50
Jehován jatu yuikubainkin:“Juni betsa jawen jawada biankin
en dibiamawen taexun
pakakin jau matu jawen tsuma wakin
esclavo wanun en matu yunuama iniki.
Ja inun, juni betsan jawen ain ana bechipaiama
danankin jenemis keska wakin
Israel matun ibubu en jawa jatu danankin nichianmabia
jakia ibubis chakabukin
en jancha ninkaisbumawen taexun
matun ibubu Israelbu danankin
en jatu yununiki,
jau nawabun jatu tsuma wayununbunan.
2 Ana matu medabewanun ika juxun
en jawa juni betsa bechiama iniki.
En matu kenabia tsuan taska man ea kemama inibuki.
En matu jaska wabia ¿jaskakin man ea benakin shinainsmamen?
Eanan, matu medabewakin en matu piskumatiduma
¿man ekidi shinain imismen?
Jabun matu tsuma wabu anua en matu taxnimatiduma dabanen
¿man shinain imismen?
Eadan, en kushipaki. Ianenwan yunukin:
‘Jawaida jene netsui metuwe’,
en wa itidu inun
jenedi betsa wakin metu wakin en tsusin wanyan
baka unpax manui mawai pisimayatiduki, jene jayamakenan.
Ja jene netsua anudi maidi janu tsua jiweabuma en watiduki.
3 Nai kaxai keska wakin meshu wakin en
bepua tsuada mawashinken jatu manui punu nukamisbu keska en wamiski.”
Jehován tsuma Dioski chiti itan jawa dateama ichakawabiabu tenekubainxanikiaki, na janchadan
4 Jabu nuitapai punu nukabu ea Isaíasin en jatu medabewakin benimawaxanun
Jehován ea unanepa watan ea yununiki.
En xabakabi pe ninkakubainun medabewakin
xaba tibi Diosun ea pe yusinkubainmiski.
5 Jehován tapinmakin ea unanepa waya
jawa danain jaki pechi
en jawen juinti kushismaki.
6 Jau ea kakush kakush anunbun
en pechi en jatu inankin yunumiski.
En kexni ea tseka tseka akaibu
en jawa jatu nemaismaki.
Jabun ea ichakawakin eki kemu michuaibun
en besu junei en jawa tininsmaki.
7 Jehován ea medabewamiswen taea
tsuabunda ea ichakawakin ea isin tenemaya
datei chintuanma tenea en mishki kushipa keskaki.
En xanen ibu kushipatun ea mekeaya
jabiatiandi eki kaxebiaibun jawa datei
en jawa dakeama ixanaii.
8 Jatun ea mekemistun ea kexeken
tsuada eki sinatai juayadan,
jatun unanti wakin pewanikatun
jau nuku pewanun janu bunankanwen.
Tsuanda en chakabukidi ea chitekatsis ikidan,
juxun jau ea yui benunbunwen.
9 Jehová Dios kushipatun ea medabewamiswen taexun
tsuan ea chitetan ea jawa ichakawatidubumaki.
Dasibi jabu eki sinatamisbudan, yamaxankanikiki,
ja nakaxan tadi pikin keyumis keskaidan.
***************