Yushin betsa kenwanmisbu Jehován jatu chitenikiaki, na janchadan
65
Jehován kemakin yuikin:“Jabu ebe janchakin ea jawa yukaismabia
jabu eki nukunibuki.
Jabun ea benaismabia
jabun ea bechinibuki.
Nawa xukua betsabun ea jawa ea akabumabiaken
kaintan ean jatu yuikin:
‘En nenuki. En matu ninkaii’,
en jatu aniki.
2 Ja enabu sinatapabun ea ninkabumabiaken
jawenchains ea anu jatu chintunwanun ixun
en jatu meshanxunbia
jawa ea ninkama jaska jatun bai chakabu besti tanakin
jatun shinanen besti jaska bechipaiai aki jawen kenmisbuki.
3 Ja Israel enabunan, xabakabi eabi
eki sinatakin ea danain jeneisbumaki.
Jatun bai nemakixun yushin betsabu besti kenwanun ixun
jatun inabu menuxunmisbuki.
Mai bawa chi tapu watan jakixun jatun ininti kuaxunmisbuki.
4 Ja enabunan, maxax tanpe medan
yudabu mai wamisbu anu meshu medan bua
jadi tsauxun mawabun yushin kenwankin jatu shinanmisbuki.
Ja dikabi ina yawa nami jau piyamanunbun
en jatu nemabiani jawa eki dateama pimisbuki.
Yushibu jatu nami inantan januxun jatun kentiki jawen jene juxketan
ja nami jene atimapa akubainmisbuki.
5 Na enabu pepamabia mapubaunkin jatu yuikin:
‘Eadan, en medibijaida Diosunaki.
Nedi eki kematan ea mekin metsayamakanwen’,
ibiaidan, ja junibudan, chi ketianbu badi chaitanai ji ikin
jawen kuinwen ea dechexanwanmis keskabuki”, itan.
***************
Nai inun mai Jehován ana bena wanunbadikiaki, na janchadan
17 “Man ea jaska wabiaibun en matu axunxanai ninkakanwen.
Nai inun mai en ana bena waxanaii.
Jabu dukun dasibi en jatu dami wani jakimaxankanikiki,
tsuan ana jabukidi shinanmadan.
18 Jabu dami wakin en ana bena waxanaiwen taea
benimai shinan chankankubainkanwen.
Ja Jerusalén ana bena wakin benima paketi besti
en matu waxunxanaii.
Ja mae anu yudabu jawen jiweaibudan,
ana jawa bika teneama benima besti jiwexankanikiki.
19 Jerusalén ibubis en bena washinawen taea en benimajaidaxanaii,
janu enabu shinan chankain ea jiwexunxanaibudan.
Ja mae medanuadan, ana jawa kaxai inun bibiski iki bika teneaibu
ana tsuan jatu ninkama ixanikiki.
20 Ja mae anudan, bakeishta kain bena
xaba eskadabes ana mawama ixankanikiki.
Ja inun, juni ewabu jatun jiwea chaipa keyudiama mawama idiaxankanikiki.
Ma 100 añobia jabu mawaidan,
bedunan keskas mawaxankanikiki.
Jamen tsuabuda 100 año kadiama mawaibudan,
yupuawen besti mawaxankanikiki.
21 Ja inun, betsadan, yuda betsan jiwe bena watan
ja medan jiwekunkainxanikiki.
Januxun uva bai waxun banatan
januxun jawen bimi pikubainxanikiki.
22 Ja inun, betsadan, juni betsan jamen jiwe wama jawen jiweken
yuda betsan mebianma ixanikiki.
Ja inun, tsuada betsan bai wakin banaken
juni betsan madiastun ana pianma ixanikiki.
Enabudan, jatun jiwea chaipakubainxankanikiki,
ji kushipa mawaisma keskaidan.
En jatu katunidan, jatun mekenen dayaxun pi benimaxankanikiki.
23 Ana jamenmens besti dayama ixankanikiki.
Jatun bakebu mestebudiama inun yuxabudiama
ana mawama ixankanikiki.
Jatun ibubu inun, jatun bakebu inun, jatun bababu inun,
dasibi jatunabu pakubainaibu jabiaskasdi jiwepakexankanikiki,
ean en jatu duawakubainaiwen taeadan.
24 Jabun ea kenakin ea ea adiabuma
ean dukun jatu kemakin:
‘¿Jawamen?’ en jatu wakubainxanaii.
Ebe janchakin jawadakidi ea yuka keyudiabuma
en jawaida jatu ninka keyukubainxanaii.
25 Kaman inu lobo pubenbia chaxuwan bakebe ketaxamexun
jawama pixanikiki.
Inu betsa león ana pubeanma ina awa bene keskakin basi pixanikiki.
Dunu pianantun pitidan, mai kudu besti ixanikiki.
Dasibi en mati medibi pepa anu mapuabudan,
ana jawa bika tenei chakabuama dasibi pe besti ixankanikiki”,
ikin Jehován jawen jancha yuikin mestenwaniki.