Samake kayabikin uinmaidan, eskatikiaki, na janchadan
58
Jehován ana ea yuikin:“Dateama sai ichakayamatanwen,
mimawati trompeta chan akai keska wakin min jui kainmakinan.
Enabun kanekin chakabuwamisbu ja akin
Jacobun enabu jatun chakabu jatu chitekin ja atanwen.
2 En jiwea bai unain benima bestinun ixun xaba tibi man ea benakubainaii,
mae pepawen jiwea ikasi pepai inun
en yunuti jancha chakabuwama kaneama ikasdiaidan.
En yunuti kushipa pepa ea yukatan ea bepadankin
ea uinmai benimabidani ea anu bemisbuki.
3 Jaskabiai matu yuinamei:
‘¿Jaskai jamen nun samakemismen,
Diosun nuku uianmabiakenan?
¿Jaskai jamen ibubis nun bika teneai,
Diosun nuku tanamabiakenan?’ iki man jaska janchamiski.
Ja xabatian samaketi en medibi wabianiken
janu ea samakexunama ja xabatian mabu inananankin
matun dayakapabu ichakawakin man jatu yunuchakayamamiski.
4 Ja xabatian samakeidan, man eskamiski,
ja iki kunyan ikidan, detenameidan,
pubenkin matun mekenen jatu kushakinan.
Ja xabatian samakei man jaskamiswen taexun
ebe janchakin man ea yukaibu en matu jawa ninkaismaki.
5 Matun man shinanan, man samakeaiwen ea benimawaidan,
eska dakati dabanen man ikai, bika teneidan,
matun buxka tinian daka tawa puaka keska dakadan,
tadi bexa xeni sawetan mapu mapu tukutan dakadan,
‘Jaska dakaxun Jehová en benimawaii’,
ikin man yuimiski, samakekinan.
6 ¡Jaskatimajaidaki!
Samakea kayabi ean en bechipaiaidan,
eska tibi shinain itiki. Ninkaidakanwen.
Mane dispi chiwetameya nasa keska wakin
yunuti chakabu pekakanwen.
Jatu bika tenemakin man juni betsa nexakin akawadan,
ana jatu bika tenemama jenekanwen.
Jatu ichakawaibu medabewakin jatu mepanmakanwen.
Tsuanda jatu yunuchakai man pubenmisdan,
yamai bextekedikanwen.
7 Tsuabuda buniaibu matun piti paxkaxun jatu pimakanwen.
Nuitapai jiweuma mapuabu matun jiwetan jatu ixun jatu uxankanwen.
Tsuada tadiuma matun tadi betsa jatu sawemakanwen.
Minabu kayabi jatu medabewakin jeneyamakubainkanwen.
8 Man jaska wakin samakekin ea uinmakubainaibudan,
matun akadan, penai xaba chaxamis keska en matu waxanaii.
Jamapai bika man teneai jawaida man xuxaxanaii, dete bui keskaidan.
Kaneama man pepa wamisdan, mia bebun taxniaya
en kushipa pepawen matu mekexun en matu unanmakubainxanaii.
9 Januxun ebe janchakin man ea kenaya ninkatan en matu kemaxanaii.
Jawada mei datei bis ikin man ea jawaida yukaya ean matu kemakin:
‘En nenuki’, en matu axanaii.
Jawada atimapan matu tsuma man yamawakin keyuai inun,
juni betsa man ana jatu ichama inun,
metukin man ana jatu yuanma inun,
10 buniaibu mian kayabis man jatu medabewakin pimai inun,
jawada bika teneaibu man jatu medabewamisdan,
jaskai man pe jiwea meshu medan bin chaxa keska matu uinxankanikiki.
Kanei man chakabubiashinken tsuan ana jaska shinanma
badi manananbi badi pexea keska pe besti matu uinxankanikiki.
11 Man jaskakenan, eadan, matube ketaxamea matu mekekubainkin
janu buniaibutian man pinunbun janu tsua jiweabuma anu piti jamen ikai en matu waxunxanaii.
Matun yuda babuaya en matu ana kushipa waxanaii.
Man miban bana matu nashima keska wakin en matu duawaxanaii,
chacha unpax jawa jene netsutima keska wakinan.
12 Matunabun mae tekekin di anibu nawasantan ana benixankanikiki.
Ja mishki matun xenipabun anibu nenumajaidadan,
ja mishki tsamabaunibu ana matu pewaxunxankanikiki.
Ja matun mae ana pewakin ma jaska waibun
matunabu jatu kenakin: ‘Mae xeni pewakin kenebaunibu beninikabu inun
jiwe tekekin di anibu ana benibaunikabuki’, jatu waxankanikiki”, itan,
Sábado juindukuntidan, medibikiaki, na janchadan
13 Jehován ana jatu yuikin:
“En juindukunti wani sábadotianan, jaki mesekubainkanwen.
Ja xaba medibi en wanidan, enaki.
Jaskawen taea ja xaba medibitian janu matun daya tibi
janu man ana jawa metidubumajaidaki.
Janu juindukunti xaba en wanidan, benimati xabaki.
Ja xaba medibitianan, ea en Jehová man ea jabi duawai keskaki.
Ja sábadotian matun jawada daya shinanma inun,
matun mabu inananain shinanma ea benakin ea duawabestikubainkanwen.
14 Man jaskakubainaibudan,
ea anua matun benima pae man bikubainxanaii.
Matuki sinataibu en kushipawen matu maemamatan matun mae anu ana iyuxun
en matu xanen ibu waxanaii.
Matun xenipabu Jacob en yubani keska matubu en matu inanxanaii,
man jawen benimaxanunbunan”, ikin
Jehová kayabitun jawen jancha jaska mestenwankin yuikiki.
***************