwen.
24 Matun mebikinanika Jehován,
man kaindiama matun yuda yumewanitun matu yuikin:
“Eadan, en Jehován dasibi dami wakin
nai jidabi kesukauana wakin inun mai dikabi taxnimatan en mestenwaniki,
tsuan ea jawa medabewamadan.
25 Ja inun, junibudan, en jatube janchamabia jaskaxanai chanimisbun janchaibu ninkakin unantan
jatun shinan en nemamiski.
Jabu unanepai chanimisbu jatun shinan en jawama wamiski.
Juni unanepakin yusiainbu en jatu jamakidi yuimamiski,
unanepakin atidububiaken jatun jancha inun jatun shinan jamen wankinan.
26 Jamen jabun ea chanima chibainbudan,
jatu jaska wama jatu jancha kayabi yuimakin en jatu menemakubainmiski.
En jatu yunua jabu en janchawen yubakaibudan,
jawada akaibu pe kainkunkainmiski.
Jamen eanan, Jerusalén yunukin en pewaidan,
ana chintunbidan janu ana jiwexankanikiki.
Judán maewan tibidan, ana benibaunxankanikiki.
Mae chakabuwanibu ean en jatu benimakin keyuxanaii.
27 Ianenwan netsukin en taxka watidu inun
jau jene tibi unpax jayayamanun en yunutiduki.
28 Januxun Persia xanen ibujaida Ciro yuikin: ‘Miadan, min en jatu mekexunikaki.
Dasibi jaska en bechipaiai mian min ea axunxanaii’, akin en yunuxanaii.
Ja inun, Jerusalén yuikin: ‘Miadan, min ana mae benikixanaii’, akin en yuixanaii.
Ja inun, Templo yuikin: ‘Min mestenwanti mishki jabun buyabidanxankanikiki’, akin en yuidiaxanaii.”