46
jamen Babilonia anuabun yushin dami Bel,jawen kena betsa Baal
inun Nebo datei saki saki iki main tin imiski.
Babilonia anuabun jatun yushin dami iyukinan,
eska wabainmisbuki.
Jatun inapan mabu bumisbuki jaki jatun yushin dami peumatan bumamisbuki.
Ina ji xankama peumabainabu jin imisbuki.
2 Ja yushin dami jawa jatu mekekin paxawatiduma main nidi ika mania
mai pakea betsa anu bukin yushinbiaken tupibaintidubuki.
3 Jehován ana jatu yuikin:
“Jacobun enabu dasibi man Israelbu jabu matu deteama texe wanibuun, ea ninkakanwen.
Eanan, man kaindiama matun ibube mekexun en matu nimakubainmiski.
En matu ikuxun iyuwawamiski.
4 Matu jaska wamisxun jeneama mestebui man buyabis buxka juxubiaya
en matu mekediakubainxanaii.
Ean matu dami wanixun jawa matu jeneama en matube medabemisdan,
eanan, matu tsumakubainkin en matu piskumaxanaii.
5 En jiwenidan, ¿en tsua keska man ea shinantidumen?
¿Jadatu ea keska en kushipaya kaintidu man shinain?
Jawa ea keska betsa tsua jayamajaidaki.
6 Juni betsabun jatun oro pei inun jatun plata pei ichapa ichawatan tanakin pisatan
jatun yushin dios wakatsi tsuanda mane mabu wamistun jau dami waxunun yunutan pakamisbuki,
ja yushin dami bitan ja bebun beti ixun duawakatsidan.
7 Ma jatu menexunabu bikin iawanxun janu tsaunti washina anu tsaunmisbuki,
jaska waimabu anua jawa xekei maetidumadan.
Junibun jui kushipawen jatun yushin dami medabewati jawada yuka chakayamabiabu
jawa jatu kematiduma inun bika teneaibu jawa jatu piskumatidumaki.
8 Yushin dami kenwain chakabumisbuun, ja yushin damikidi shinankanwen.
Namakin uian keska wama shinan pejaida wakanwen.
9 Matun xenipabu ikubidanibudan, jaskakididi shinankanwen.
Ea besti en Dios kayabiki, betsa jayamadan.
En jabia Dioski, tsua betsa en kushipa keska jayamadan.
10 En dami wakin taewani keyui kai yui en chaniniki, eadan.
Jaska taxnidiamajaida jaskanunbadiai yui en chaniniki.
Jaska wakatsi ikin yubakatan ean en taxnimamiski.
Jaska tibi jau inunwen, akin ean en yunua imiski.
11 Badi juaikidia juni betsa en ma kenaniki.
Chaijaidakea nawa tete keska juxun
jaska en yununi jatun ea axunxanikiki.
Jaska en yubakani en jancha menekin
en jaska yuini dasibi jatun ea axunxanikiki.
12 Junibu juinti kushibuun, ea ninkakanwen.
Man jaska shinanmabiaken
nawabu anua en matu taxnimaxanai ana chaijaidamaki.
13 Ean en matu taxnimabidanxanaidan,
ma kemaikiki.
Mekekin jawaidakidan en matu piskumaxanai ma chaimaikiki.
Sión mekea jaya wakinan, ean en axanaii.
Jaska watan Israelbu en kushipa en jatu anu butexanaii”, itan.
***************