Jerusalén ichakawakubainaibu Jehová mebikinankatsi chaninikiaki, na janchadan
52
Jehován yuikin:“Sióneen, ¡bestendiwe!
¡Bestentan pei kushipadiwe!
Maewan Jerusalén medibituun,
jabun Dios ikunwanbuma juni chakabu
ana mia anu chintunbidan jikiama ixanaibuwen taea
min tadi jawenduajaida sawediwe.
2 Jerusaléen, ¡beni kushipadiwe!
Min tadi anua mai kudu tatan
xanen ibun tsauti anu tsaudiwe.
Sión chipash mia tsuma wanibuun,
¡mane dispi chiwetameyawen mia tenexnibu tepekediwe!” atan
3 ana Jehován jatu yuikin:
“Matu esclavo tsuma wakubainkin jawa pei jexeishta matuwen taexun en biama iniki.
Janua natian ean matu pekakinan,
jabudi en jawa pei jexeishta en jatu inanmadi inanxanaii.
4 Ja dukun enabu bui taeidan,
Egipto anu dukun jadi nawa keskai jiwenibuki.
Janua betsadan, jabun jawa chakabu jatu wamabia eiskaun
Asiria nawabun jatu ichakawakin bika ea jatu tenenmanibuki.
5 Natianan, ¿jatu jaska waibu jawa jatukidi en uiain?
Enabun jawa jatu wamabia Babilonia anu jatu iyunixun
jatu ichakawai jatuki kaxei kein janis Diosunabu daka
jatu wai eki sinatai janchai jeneabumaki.
6 Jatianda enabu medabewai en ana juaya
jabun ea unanxankanikiki,
jaska ea Jehová en janchani jatu anua en taxnimayadan”, ikaya
7 tsuada mati matipa anu jukin chakabumakidankin
kakape yuinun ika jui benimakidanai uiainbun
Dios anua pepa unanuma jiweti chani inun
jaska chakabu anua taxnitidubu chanitan Sión yuikin:
“Min Diosdan, ¡xanen ibujaidaki!” axanikiki.
8 Jehová ana Sión anu chintunkidani juai mae mekenikabun ibubis uintan benimakin
jawenabu unanmai jui kushipawen jatu sai ixuainbu ¡ninkaxankanwen!
9 Jehová jawenabuwen nuikin jatu maemaxun matu daewakin
man Jerusalén matu pudenibu maniadan,
ma matuki sinataibu jatu nichintan matu taxnimaiwen taexun
kenwain jatube sai sai ikin jatu kemakanwen.
10 Jehován jawen kushipa jatu uinmaxanikiki,
dasibi mai pakea nawa xukua tibi anu manibaunxun uiainbunan.
Dasibi mai jidabi anuxun ma nukun Diosun nuku mekekin piskuma ninkakin unanxankanikiki.
11 ¡Menan Babilonia anua taxnidikanwen!
ana jawa atimapa meama taxnitan kainkainidan.
Man jabun Dios kenwanti jiwe mabu buxanaibudan,
ana chakabuwama pe mekei xunpindikanwen.
12 Jabu man kainbainxanaibudan,
Jehová Israelbun Diosun matu kexeakeakebainaiwen taea kaidan,
jin jin iki jawaida kainbainama inun junebaini paxayamaxankanwen.
Jehován tsumapanan, bika betsa betsapa maemaxanikiaki, na janchadan
13 Jehován ana jatu yuikin:
“En tsumapan dasibi binukin keyuaya
xanen ibujaida wakin dasibi jatu binumatan en tsaunxanaii.
14 Yudabun jaska tenetidumajaida wakin jawen yuda atimapa wakin
ana juni kuin keskama waxanaiwen taea e iki jawen datexankanikiki.
15 Jaska uatian nawa xukuabu tibi inun jatun xanen ibubun jawa uinsbuma
na jabiatian uinkin ninkai jakidi tapinkin jawa jancha yuitiduma e iki jawen datexankanikiki”, ikaya,