Jehován Jerusalén ana bena wakin jawendua waxanikiaki, na janchadan
60
“Jerusalén anuabuun, benimai benidikanwen.Jehován ana matu medabewai taxnitan
jawen kushipa bin keska matu anu achimakin
ma matu anu chaxa waikiki.
2 Yamepanan, mai bepuaki.
Meshu ten ikaitunan, nawa xukuabu achiaki.
Jakia Jehovánan, jawen chaxa matu anu pexakin
jawen kushipa matu uinmaiwen taea
3 ja uintan nawa xukuabu tibi matun mekenan uin bexankanikiki.
Xanen ibujaidabun matun kushipa penai keska uinun ika
matu anu bexankanikiki.
4 Bewenikitan matu dapi uinbaunkanwen.
Uinkanwen, dasibi jaska tibi ichatan matu anu bexankanikikidan.
Matun juni bakebu chaijaida jiweabu bexankanikiki.
Matun ainbu bake mishtinbu jatu puntsaumexun
jatu iwexankanikiki.
5 Matun bakebu beaibu man uianyan benima paen matu achia
man juinti shinan chankan paepaxanaii.
Maewan ianenwan kexa anu jiwexun mabu pepa ichawaimaxun
bexun matu inanxankanikiki.
6 Madián nawabu anua inun Efá nawabu anua
camello bei chichikinanbidankin mabu peutan beaibu man uinxanaii.
Ja inun, Sabá mai pakea anuxundi camello midimaki
oro inun ininti pepa peumatan bemaxankanikiki.
Jabu bekinan, Jehován kushipa kenwankin yuibidanxankanikiki.
7 Dasibi Quedarin enabun chaxuwan xukua matuna ixanikiki.
Nebaiotin enabun chaxuwan bene tibidan, matuna idiaxanikiki.
Jadatuda bitan ea Jehován chi tapukixun man ea menuxunkin
ja inankuinwen man ea benimawatidubuki.
Man ea jaska waxunaya en Templo ana jawenduajaida wakin
en matu uinmaxanaii.
8 ¿Tsuabumen, ja nai kuin keska nuyabaunaibu inun
deiwan jatun xui anu jikiai keskaibudan?
9 Jabudan, xaxuwan tibi ichatan beaibu
maewan Tarsis anua xaxuwan betsa betsapadi bebukidankin
matun bakebu chaikea matu iwexunkin
jatun oro inun jatun plata jatu bemaxankanikiki,
ea Jehová Israelin Dios medibitun en matu kushipajaida wai
ea duawanun, ika beidan.
10 Matunabuma nawa betsabun matun mae kene
ana benibaunxankanikiki.
Ja jabu xanen ibujaidamisbun matu dayaxunkin matu duawaxankanikiki.
Ea Jehová matuki sinatakin en matu kupibiani
natian en duapawen ana en matuwen nuixanaii.
11 Matun mae beputidan, bepemanasa ixanikiki,
ana badidi inun meshu medan bepuamadan,
ja nawa xukua xanen ibujaida tibibun
jatun mabu pepa matu janu jikibidankin
jau bebidan bebidanxanunbunan.
12 Mai pakea betsan jabun matu bechipaisma
jabu yamai ana jayama ixanikiki”, iwanan,
13 Jehován ana Jerusalén yuikin:
“Ja ji jawendua tibi pino inun, abeto inun, ciprés
Líbano mati matipa anua matu anu bexankanikiki,
en Templo ana jawendua wakin
janu en tae en janaxanai anu ea bechipaimati wakinan.
14 Jabun matu ichakawapaunibun bakebudan,
matuki mesei matu bebun beti iki bexankanikiki.
Jabun matu dananjaidabiapaunibu matun tae naman danti ixun
yuikin: ‘Man Jehován maewanki.
Siónan, Israelin Dios medibitun maewanki’,
akin matu kenaxankanikiki.
15 Ana tsuan matu jenebainama inun danankin
matu besti xununbainama ixanikiki.
Jakia ean matu jawendua wakin en matu ikibi imaxanaii,
janua benimai jenepaketima matu wakinan.
16 Nawa xukua tibibun jatun piti pepajaida bexun matu inanxankanikiki.
Nawa xanen ibubun jatun mabu jawendua kadujaida
matu bexunxankanikiki.
Matu jaska waibu uinkin ea Jehová en matun piskumanika man unanxanaii,
Jacobun medabenanika kushipajaida eadan, en matun mebikinanikadan.
17 Man jaskawen jiwenun en matu pewaxunxanaii.
Ana mane bronce matu inanma jawen xantukun mane oro kadujaida en matu inanxanaii.
Ana mane kushipa hierro matu inanma
jawen xantukun mane kadu plata en matu inanxanaii.
Ana ji bexa matu inanma jawen xantukun bronce en matu inanxanaii.
Ana mishki matu inanma jawen xantukun hierro mane kushipa en matu inanxanaii.
Eanan, ja unanuma jawama jiwetiwen en matu xanen ibumaxanaii,
yunuti padananainsmawen matu yunumakinan.
18 Matun mai pakea Israel anua itimaskai detenamebaunaibu
man ana ninka taskama ixanaii.
Jabianudi matun mae ana yamawama inun jiwe di akama ixankanikiki.
Jakia matun maewan kenekauana kenakinan:
‘Janu Mekea Kayabi Pepaki’, akin
jawen beputidan, ‘Benimakin Kenwantiki’, axankanikiki.
19 Ja jaskaitian ea en matun Jehová en chaxa ikibi ixanaiwen taea
ana jawa badi chaxai inun uxe meshu medan chaxa jayamabiaken
man manuama ixanaii.
20 Ea en matun Jehová en chaxa ikibi ixanaiwen taea
matun badi jawa nuka taskama inun
matun uxe jawen chaxa keyui nukama ixanikiki.
Jawada bika betsa betsapa man tenekubainmis
jaskaitian keyuxankanikiki.
21 Dasibi matunabudan, juni duapa pepabu besti ixankanikiki.
Matun mai pakea man ana bixanaidan, matuna inunbadikiki.
Miban mextetan ean en matu banani keska
jawen kataku jukunmis keska man ixanaii.
En kushipa uintan jau ea duawaxanunbun
en mekenen en dayamis keska
en matu pepa wamis uinxankanikiki.
22 Man yuda ichapama xuku pishtabia paidan,
1,000ti tibi matu tanaxankanikiki.
Man ichapama pishtabia man maewan tsekaxanaii.
Jaska en yubanidan, ea Jehován akatsi en chanini ixanikiki,
janu jatianda taxniaitian jawaida ikidan, jaskaxanikiki”, inikiaki.