53
jaska nun ninkaidan,¿tsuan ikunwantidumen?
Jehován jawen kushipadan,
¿tsua xabakabi ma uinmaimamen?
2 Mai tsusinjaida anu miban tacha uke medanjaida ka
jawen pei benei pekaunmis keskai
Jehován jawen tsuma yumeai uinkatsis ikikiki.
Jawen yudadan, jawa jawenduakin jatu jawen kemumakin
bechipaimatiduma ixanikiki.
3 Yudabun jakidi chakabu shinankin dananxankanikiki,
ja junin isin betsa betsapa mekin beyawai nuitapaidan.
Tsua dabanen jawa unanma uinsma akawakin nukubun nun dananxanaii.
4 Nun jaska wabiaya jatun nukun chakabu bukin
nukun chakabu nuku tenexunxanikiki.
Nukun chakabu nun jawen isin teneai bitan nuku mexunxanikiki.
Nukun nun uiainan, Diosun detekin ichakawai dakeai nun shinaiin.
5 Nun atimapai chakabumiswen taexun
ja juni nukuwen taexun chachikin pishpe axankanikiki.
Nukun chakabuwen taea
ja chakabumis keskakin nuku tenexunxanikiki.
Ja ichakawabu nuitapabiakinan,
unanuma jiweti nuku kainmaxunxanikiki.
Ja yumanwankin deteabuwen taeadan,
nukun yudadan, isin jayamai kayaxanikiki.
6 Dasibi nukubudan,
nun jamakidi baiwen buxankanaii,
chaxuwan tibi jawen baiwen buama benumis keskaidan.
Nun jaskabiaya Jehován dasibi nukun chakabu bitan
jawen tsuma nuku peumaxunxanikiki.
7 Jabun achitan ichakawabiabu jawa jatu nemama inun
jawa jancha betsa yui taskama ixanikiki.
Jabun chaxuwan detemisbun chaxuwan bake detekatsi buabu
“maan, maan” isma keskai jawa yuiama ixanikiki,
chaxuwan jawen dani mextekatsi bichimis keska wabiabudan.
8 Jawama nibiaken chaniwen taexun ja juni bichiaibun
ja juni tsuan nemakananxunama inun
janu iyuaibu tsua jawen nuiama ixanikiki.
Na mai anua ja juni betsekin akawakinan, atimas tenankin
enabun chakabuwen taexun kupixankanikiki.
9 Juni chakabu mawa jatu maiwamisbu anu
jabu dapi maiwaxankanikiki.
Jawa kanei chakabuisma inun jawa chanichakai janchaismabiaken
ja juni chakabubube maiwaxankanikiki.
10 Jehován jawen tsuma bika betsa betsapa jawena wamaxanikiki.
Nukun chakabuwen taexun jawen jiwea yaushiama inanxanaiwen taea
jiwea chaipa bitan bababu midima uin jatuki nukuxanikiki.
Jehován jaska bechipai yubakani
jawen tsumawen taexun jaska tibi menexanikiki.
11 Juinti xuduxun bika tenekubainkin
atimas maematan bestentan xaba uin jawen benimai shinan chankanxanikiki.
Yuda ichapabun chakabu madiastun jatu tenexunkin
Jehován tsuma kaneismatun jatun kupiti bixunkin jatu putamaxanikiki.
12 Jawen tsuma pepa jawen jiwea jawa yaushiama mawaxanaiwen taexun
Diosun duawakin jawen tsuma kushipa betsabube manakukin
ja jawen tsuma duajaidawaxanikiki.
Juni chakabu keska wakin chitebiaibun
yudabun chakabu ichapa buaxunkin
jabun chakabuwamisbu jatu ea axunxanaiwen taexun
pepa bestiwen Diosun manakuxanikiki.