Jaki sinataibu Diosun jatu kupinikiaki, na janchadan
63
Isaíasin Dios yukakin:—Ja jawen tadi tashipaki pukuima keska
tadi jawenduajaida sawea
bai tanabidani kushichakayamakidani
Edomnen mae ewapa Bosrá anua juaidan,
¿tsua jui ikimenkain?— en aka
Diosun ea kemakin:
—Jabia ea Israelin Dios en jui kaii,
matuki sinatamisbu matu maemaxuntan
en kushipawen en matu piskumashina matuki chani juidan— aka
2 Isaíasin ana yukakin:
—¿Jaskai min tadi tashipamen,
min taewen uva bimi min pema pema aka keskadan?— aka
3 Diosun kemakin:
—Chanima ean besti uva en pemashina ikaii,
tsuan ea dabewamadan.
Sinata pae paekain eki sinataibu en jatu pema pema aka
jatun jimi eki sa sa ikin en tadi cha akin jimin ea idumawashinaki.
4 Eanan, en yunuti kushipawen enabu Israel en medabewaxanai
ja xabatian en ati wani ma janu ikaya
enabu en jatu ana mebikinanxanaii.
5 En jatu uinbauna janu tsuan ea medabewatidumaken
ea e itan ana: “Tsuainda ea medabewawa”, ibiatan
en mekenen en jatu dete keyushinaki.
En sinatajaidaiwen taea en kushipawen
en jatu maemashinaki.
6 Nawa xukuabuki sinatakain jatuki di ikin
en jatu yamawashinaki,
jatun jimi maiki jatu jabamabainkinan— ikaya
Diosun Israelbu jawen duapa jatu unanmanikiaki, na janchadan
7 januxun Isaíasin yuikin:
“Ea janchaidan, Dios nuikipakidi en janchakatsis ikaii.
Dasibi jatun nuku axunmis inun,
Israelin enabu jawen duapa keyutimawen nuku duawamis inun,
nukuwen nuikin nuku bechipaimiswen taea
ja kenwain en kantakatsis ikaii.
8 Diosun yuikinan: ‘Ja enabu en bakebunan,
jawa ea danankin ea chakabuwama ixankanikiki’, itan
jatun jabu piskumaikiki,
9 bika betsa betsapa mekin teneaibudan.
Jabu jau jatu janchaxununbun Diosun yunuismadan,
jabudan, jatu piskumamaki,
ibubis Jehová Diosun jatu wakinan.
Jehová nukuwen dabanan ikin nukuwen nuikinan,
nuku mebikinanmiski,
nuku mekexun nuku ikuai keska wakinan.
Jaska nuku axunkubainmis keska wakin nuku axunkin jeneama ikunkainiki.
10 Jatu jaska wabia Israelbun Jehován Yushin sinatamakin dananibuki,
nukun mekenika medibi ichakinan.
Jaskawen taea ja danainbuki sinatakin
jau jatu detenunbun nawabuwen jatube detenamekunkainiki.
11 En jatu jaska wakubidana Israelbun jatun xenipabu Moisin jatu medabewakin
Egipto anua taxnimani jabun shinain jatumebi yuka ikin:
‘Ja Moisés jawen chaxuwan mekenika wakatsi jenewan Nilo anua nexenidan, ¿janimen, ja Diosdan?
Jatun jawen Yushin medibi kushipa Moisés inanidan, ¿janimen?
12 Jatun jawen kushipa pejaidawen Moisés mekekubainidan, ¿janimen?
Jawen taea jawen kena pepa jakimatimawakin
Ianenwan Tashipa nukunabu paxkaxunidan, ¿janimen?
13 Jatun Ianenwan nuajaidabiaken jawa jatu daxkibain tin imama pukemakin
caballo mai metu anu kushikainmis keska jatu wanidan, ¿janimen?’ ikaibun
14 jabu mekesuxun iyukubainkinan,
ina awa napanpa anu butumis keska wakin
Jehován jawen Yushin kushipawen jatu nimakubainiki.
Jaska wakin jawenabu mekesuxun jatu iyukubainkin
jawen kena pepa kushipa dasibibu unanmaniki”, iwanan,
Isaíasin Diosbe jawenabu jatu janchaxunikiaki, na janchadan
15 “Jehováan, janu min ika naiudi min mae medibi pepa anu
jadi jiwexunan, nukukidi shinanwen.
¿Jania? min nuikipa pepajaida inun min kushipadan.
¿Jania? min jawen nuku shinanmisdan.
Min nukuwen dabanan imisdan, ¿min ma nuku jatsanmen?
16 ¡Miadan, min nukun epaki!
Nukun xenipabu Abrahamnen ana nuku shinanma ma nuku jakimabiaya
nun Israelbubia jaskatan nukunabube nun ana jatuki dasi unantinantimaki.
Nun jaskabiaya Jehováan, miadan, jabia min nukun epaki.
Nuku mebikinain taenixun nuku jeneama min nuku akubainaii.
17 Jehováan, ¿jaskakin min jancha nun chibanbiaya
min kati bai min nuku benumamismen?
¿Jaskakin miki meseti shinanmama
nukun juinti min nuku kushi wamismen?
Min nuikipawen taexun min tsumabu
jawaida jatukidi shinan betsa watan jatu pewadiwe,
minabu xukuabu tibi wakin min jatu katunidan.
18 Minabu medibi min jatu katuni ja mae anu jiwea
jatixuinda jatunawai jiweama ikimabuki.
Nukuki sinataibun min Templo ichakawakin
mia pema pema akainmabuki,
19 min nukun xanen ibumaken nuku akawakin inun
min kena kushipa nun jayama nuku wakinan.