Kushipakin jatu ichakawaibu Jehován jatu kupixanikiaki, na janchadan
2
Namawen dikabi chakabu yubakakubainaibudan,¡peidaxankanwan!
Matun kushipawen man atidubuwen taea
ja xaba man akaitian bestentan
man jatu chakabuwakubainmisbuki.
2 Jatun yunu bai pepa ibuyabiaken jawen kemukin
biankin man jatu mebinmisbuki.
Jatun jiwe pepa anu ibu jiwebiaken kemukin
biain man yumetsumisbuki.
Baiya jatun bake jenexunbainxanaibu
ja yudabu jawenabuyabis jatu ichakawakin
man jatu nuitapawamisbuki.
3 Man jaska jatu wamisbuwen taexun Jehován matu yuikin:
“Matun besti man jatu ichakawamaki.
Eadi matuki tana en yubaka jayaki.
Matu anudi chakabu en yunuxanai jani paxama
jawen juinsinai peti man jawa binuama ixanaii.
Jakia ma dasibi chakabu bika tenemati juken
ana kein jawenduai man bai tanai mapuama ixankanaii.
4 Ja xaba jaskaitian man jatun xanen ibububia nui paewen kaxakin
matunabu sain ikin kaxakin matukidi jabuwaxankanikiki:
‘Dasibi ma nuku chakabuwakin keyuabuki.
Nukun mai pakea Jehovánabiaken
juni betsabun ma nuku ibuwainmabuki,
man jawa jatu nemamadan.
Nukun yunu bai dasibi mebintan
nukudi achitan nuku ma paxkakin keyuabuki, ibuwankinan’, iwanan,
kaxabetanan matu ja akubainxankanikiki”, jatu wanikiaki.
5 Jaskawen taea Jehován maewan matu inanbiani
ana jawenabui jawen mae anu man jabe jiweama ixankanaii.
Diosun jancha yuixunika chakabubiaken bechipainibukiaki, na janchadan
6 Padanananikabun yuikin:
“Jaska chakabu juxanai
jau nukuki ana chani beyamanunbunwen.
Ja chakabu jatun nuku dake watidu juama ixanikiki”, ikaibun
7 “Nun Jacobun enabudan,
tsuan nuku yuputidumaki.
Dios jin jin ikama
tenexun nuku manamisdan,
¿ma benuamen?
¿Jaskamismen, Diosdan?” ikaibun
jakia Jehován yuikin:
“Tsuada jiwei pekubainaibu
en janchan jatu medabewakubainmiski.
8 Uatian enabu ibiashina shinan betsa watan
natian man eki sinataii.
Jabu detenametani chintunbidankin
jatun tadi pepa kadujaida beaibu man jatu mebinmiski,
tsuan matu ana metiduma dabanen shinankinan.
9 Jatun jiwe bechipaiaibu anua ainbuaibu jatu nichinkin
jawen pepati mai en jatu ibuwamani anu
jatun bakebu ana jiwetidubuma wakin
man jatu biankin nemakubainmiski.
10 Na maedan, janu juindukunti kayabimawen taea
benitan budikanwen.
Nenu atimapajaidawen taexun
chakabuwakin yamawakin keyuxankanikiki.
11 Tsuada chanichakakin yuikin:
‘Vino inun shia paepa man ea inankubainaya
Dioskidi en matu yusinkubainxanaii’, ikaya
na yudabun jaska chakabu bechipaikin
en jancha yuixunika jatu wai
jaska jatun shinanan, pejaidaki, ixankanikiki”, itan,
Jehován jawenabu ana ichawatan jatu iwexanai jatu yubanikiaki, na janchadan
12 Jehován ana jatu yuikin:
“Ichakanikabu jatu kupi keyutan
Jacobun enabu dasibi ana jatu ichawakin
ja Israelin enabu chai jatu iyunibu
jatida ichapama texenibu en jatu ichawaxanaii.
Chaxuwan kenekauana anu mapuabu inun
basi midima anu mapuabu keska
en jatu ichawaya
yudabu midima benimai jancha chakayamaxankanikiki.
13 Dios bebukainkin jawen bai bepenbainaya jabun chibain
maewan kenebaunibu jikiti xui jawen beputi anua taxni ishchubainbainxankanikiki.
Dasibi bebun jatun xanen ibu en Jehová kaya
ea ichun buxankanikiki”, iwanan, ea yuimaki.