64
En shinanan, nai baxnebidan min bututiduki,min kushipawen mati matipa saki saki imabidankin inun
2 chi jedewen ni maxu menuai keska inun
unpax pichan kukatsa ikai keska wakinan.
Min jaska waya miki sinatamisbun
min kena kushipa taxniai uinkin unain
nawa xukua tibibu mia bebunua bene bene ixankanikiki.
3 Jamapai atimapa min kainmaya
bebunkidi nun jawa unankin manamaken
min butuaya mati matipa mia bebunua saki saki ixanikiki.
4 Nun miki chiti ikaibu min nuku medabewamis keska
tsua mia keska yushin betsa binua jayama
nun ninkaisma inun nun uinsmaki.
Mia besti min Dios kayabi kushipatun dasibibu binuaki.
5 Tsuada benimakin jaska min bechipaiai keska akaibu
min jawa jatu dananma ninkatan medabewamiski.
Min jaska bechipaiai keska jakimama mia axununbun
min jaska jatukidi shinankubainmiski.
Ja dukun nun mia chakabuwakin taewani badi ichapatian
ja chakabuwen taea ja shinain min nukuki sinatakunkainaii.
6 Dasibi nukubudan, nun chakabuki,
juni jamapai chakabu iduma keskabu
Dioski nun kematidubumadan.
Dasibi nun medabenanmis tibi nukun aka pepadan,
tadi chakabu nun detsis keskabuki.
Dasibi nukubunan, kanei nun ma di iki keyuabuki,
ni pei xanai nidi imis keskaidan.
Sinatakin nun yudabu chakabuwamisdan,
ja chakabunan, niwen nuku buawamiski, xadabainkinan.
7 Tsuan mia shinain mibe janchai ana tsua jayabumaki.
Jau min jatu medabewanun jawen bika tenekin
min kushipa benakin mia yukabumaki.
Nukun chakabuwen taea nuku jenei nukuki pechitan
ana nuku medabewai janchama min juneaki.
8 Nun jaskabiakenan, Jehováan, min nukun epaki.
Nukudan, nun mapu keskaki.
Jamen miadan, min mapu dami wanika keskaki.
Nuku dasibidan, jabia mian min nuku dami waniki.
9 Jehováan, ana nukuki sinata chakayamama inun
jawenchains ana nukun chakabu tibi shinanyamakubainwen.
Uinwen. ¡Nukubudan, nun minabuki!
10 Min maewan medibi tibi ana pema ma janu tsua ana jiweabumaki.
Jerusalén maedan, ma chakabuwakin di anibu maniaki.
11 Mia januxun kenwanti jiwe jawenduajaida anuxun
nukun xenipabun mia kenwanpaunibudan,
ma chiwen menukin keyunibuki.
Dasibi nun bechipaikubainidan, ma di anibu mishki besti maniaki.
12 Na jati chakabuwen taeadan, Jehováan,
¿min ana jakidi jawa wati shinanmamen?
¿Ana jakidi janchama pesxun
min ana nuku dakewakin jeneama ikunkainxanai?” aka