Israelbu Diosunabu jawen ain keska jatuwen nuikin jenetidumakiaki, na janchadan
54
Jehová Diosun matu yuikin:“Ainbu tsuanda jenebiabainitun
ja ainbu betsa beneyabiaken
ja ainbu jawen benen jenebainyamatun
bake ichapa bikin min jatu binunxanaii.
Min jaskawen taea ainbu bake bitiduma inun
min jawa bake kain isin meismaan,
min bakeumabiadan, benimai shinan chankain sai sai iki
kanta chakayamadiwe”, mia waikiki.
2 Min tadi jiwe min janu jiwea ana janxekakin jaxpa ewapa wadiwe,
jawa dateama ana puntebaunkin
jawen dispi chaipa waxun mestenwankin
jawen nichinti tibiki masta akeakewe,
3 chipu yusiudi inun yusmaudi minabu pai manibaunkin
nawa xukua ichapa jatu achitan
natian ja mae janu tsua jiweabuma anu
jabun maewatan jiwexanaibuwen taeadan.
4 Miki jawa kaxekin mia usanma ixanaibuwen taea
jawa dateyamaxanwen.
Miki sinatama ixanaibuwen taea dakeyamaxanwen.
Min chipash yumechakai chakabuni jawen dakemisdan, jakimawe.
Mia ichakawakin min benen jenebainkin mia dakewanidan,
ana jas shinanyamawe.
5 Mia jatun dami wanitun natian ana miki nukukin ainwankin akawatan
mia jaska duawakin dasibi min jiwea betsajaida waxanikiki,
jawen kena Dasibi Kushipa Binujaida Jehovánan.
Min mebikinanika Israelin Dios medibi
ja dasibi mai jidabi dami wani Diosunan, mia jaska waxanikiki.
6 Matu man Israel ainbu chipash jenebainibu man bika teneai keskaki.
Jakia matun Diosunan, ana matukidi shinan betsai petan matu kenakin yuikin:
7 “En matu jeneyubainxanaii, jatixuinda kamadan.
Jakia en nui pae ewapawen ana chintunkidan
matuki nukui en matube ketaxameyuxanaii.
8 Jawaida matuki sinatakauan matuki dakei
matu anua en idubiaima
jakia en nui ikibi ini ja en nuimis en ana matu uinmaxanaii”,
ikikiki, matun mebikinanika Jehová janchai chanidan.
9 “Jaska inun, Noé jiweatian jene ewawatan
mai jidabi achi keyushinxun chipu Noé yubakin:
‘En ana jene ewawakin mai achi keyuama ixanaii’,
ika en yubakani keska
natian jabiaskadi en yubakadiaii:
‘En ana miki sinatama ixanaii.
Ja inun, en ana pubenkin mia date date akama ixanaii.
10 Mati matipa ibubis maebiai inun
mawa matekei nidi ibiaya
jakia en nui ikibi ika miwen taeadan,
jawa betsai maetiduma inun
en yubakani jawen unanuma jiwemati
jawa betsa wakin en maewatidumadiki’ ”, iki
Jehová miwen nui janchaikiki.
Jerusalén bena wakin betsajaida waxanikiaki, na janchadan
11 “Mae danankin mia ichakawakin nuitapawanixun
tsuan mia daewai miwen nuisbumabiaken,
ean min mishki bemaki mia jawendua wakin
bui nanke deken ji ji ikaiwen en mia bepuxxanaii.
Mishki jawen mestenwanti zafiro nanke chaxakapawen en mia mabuyaxanaii.
12 Min jiwe keyatapa januxun uinbaunti rubí tashi jushinipawen en dapuxxanaii.
Jawen beputi berilo tashi kudupawen en bepuxxanaii.
Nenkati kadujaidawen dasibi min mae jidabi en mia kenebaunxanaii.
13 Januxun eanan, min bakebu dasibi en tapinmaxanaii.
Jabu dasibidan, benimai jawenduai unanuma jiwexankanikiki.
14 En yunuti pepa kushipatun mia mestenwan
ana mia ichakawakin tsuma wama inun
min ana jawaki dateama ixanaii.
Min date paepamis ana chintunkidan mia achiama ixanikiki.
15 Tsuanda mia ana detenun ikaidan,
jaskaibudan, ean en ana mia jatu yunuamaki.
Jakia tsuanda mia detenun ikaibudan,
mian ibubis min jatu maemaxanaii.
16 Jabun mane mabu wakin jabun xun xun akin
jawen detenameti mabu betsa betsapa wamisbudan,
ean en jatu dami watan kainmamiski.
Junibu jabun jatu tenankin jau jatu yamawakin nishma wanunbun
ean en jatu dami watan kainmadiamiski.
17 Jakia miadan, piawen mia yamawatidubu jawa jayamaki.
Jabun mikidi jawada yuikin chiteaibu jamenki.
Na en jancha en matu inainan, tsuabunda ea ikunwankin chibainbu
ean en matu binumakin maemama ewen taexun matun pepa man bixanaii”,
iki Jehová janchakin mestenwainkiki.