Jehová xanen ibukin dasibibu jatu unanuma jiwemakubainxanikiaki, na janchadan
(Is 2.2-4)
4
Janu badi jawen jenei ma kemayaja mati anu Jehová kenwanti Templo jayaken
Jehová jakidi janchakin mestenwanxanikiki.
Ja mati binua anuxun jakidi pe shinankin
mati tibi binua anu nawa xukua betsa betsapa bexankanikiki.
2 Sión anua Jehován yusian taxni
Jerusalén anu jawen jancha kainxanaiwen taea
yudabu midimajaida janu jikitushitan yuikin:
“Jehován Mati Sión anu mapekenun bekanwen,
Jacobun mekenika Dios Jehová kenwanti Templo anudan.
Jadixun jawen pe jiwekin shinanti nuku yusian
ja bai keska jawen yusian jancha chibankin
tapin nun maputiduki”, iki
ma ichai keyua maniabun
3 januxun nawa xukuabu tibi
Jehován jatu unanti wakubainxanikiki,
chaijaida jiwebia ja yudabu ichapajaidabu
jawawenda taea ja imisbu
jadatuda pepaimabu inun jadatuda kaneimabu
unantan jatu pewakinan.
Jatu jaska waya jatun mabu maei betsaidan,
jatun nupe kenu chaipabu betsa wakin
jawen mai xexabidanti wakin
jatun jashi betsa wakin
nupe xewetia waxankanikiki.
Ja jaskaibutianan, ja yudabu ana jatun detenameti mabu betsa betsapawen
ana tsuabubeda detenameama ixankanikiki.
Ja inun, detenamei bukatsi jatu yusinmisbu
ana tsuan jatu yusianma ixankanikiki.
4 Jaskawen taea dasibi ana jawawen dateama jiwekubainxankanikiki.
Jatun uva bana nishi manaundi bexea inun
jatun ji higuera bimi batapaya naman uta
unanuma juindukuin manixankanikiki.
Jehová kushipajaida dasibi binu keyuatun
juni betsan janchawenma jawen janchawen ibubis matu yuikiki.
5 Jaskabiaxanaya ikis yuda xukuabu betsa betsapabun
jatun mekenika yushibu ninkakin
ja chibankanikiki.
Jamen nukubunan,
nukun mekenika Dios Jehován yusinti jancha ninkakin
ja jeneama nun ja chibankubainaii.
Jatu ichakawabiaibun jawenabu medabewakin Jehován jatu mekexanikiaki, na janchadan
6-7 Chanima jawen jancha mestenwankin Jehován yuikin:
“Xaba betsatian enabu chaxuwan keska paxkabainibu
en ana jatu ichawaxanaii.
Tidi keskabu inun, jin ikai keskabu inun,
jaikaimas sa aka keska wakin
en jatu kupibiani
ena wakin en jatu ana ichawaxanaii.
Betsabu jatu iyukin inun betsabu jabu iyuama bashibainibu ichawaxun
yuda xukuabu kushipajaida en jatu waxanaii.
Jaska watan Mati Sión anuxun mekekin yunui
ea kayabis Jehová en jatu xanen ibupakexunxanaii.
8 Mia min Jerusalén maewanan,
kushipa wakin mishki kenekin
benawanibu Sión anuxun yunukin
ana kushipatan ja maewan ana benitan
enabu dasibi min xanen ibuxunxanaii,
jaska xanen ibujaida kushipabun
jatu yunupauni keskadan”, akin ea yuimaki.
9 Jehová ma yubakaimawen taea
¿jaskai man bis bis ikai, ainbu bake kain isin imis keskaidan?
¿Xanen ibujaida kushipa man jayamamen?
¿Pe yusinika jawen xanen ibujaida medabewanikabu ma mawaimabumenkain?
10 Matunabu nichianbu kainbaini
maema anu jinamas jiwekubainaibu
uxakubaini Babilonia anu matu iyuxanaibuwen taea
Sión anu jiweabuun, yuda isin uminai bis ikubainkanwen,
ainbu bake kain isin memis keskaidan.
Jakia jadixun matuki sinatakin matu iwanibu anua jabukidi sinatakin
Jehován man jawenabu matu ana mebikinankin
matu piskumaxanikiki.
11 Natian matu chakabuwanun ixun
yuda xukua betsa betsapabu
matuki sinataibu ichatan yuikin:
“Jatun mekenika yushinen jau jatu dananun
Jerusalén anu jiweabu medibima detsis keska
bechipaikin nun uin bukatsis ikaii”, ikubainaibu
12 jakia jaska Diosun shinain yubakakunkainai
ja yuda xukuabun unanbumaki.
Xekiwan tsekaxun janus buxukuaxun
tsumabaina keska wakin
jabun jawenabu ichakawaibu
Diosun jatu ichawaxanai jabun unanma
Dioskidi jancha chakabukanikiki.
13 “Yuda xukuabu ichapa teke teke akin
xemekin man jatu akawaxanunbun
ina awa bene kushipa mane hierro maxun inun
mane bronce juntsisya keska wakin
puben wankin ean en matu mesewaxanaii”, akin
Jehován matu yuiaiwen taexun
“Sión anu jiweabuun,
benitan jatuki pai pai ixankanwen.
Jatu ichakawakin jatu detetan
mane oro inun mane plata inun
mabu pepa ichawanibu
jatu anua mebinkin keyutan,
en ea mai jidabi xanen ibu
man ea medibi wakubainxanaii”, itan