MIQUEAS
Samaria inun Jerusalén anu jiweabu Diosun jatu kupixanikiaki, na janchadan
1
Miqueas Moréset anua Jehová jaki nukuxun namai keskawen jawen jancha jau jatuki chanikauntanxanun Samaria anuabu inun Jerusalén anuabu Jehován jawen jancha jatu yunukubainikiaki, eska jatu waxanaikidi yuikinan, Judán enabu mai pakea anua Jotam xanen ibui inun, ja kachu Ahaz xanen ibui, inun ana ja kachu Ezequías xanen ibujaidai badi ichapa ja dabe inun bestitun jatu yunukubainaibutianan.2 Mae tibi anu jiweabu inun nukun mai pakea jidabi anu jiwebaunabuun,
na eska jancha matu yuinun ninka peidawakubainkanwen.
Jehová janu jaki nukuti Templo medibi anuxun
jaska chakabuwakin man kanekubainmis
matu chitekin matu yuikubainxanikiki.
3-4 Jawen jiwe anua kainkidani mati matipa mamaki
niakidanaya jawen tae paitan jutsekekainai anua
mati tibi payukui keyuxanikiki,
yawa xeni bin chi dapi tsauan payukumis keskaidan.
Napanpa pebia jene wakin mai tuax adabexanikiki.
Ui ichakayamai bai matai kushibidanai keskakin
jawen kushipawen jaska waxanikiki.
5 Jacobun enabun Diosun jancha chibanma danankubainaibu inun
Israelin enabu xanen ibubun chakabuwakubainaibuwen taexun
jatu jaska waxanikiki.
Jacobun enabun Diosun jancha danankubainaibudan,
¿jania ikanimenkain?
Samaria maewan anuxun akanikiki.
Judán enabun mai pakea anuxunan,
¿janixun yushibu dami kenwanmisbumen?
Jabia Jerusalén maewan anuxun amisbuki.
6 Jaskawen taexun Jehován jatu yuikin:
“Samaria maewan mishki jiwe tibi inun
jatun kene tibi di akin keyutan
napaku anu jatun mishki tibi en jatu udenmaxanaii,
ja dukun mishki buya ewapa wakin tsamabaunibu
bepenmana xabakabi uintidubu wakinan”, aka
januxun maewan xaba washinabu anu
uva nishi banatidubu bai en waxanaii.
7 Jatun yushibu mishki dami wanibu dasibi teke teke akin keyuxun
dasibi jatun yushin ji dami medibi mapua kuakin keyuxankanikiki.
Jatun kenwantidan, ainbu jininipa keskawen taexun
jawen pei ichawamisbu
dami inun jatun yushin ji dami medibi wanibuwen taexun
betsa wakin ja ainbu jininipabun daya pei keska
ana pei betsa wakin dami waxankanikiki.
Jatuwen taea Miqueas juinti nishmajaida inikiaki, na janchadan
8-9 Samaria anu yushibu dami kenwainbu beya pae
tsuan nemakin jatun chakabu jatu xuxa watidubuma
Judán enabu jadi jatun mai pakea anu Jerusalén anu
janu enabu jiweabu anudi na jabun atimapa jatu amaibu ma jikidiawen taea
juinti nishmajaida en kaxa chakayamakunkainxanaii.
Jaskawen taea nikauni bichi taeuma inun,
tadiuma nia kaman inu keskai kaxakunkauni inun,
yuinaka peiya avestruz keumis keskai en nia ketanxanaii.
10 Judán enabu Jehován kupixanai
nawan maewan Gat anu jatu banabimayamakanwen,
jau matu ninkai benimayamanunbun
jatu uinmai jatu bebunua kaxamadan.
Jakia matun mae Bet-le-afrá anu
nui paewen isin teneai keskai
mai mishpu anu dakatan
tadame tadame ixankanwen,
ibubis dake paepaidan.
11 Safir anu jiweabuun,
chaijaida matuki sinataibun matu iyuxankanikiki,
tadiuma matu dakejaida wabainkinan.
Zaanán anu jiweabu jawa kainbaini
paxama ixankanikiki.
Bet-ésel anu jiweabuun, matudan,
tsuan matu medabewama jabianu besti kaxajaidai
man jani kama ixanaii.
12 Ja Jerusalén mae anuabu jatun jikiti xui beputiya anu
Jehován jatu chakabu jikimaima keska shinain
Marot anu jiweabun medabewati pepa manajaidai
isin paepa tenejaidai keskai
xau babujaida mania uminakeakexankanikiki.
13 Laquis anu jiweabuun, matudan,
Israelin enabu Samaria anu jiwenibu keskakin
Jehován jancha danankin yushibu dami jau kenwanunbun
Sión anu jiweabu man jatu chakabuwakin taewaniwen taexun
paxanun, iwanan, caballo jawaida kainti
jawen tadanbainti ichapaki nexakin keyuxankanwen.
14 Moréset-gat anu jiweabu
man jatu ana uianma ixanaiwen taexun
jawada pepa jatu inankuintan
jatu nichinxankanwen, jatu iyuxankanikikidan.
Ja maewan Aczib janu Israelin enabu xanen ibujaidabu junei idubiaibudan,
jadixun jatu achixankanikiki,
janu bidun keskawenan.
15 Eska Jehován matu yuikiki. Ninkakanwen:
“Jau matu achinunbun
matun mae Maresá anu jiweabu
en matuki sinataiwen taea
matu anu xanen ibu kushipa betsa ana en matu yunuxanaii.
En jatu jaska waya uinbaini
Israelin enabu anua xanen ibumisbu tibibun enabu paxai
Adulam anu mai kini tanpe anu junei
jikinun ika buxankanikiki.
16 Jerusalén uke medan Sión mishki kenebaunibu kushipa anu jiweabuun,
ea ninkakanwen.
Matun bakebu man jatu bechipaijaidaiwen taea
matun juinti man nishmajaidai jatu unanmakin
matun bu maxtekei mankukanwen.
Matun bakebu achitan chaijaida anu jatu iyuxun
ana jatu chintuanbuma ixanaibuwen taea
ana matun bu maweden iki keyukanwen,
xeten buxka keskaidan”, jatu wanikiaki.