Bin ewapa chaka keska nawabu chai jiwebaunabu anu Jehován jawen tsuma yunuxanikiaki, na janchadan
49
Jehován tsuma chani:“Ianenwan kexa anu mae tibi anu jiwebaunabu inun
dasibi man chaijaida anu jiweabuun,
en janchai ea ninkakanwen.
En kaindiama en ewan bake nanti medan en nanea
Jehován ea katukin en kena kayabiwen ea kenaniki.
2 En jana betsa wakin en jancha nupe chaipa kenujaida keska ea waniki.
Jawen mekenwen mekekin junekin ea aduniki.
Pia kenu dabeya keska ea watan
jawen pia aduti kapankan medan ea aduniki.
3 Ea jaska watan Jehován ea yuikin: ‘Israeliin, min en tsumaki.
Miwen en kushipa jatu uinmakin
en jatu taxnimaxunxanaii’ ”, ikaya
4 ea jawen tsumapan shinankin:
“Jamen en daya en benui
jawa biamabia dayajaidakin en kushipa
en jamen puta bestimaki”, en ibiaya
chanima dasibi en akaidan,
Diosun tsuma keyuaki.
Diosun besti jawen kushipawen
ea manakua en uinxanaii.
5 Jehová en Dioski.
Jaskawen taexun ea duawaya
jawen kushipa janua en bimiski.
En jawen tsuma ikunkainaya
Jacobun enabu Israelbun shinan betsa watan
jau janu bei jaki dasixanunbun
Jehován ea yunukatsi katutan
en ewan bake nantiki ea dami wakin naneniki, ikaya
6 Diosun yuikin:
“Jau Jacobun enabu xukua pakea tibi
jabu Israel texenibu jabu besti anu medabewakin
ea anu min jatu chintunmaxanun
min en tsuma katuxun
en mia yunuama iniki.
Jakia chaijaida mai pakea anu jiwediabu
jaska jabudi mekekin piskumakin
min jatu yusinbaunxanun bin ewapa chaxa keska en mia yunudiaii”, ikaya
7 Diosun enabu xukua betsabun jabu jatu ichakajaidawamisbu inun,
xukua betsabun danankin jatu bechipaisbuma inun,
juni puben xanen ibubun jatu achitan jatun tsuma esclavo jatu wamisbu
Jehová mekenan mebikinanika Israelbun Dios medibitun jawenabu jatu yuikin:
“Ea Jehová Israelbun Dios medibitun en matu katuni
janchai en yubakamis en matuwen menexanaii.
En matu jaska waxanaiwen taexun
xanen ibubu inun jatun juni bakebu xanen ibubundi
matu uin e itan matu bebunxun kenwain danti ixankanikiki”, itan,
Jerusalén ana jatu benimakatsi Jehová chaninikiaki, na janchadan
8 Jehován ana jatu yuikin:
“En yubakaniwen taea en duapa matu uinmakatsi ikin en matu kemaniki.
Ja xabatian matu piskumakatsis ikin en matu medabewaniki.
Matuwen yubakatan mestenwankatsis ikin
matu pe adukin en matu medabewaniki.
Matun mai pakea chakabuwanibu matu ana ibu wamatan
en matu jatu pewamaxundiakatsis ikaii.
9 Jabun matu bichinibu keska jatu yuikin:
‘Man ma jatixun bika teneshinaki.
Ana jawama taxnidikanwen.’
Man meshu medan mapua keskabudan,
ana jawaki dateama kainbainxankanwen.
Bai tibiwen bukin piti tibiki man nukuxanaii.
Janu tsua jiweabumanu mati tibi anuadi matun inabu piti jayaxankanikiki.
10 Man jawa buniama inun man unpax manuama inun,
badi chaxajaidakin matu kuama ixanikiki.
Ean matu bechipaikin en matu iyuaiwen taexun matu mekexun iyukin
janu chacha tibi unpax jaya anu en matu iyukubainxanaii.
11 Mati matipa anu bai jayamabiaken
matu bai tapinxunkin bai chakabu en matu panpa waxunkubainxanaii.
12 ¡Uinkanwen! Chaijaidakea matu medabewanun ika bekanikiki,
nortekidia inun badi jikiaikidia inun mai metujaida Asuán anua beidan.
13 Jehován jawenabu bika teneaibu ana jaska uinkatsi ikama
jatuwen nuikin ma jatu daewaiwen taea
naiin, ¡benimai sai sai ikanwen!
Mati matipaan, ¡benimai sai sai ikanwen!
Maiin, ¡benima paepai shinan chankankanwen!” ikaya
14 jakia Siónendi yuikin:
“Jehovánan, ea jenebainaki.
En Diosdan, ea jakimaki”, ibiaya
15 “Min shinanan, ainbu betsanan,
¿jawen bake kayabi bechipaibiakin jakimakin jenetidumen?
Jawen bake kayabibia jakimatiduki.
Jakia eadan, Sióneen, en mia jawa jakima taskatidumaki.
16 Ean en mekenki netankin akawaxun en mia iyuaii.
Mia kenebaunibudan, jabias keska mikidi en shinan jayaki.
17 Mia jabun benibaunkatsi shinainbudan, jin jin ikanikiki,
jabun mia chakabuwakatsi shinanibu keskamadan.
Jabun mia chakabuwanibudan, ma janida buabuki.
18 Bewenikitan min mae uinbaunwen,
dasibi ichatan mia anu ana bei jaskabidankanimenkainan.
Ea Jehová en jiweawen ibubis mia akatsi en yubakaii.
Dasibi jabu bexunan, mane inun tadi jawendua mia sawemakin akawai bekanikiki,
ainbu beneyakatsi daumis keska mia wakinan.
19 Min mae dasibi pude pude akin yamawakin chakabuwanibu mania anudan,
natianan, min mae ana jatiuidama pexeishta anu
yuda jiwebauni dama ixanikiki.
Jaska inun, jabun matu yamawanibudan, ma nenuma buyamabuki.
20 Matun bakebu chai iyunibu ibuuma janchaibu man ninkaxanaii, eskaibudan:
‘Na nukun maedan, jaskaida pexeishta daka.
Nun janu jiwenun janu jiweti mae ewapa nuku axunwen’, ikaibun
21 matun juinti medan janchai:
‘¿Tsuan jatida bake ea waxunimen?
Jaskatan bakeyakin en bake bitidumaki.
Ewen jiwenibudan, jatu chai iyukin ma ea jatu jenemabainibuki.
Ja bakebudan, ¿tsuan jatu yumewaimamen?
Ea besti wakin jenebainibuki.
Na bakebudan, ¿jadakidia beshianbumen?’ ” ikaya
22 Jehován yuikin:
“Jau min juni bakebu jau puntsaumetan iwekin
min ainbu bakebu jau iatan mia anu iwenunbun
nawabu xukuabu en jatu yunuxanaii,
mae tibi en unanmati jatu uinmakinan.
23 Jabu xanen ibujaidanibu betsaidan,
jabu inun jatun ain matundi man jatu tsuma waxanaii.
Matu dayaxunkin matun bakebu matu mekexunxankanikiki.
Ja inun, jatun ainbu bakebun matun bakebu matu chuchu amaxunxankanikiki.
Matu bebun main beti ika dakaxun jabun matu kenwankin
jatun janawen matun tae taxuxankanikiki.
Matu jaska waibu uinkin chanima en matun Jehová man eki chiti imis
man ana jawa eki dakeama ixanai man unanxanaii.
24 Detenamenika unaintun detenamekin jawen jawada bishianan,
¿tsuan mebintidumen?
Juni pubenen tsuada achitan kene medan bichishinadan,
¿jaskatan kainkaintidumen?” iwanan,
25 Jehován mestenwankin yuiadan:
“Ja detenamenika kushipatun jawada juni betsana bishian
chanima ana mebinxuntiduki.
Ja inun, juni pubenen jawen jawada bianbiashinken
chanima mebintiduki.
Jabu matuki sinatai ja ikaibu ea en matu janchaxunxanaii.
Ean kayabis matun bakebu en matu piskumaxunxanaii.
26 Jabun matu yunu yunu akin bika tenemamisbudan,
ibubis jatunabubetandi bika tenexankanikiki,
jatun nami ibubis piai keska wakinan.
Ibubis jatun jimiwen paenxankanikiki, vinowen paean keskaidan.
Jaskaibun ja dasibi yuda jiwebaunabun
ea en Jehová matun mekenan piskumanika inun
ea en Jacobun kushipajaida inun ea en matun mebikinanika
jabun ea unanxankanikiki”, itan,