Yuda dasibibu jawen duapa Jehován jatu uinmakatsi jatu yubanikiaki, na janchadan
55
“Tsuabunda man unpax manuaibudan,ea anu bexun akanwen.
Tsuabuda man pei jayamabia bekanwen,
jawa pakama xekiwan trigo inun,
uva vino inun, awa chuchu bi beidan.
2 ¿Jaskai man jamen pei inanananmismen,
pitimabiaken jamen putakinan?
¿Jaskakin matun daya pei man jatu inanmismen,
jawa matu medabewakin shinan chankanwatidumabiakenan?
Ea ninka pewakubainkin man piti pepa pixanaii,
jawada piti kemutapa man bechipaiai pikinan.
3 Eki kemai ea anu bexun ea ninkakanwen.
Ea ninkajaidakubaini man jiwexanaii.
David bechipaikin yubanixun amakin en menexuni keska wakin
matube yubakatan jenepaketima en matubedi yubakatsis ikaii.
4 En jaibu David ekidi chanikaunti ean en nawabu unanti wamaniki,
xanen ibukin jau jabu ekidi tapinmaxanunan.
5 Nawabun matu unanbuma man jatu kenaya
jabun matu unanmabia ninkanun ika matu anu kushibidanxankanikiki,
ea Jehová Israelin Dios medibitun
en kushipawen en matu duawaiwen taeadan”, ikai ninkatan
6 Isaíasin jatu yuikin:
“Man Jehováki nukukatsis ikaidan, menan kenadikanwen,
na jabia chaima matu dapi nia man jaki nukutidukidan.
7 Juni chakabubun jau jatun jiwea chakabu inun
jatun shinan chakabu jenetan jau Jehová anu benunbunwen.
Man jaskaibuwen taea Jehová matuwen nuixanikiki.
Matun chakabu jenetan Dios anu chintundibidankanwen.
Jadan, matuwen dabanan ikin matun chakabu matu buaxunxanikiki.”
8-9 Jehován ana jatu yuikin:
“En shinanan, matun man shinanmis keskamaki.
En jaska amisdan, matun man amis keskamadiki.
Nai keyatapa nenumajaidatun mai binua keska
en shinanmis inun jaska en amistunan, matun shinan en binuaki”, ikin
Jehován jawen jancha chanima mestenwaniki.
10 Ana yuikin:
“Ui inun matsi tanki nai anua mai anu bututan ana jawendi chintuanma
mai mecha wakin pepa wa yunu banabu jukunmakin pexemamiski.
Janua jawen jexe ewatan kaniai ja bimi tsekatan misi watan pimisbuki.
11 Jabiaska keskadiai en janchawen en jatu jancha wa
jawa wadiama ea anu jamen ana chintuntidumaki.
Jakia jaska en uinkin bechipaiai keska en jatu yunua
jabun akin menemisbuki.
12 Nenu Babilonia anu man Israelbu benibu
ana matun mae anu chintunbaini benimabaini bui
matun mai pakea anu unanuma man jikixankanaii.
Man jaskabainaibu matu uintan
mati matipa inun mawa tibi matuwen benimai kantaibun
ni xukuabun matu uintan matuwendi benimakin
meken paux paux akai keskai bubi bubi ixankanikiki.
13 Janu ana muxa beneama jawen xantukun ji pino benexanikiki.
Ana nishi muxaya beneama nishi jua pepaya benei mai bewexekexanikiki.
Jaska tibi kain beneai ea Jehován unanmati uinkin
en kena kushipa jawa tsuan yamawatiduma ikibi ika uinxankanikiki”, iniki.
***************