Yununika chakabubu Jehován jatu dananikiaki, na janchadan
3
Israelin enabu xanen ibubu inun yununikabuun,natian ea ninkakanwen.
¿Yunuti kushipa pepadan, matunamaken
man unankatsi ikamamen?
2 Jakia jaska shinanma pepa danankin
chakabu man bechipaikubainmiski.
Enabun bichi dashpexun
jawen nami besti bikin keyuxun
jawen xau jenebaina keska
man jatu chakabuwakubainmiski.
3 Enabu jatu ichakawakin
man jatu paxa pia keska wamiski.
Betsabu jatu achixun jawen bichi dashpetan
jatun xau tseka tseka axun
kentiki bawanun, iwanan,
jawen nami mexte mexte akin
enabu jiweabu jatu piai keska wakin
man jatu ichakawakubainmisbuki.
4 Chipu xaba betsatian medabe ea Jehová man yukabiaya
en matu kemama ixanaii.
Man chakabuwakubainmiswen taea
janu man ea yukaitian en matu ninkakatsi ikama
matu anua en junexanaii.
Diosun jancha yuixunika padanananikabu Jehová jatuki sinatanikiaki, na janchadan
5 Diosun jancha yuixunika padanananikabun jatu yusin chakaibuwen taea
enabu jiwei peama bai chakabu tanabaini jamakidi bukubainkanikiki.
Tsuabunda jatu pimakubainaibu bestikidi
unanuma jiwetikidi jatu banabimakubainmisbuki.
Jakia tsuanda jatu yaniwamabumawen taexun
tsakanamei beaibukidi jatu yuikubainmisbuki.
Jehován jabukidi eska jatu yuikiki, ninkakanwen,
jabu jawen jancha yuixunikabubiakenan.
6 “Matubudan, ana meshu medan jawen unanmati man namai
man ana xabakabi uianma ixanai inun
jaskaxanai meshu medan Diosun matu unanmakin
jaska inunbadiai matu uinmamawen taea
matun kushipa man benuxanaii,
badi kai meshukainai keskaidan,
jawada man unanbiaima
ja xabatian meshu meshuwai keskaidan.
7 Diosun jancha yuixunika inun
jaskaxanai unantidubu dasibi jamenxankanikiki.
Jatun shinan benushinabun jatuki kaxeaibun
Diosun jatu kemamawen taea
dakei pes manixankanikiki,
jawa yuiamadan.
8 Jamen ea Miqueasdan, Jehován jancha danankin
Israelin enabun chakabuwakubainmisbu
jatu bedabinwankin jatu yuankin
en jatu ja akubainxanun
ea kushipa inankin datetima ea wakin
Jehován Yushinin jawen yunuti kushipa pepawen ea amakubainikiki.
Ea jaska wakin jeneama ipakeikiki.
Jerusalén chakabuwaxankanikiaki, na janchadan
9 Israelin enabu xanen ibubu inun yununikabuun,
ikis ana eska ninkakanwen.
Yunuti kushipa pepa danankin bechipaiama
jawada pepa dasibi yushtumabiaken
man yushtu wakin keyumis keskabuki,
eska tibi akinan.
10 Tsuabunda matu nemaibu detekin
jatun jimi chakawakin nukunabu ichakawakin
Mati Sión anu kebenkin
nukun mae Jerusalén anu jau benikubainunbun
man jatu yunua chakabuai dayakubainkanikiki.
11 Xanen ibu bexmas unanti wanikabun
nukun mae anuxun june pei bikatsi
jatun chakabu pewakin jatu padanmisbuki.
Diosbe nukunabu janchaxunikabun jatu yusinkinan,
pei binun ixun besti jatu yusinkubainmisbuki.
Jamen Diosun jancha yuixunikabun
Jehován jaska akaiwen benimawai dabanen
Diosun unanmashina yuikatsi pei bitan jatu yuikin:
‘Nukun xanen ibu Jehovádan, nukubeki,
nuku mekekubainaidan.
Nuku medabewamiswen taea
jawa chakabu nuku anu jutidumaki’, iwanan, jatu yuimisbuki.
12 Matubun man kanekubainaiwen taexun
Mati Sión anu maewan Jerusalén bedankin keyuaibu betsai
mishki besti janus mania bai wanixun
ana akatsi jeneyuimabu keska anu
mananan janu Dioski nukuti jiwe wanibu anu
chaka besti benea jawama dakaxanikiki.”