Israelbu jatu mekekin piskumakatsi jatuki Jehová chaninikiaki, na janchadan
61
Jaskaya Jehován ea katukin xeniwen ea mauka keska wakinjawen Yushin kushipa ea jikimatan ea yunukin:
“Nuitapaibu jatu shinan chankanwain
kaka pepa jatuki chanitanwen.
Bika teneaibu jatu medabewatanwen.
Jatu nanta iyukin tsuma wabainibu keska inun jatu bichinibu keska
jaska wakin en jatu unanuma jiwematidu jatuki chanitanwen,
jaska wakin en jatu pekatidudan.
2 Ea en Jehová ja baditian en jatuwen nuikin
en jatu medabewaxanai jatuki chanitanwen.
Ja xabatianan, nukun Dios ja nukuki sinatamisbu
nuku jatu kupixunxanikiki, iki jatuki chanidan.
Dasibi punu nukabu jatu medabewakin
ea jatu daewaxuntanwen.
3 Sión anu bika tenei jiweabudan,
ana chi mapu jatu mapu tukumama
maiti jawendua inankin jatu sawematanwen.
Nui kaxachakayamisbu jatu nese watan
benimati xeni ininipa jatu inantanwen.
Tsuabuda jawawen jaskatima medabewakin benimawakin
kantati shinan chankanti jatu yusintanwen.
Min jatu jaska wa yudabun jatu kenakin:
‘Ja ji kushipa tekeisma Jehován bananixun jawen kushipa jatu unanmati jiki’, akin jatu kenaxankanikiki.
4 Jiwe tibi di ini xeni ana benixankanikiki,
matun xenipabun jiwe chakabuwanibu pewakinan,
ja maewan tibi ana nawasantan pewatan man jiwebaunxankanaii.
5 Nawa betsabu matunabuman matun chaxuwan xukua inun,
matun bai inun, matun uva bai
jabun matu dayaxunkin mekexunxankanikiki.”
6 Jabun matu kenakinan: “Jabu Jehován tsumabudan,
jawenabu Diosbe janchaxunikabuki”, matu waxankanikiki.
Nawabu chaikexun jatun jamapai ibubis matu bexuanbu
man jawen benimai shinan chankanxanaii,
jatun tadi jawendua inun jatun dauti pepa sawea mapuadan.
7 Man enabu jabu matuki sinatakin ichakawakin matu dakewakubainibu
nuitapakin bika midima man mekubainima keska
natian ja binumakin matun mae anuxun
mabu kadu midima inun benimai shinan chankain jenetima bi
man jawen jiwekunkainxanaii.
8 Diosun jatu yuikin:
“Yunuti kushipa pepa ea Jehován en bechipaimiski.
Jakia jabu yumetsumisbu inun yuda betsa tenanmisbu
danain en jatuki sinatamiski.
En shinan jaskawen taea enabu jabu duawakin jeneama
pewen jatu manakukatsi iki en jatube yubakakin
mestenwankin en akibi axanaii.
9 Matun bababu pakubaini pe jiweabun
nawa xukua tibibun jatukidi pe shinankin
kenwankin yuikubainxankanikiki.
Jehován jawenabu pewen jatu duawakubainai
dasibibun jatu uinkin unanxankanikiki”, ikaya
10 Jaskakidi Jehová yubakakunkainaiwen taea
ea en shinan chankaiin.
Jawen meketi jaya ea inankin piskumatan
jawen yunuti kushipawen ea mekekin binumakin ea duawakubainikiki,
juni ainyankatsi iki jawenduakin maiti pepa sawemis keskai inun
ainbu beneyanun, iwanan, jawenduakin
dauti betsa betsapawen daumis keskaidan.
Jaskawen taea en Dioswen en benima chakayamaii.
11 Jaska miban mai anua jukuin pexei taemis keska inun
bai watan jawada jexe betsa banashinabu
pexetan jukuin ewamiski.
Jaska keskadi wakin Jehován jawen kushipawen
jawenabu jatu binumakin
dasibi nawa xukuabu jatu kantamakin kenwanmaxanikiki.
***************