Persia xanen ibujaida Ciro Jehová jau dayaxunun yununikaki, na janchadan
45
Jehován Ciro katukin xanen ibujaida watanjawen meken yusiudi tsumatan
jau mai pakea betsa betsapa maemakin jawena watan
xanen ibu betsa betsapabun detenameti yamawakin
jau mebinxanun yununikiaki.
Januxun mae tibitun beputi Ciro Jehován bepenxuntan
jau tsuan ana bepuyamanunbun nemaxunkubainikiaki.
Ja jaska wanixun natian Jehován Ciro yuikin:
2 “Min kai bebun mia bebun kakin
mati tibi en mia pudexunkubainxanaii.
Mane bronce beputi tibi en mia taskexunkubainxanaii.
Mane hierro xui mestenwanti tibi en mia teke teke axunxanaii.
3 Ea en Jehová Israelbun Diosun min kenawen en mia kenai min ea unanxanun
mabu kadujaida inun pei june adu pejaida wanibu
mia bechimatan inankin en mia jaya wakubainxanaii.
4 Ja en tsuma Jacob bechipaikin en katuni, Israelbu enabudan,
jabuwen taexun min kena kayabiwen en mia kenaniki.
Min xanen ibu keyutima mia shinanpaketi jaya wakin en mia kainmaniki,
jawa min ea unanmabiakenan.
5 Eadan, en jabia Jehováki, betsa jayamadan.
Ea keska betsa Dios kayabi jayamajaidaki.
Mai pakea tibibe min jatube detenamexanun
en mia kushipa wakin pewaniki, min ea unanmabiakenan,
6 badi juaikidia inun badi jikiaikidixun
jau dasibibun tsua ea keska jayama
jau unanxanunbunan.
Eadan, en jabia Jehováki, betsa jayamadan.
7 Badi chaxati inun, meshu inun, benimai jiweti inun,
jamapaiwen bika teneti shadabu pawakin en dami waniki.
Na jaska tibi dami wakinan,
ea Jehován anixun en akubainmiski”, iwanan,
Kushipa binu keyua jiwea Jehovákiaki, na janchadan
8 Jehován ana yuikin:
“Jamapai tibi en maemati kushipawenan,
nai anuxun ean en yunumiski,
eska keska tibidan,
nai anu basnun kudumayai inun nai kuin anua ui jaya wakinan.
Jabu tibidan, main tsu amis keska wakin
meketi pepa inun yunuti pepa
en kainmamiski, yunu juatan bimimis keska wakinan.
9 Mai mabu tibi jaskas jatiubus jatun ashianbe ja itidubumaki.
Ja inun, mapupan ja dayai yuikin: ‘¿Min ea jaska wai?’ ikasmai
jatun ja mabu waxudi yuikin:
‘Mianan, daya min unanmaki’,
akin yuinametidubumaki.
10 Ja inun, tsuanda juni bake wani
jawen ibubube ja itidumajaidaki,
mai anu jiwemaniwen taeadan.”
11 Jehová Israelin Dios medibi jatun Israel jawena jatu wanitun tsuada yuikin:
“¿Jaska en bakebu en jatu wamis
man ea unanti watidumen?
¿Jaska jamapai tibi en amis ea medabewakin shinan betsa man ea yusintidumen?
12 Ean en aniki, mai inun yudabu dami wakinan.
En mekenwen nai jidabi jatixun kesuntan
januxun en yunua dasibi jabu chaxatidubu taxni keyunibuki.
13 Ja dikabi eandi Ciro en taxnimaniki,
jau jatu maemanunan.
Jawen kati bai dasibi en jawama waxunxanaii.
Januxun jatun en maewan ea benixunxanikiki.
Jaska watan enabu jabun jatu iyunibu jatu mebikinankin
jatu jenematan jatu ea akin pakamama manakuti yukama ixanikiki”, iki
Jehová dasibi binua janchaxuki.
14 Jehován Israelbu yuikin:
“Egipto anua dayakapabu inun,
Etiopía anua mabu inanananmisbu inun,
Sabá anua ja yuda keyatapabu jabun matu kenwain
matun tsumai esclavo ixankanikiki.
Mane dispi chiwetameyawen nexea matu chipi mapua
matu bebun danti itan kenwankin matu yuikin:
‘Chanima kayabi matuna besti Dios kayabi matu anuki.
Ja bestijaidaki, dios betsa jayamadan’, ikaibun”,
15 Isaíasin ana jatu yuikin:
Jaskabiaibun miadan, tsuan mia uintiduma
min Israel mekekin piskumanika Dioski.
16 Tsuabunda dami yushin wamisbudan,
jabudan, dakexankanikiki.
Betsabu jatuki kaxetan usanxankanikiki.
17 Jakia Israelbudan, Jehován jatu mekekin
jatu piskumakin jeneama ixanikiki.
Jabudan, jawa babui dake taskama ixankanikiki.
18 Nai dami wanika Dios Jehovánan,
mai dami wakin taxnimaniki.
Jaska watan mestenwaniki.
Jatun mai dami watanan,
jau xaka bestiyamanun yudabu dami wadiatan jiwemakin yuikin:
“Ea besti en Jehováki, betsa jayamadan.
19 Ea janchaidan, june en isma inun
janida mai anu junea meshu anua en ismadiki.
Jacobun enabu ean jatu yuikin:
‘Janida tsua niama anu ea benakanwen’,
en jatu aismaki.
Ea en Jehová chanima en janchamisdan, kaneama ikun kayabi en yuiaii”, iwanan,
Dami yushin kenwanmisbu Jehován jatu chitenikiaki, na janchadan
20 Jehován ana yuikin:
“Matu jabu texewayamabu janida man jiwebaunabuun,
dasibi ea anu ichai bekanwen.
Jatida jawa unanbuman jatun ji dami yushin iatan xuku dakabaini
jabe janchakin jawa jatu meketan piskumatidumabia
jamen yukai janchawanmisbuki.
21 Man jadatuda dami yushinbe janchakin yukakatsi ikaidan,
jaska matu axuntidumenkain,
betsa tibi meakeakei
jabe janchakin unanti wakin unankanwen.
Na jaska tibi inunbadiaidan, bebunkidijaidadan, ¿tsuan yui chaninimen?
¿Ea besti en ikama inimen, Jehovádan?
Dios kayabi betsa ea keska jayamaki.
Dios kushipajaida maemakin mekekin binumanika tsua ea keska jayamaki.
22 Mai kesua anu jiwebaunabuun, ea anu bekanwen,
matu mekekin en matu piskumaxanaidan.
Eadan, en Dioski, ea keska betsa jayamadan.
23 Emebi janchai yubakakin
jawen maemakin binumati en yuimisdan,
ja en yubakani janchadan, en menexanaii.
Eskaxankanikiki: Dasibibun ea kenwain ea bebun danti itan,
‘Mia besti min Dioski’, ikin ea datan akin
24 ea yuikin: ‘Jehová besti kushipa maemanika paepaki’, ikaibun
jakia jatidi jabun ea dananmisbu jatuki kaxekin usanxankanikiki.
25 Ewen taea dasibi Israelin enabu jamapai chakabu binu keyutan
ewen kein benimaxankanikiki”, ikaya,