Mishkikia Moisin unpax jatu tuexunikiaki, na janchadan
20
Bukubauni año bena jawen uxe ja dukun kaiaintian janu tsua jiweabumanu jawen kena Sin anu jikixun mae Cadés anuxun jatun tadi jiwe puntebauna janu jiweyuabun janua Moisin pui María mawa jabianudi maiwanibukiaki.2 Yudabun jania unpax atima jayamaken Moisés inun Aarón ja akatsi ichatan 3 Israelin enabun Moisés yuikin:
—Jaska nukunabu Jehován jatu kupiaya nun ma jatube mawati shadashinaki. 4 Nukudan, nun Jehován enabuki. ¿Jaskakin nenu janu tsua jiweabuma anu min nuku iweimamen, nukun inabube nuku tenanun, iwananan? 5 ¿Na mae chakabujaida anu min nuku iweimamen? ¿Jaskakin Egipto anua man nuku taxnimabidanyamamen? Nenuxun nun jani mibantimaki. Ja higuera inun, uva inun, jawa bimi betsa pepa jayamaki. Ja inun, jania nun unpax akai jayamadiki— akabu
6 jawenabu jatu jenebaini Moisés inun Aarón ka janu Dioski nukuti tadi jiwe jikiti xui anu danti iki maiki beti ikabun janua Jehová jawen kushipawen chaxakidan jatuki nukutan 7-8 Moisés Jehován ana yuikin:
—Ja mestenti bitan min betsa Aarónbetan minabu ja mishki bebun jatu ichawawe. Ja ichabu bebunxun jau unpax shudu inun ja mishki ewapa janchawen yunuwe. Janua min yunua unpax tueai min uinxanaii, jau minabu inun jatun inabun janua unpax anunbunan— aka
9 jaska Jehován Moisés ma yunua Jehová jatube yubakani jancha aduni bau anua Moisin jawen mestenti bixun 10 chipu mishki ewapa bebunxun Moisés inun Aarónen jawenabu ichawaxun jatu yuikin:
—Ninkaisma juinti kushibuun, ninkakanwen, matu yuinunan. Matu unpax amanun, iwanan, ¿na mishki ewapa anu matu unpax taxnimaxunkin matu shudu imaxunpa, man ja anunbunan?— akin 11 jaska jatu yuitan mestenti sanantan dabeki mishki ewapa kusha unpax ichapa tuei shudu iki taeaya yudabu inun jatun inabubetan akaibun 12 jakia Jehován Moisés inun Aarón ana yuikin:
—Unpax jatu amakin jaska en matu yunua shinankin man akama inun jatu bebunxun man pe ea jatu kenwanmamawen taea ja mai pepa janu en jatu ibuwamaxanai anu ja yudabube kai matudi man jikiama ixanaii— akin Jehován ja dabe jatu kupinikiaki.
13 Yuanchakayamabiabu jene jatu ana inankin jawen duapa pae Jehován jatu uinmaniwen taexun ja chacha jenedan, “Meribáki”, akin kenamisbuki, nukun janchawen: “Yuanananibu chachaki”, akinan.
Edom nawabun jatun mai pakea anu Israelbu jatu kapukemama inibukiaki, na janchadan
14 Ana betsatian Edom nawabu, Jacobun betsa Esaún enabu ma pakubidanaibu anu jatun xanen ibu jau yuixuntanunbun Cadés anu jikitan Moisés jawenabu betsabu jatu yunua bui Edom nawa xanen ibujaida anu jikixun Moisés yuixunkin: “Min betsabu Israelin enabun mia yukakatsis ikanikiki. Eskaki, mia yuinun nuku ninkawe: Jaska bika tenei nun jiwekunkidanai min unanjaidaii. 15 Nukun xenipabu Egipto anu bua jadi badi ichapa jiweyunibuki. Januxun Egipto nawabun nukun xenipabu tsuma watan ichakawanixun jabiaskadi wakin nukudi ichakawakubidanpaunibuki. 16 Jaskaken jau Jehován nuku medabewanun jancha kushipawen nuitapakin nun ea akubaini janchai ninkatan jawen nai tsuma Jehován yunua Egipto anua jawen nai tsuma kushipatun nuku taxnimabidani ma natian nenu Cadés mae anu jikishinxun janua min mai pakea kesukauna anuxun nun manayuaii. 17 Min mai pakea anu kapukekainkatsi nun mia yukai ikaii. Matun mibanu inun matun uva bimi kenekauananu nun janu kamaki. Ja dikabi, matun unpax bana nun akama ixanaii. Min bai jaxpa anu besti nun tanabainkatsis ikaii, yusiudi inun yusmaudi jikikaunamadan. Min mai pakea nun kapukekin binudiama min bai jaxpa anua nun jani taxniama ixanaii. ¿Kapukekaintanpa?” akin Moisés ja xanen ibu yuixunabu
18 januxun Edom nawabu xanen ibujaidatun jatu kemakin yuikin:
—En mai pakea man kapukebaintidubumajaidaki. En jancha ninkama man buaibun matu nemai en detenamenikabuya matuki nukui en taxnikainxanaii— jatu waya
19 daewakin ja Israelin enabun ana yuikin:
—Dateyamawe. Min bai pepa jaxpa besti nun tanakubainxanaii. Nuku inun nukun inabun matun unpax bana anua nun akadan, peiwen nun mia pakaxanaii. Min mai pakea anu besti jawa meama nun binu kainkatsis ikaii. Nukuki dateyamawe— akabu
20 jaska wabiabu Edom nawabu xanen ibujaidatun ana jatu yuikin:
—Jaskamaki. Man kapuketidumajaidaki— jatu watan Israelin enabuki nukui jawen detenamenika kushipabu ichapabe taxnibidan 21 jau kapukeyamanunbun jatu nemajaidaibuwen taea datei Israelin enabu bai betsakidi bukatsi benanibukiaki.
Aarón mawanikiaki, na janchadan
22 Janua Israelin enabu dasibi mae Cadés anua taxnibaini Mati Hor bai kakidi janu jikiabun 23 Edom mai pakea kesua dapixun Moisés inun Aarón Jehován ana yuikin:
24 “Aarónan, ma mawaikiki. Unpax chacha Meribá dapixun en yunua jancha man akama ikimawen taea janu Israelin enabu ibuwamakatsi en jatu yubani anu Aarón jikitidumaki. 25 Jaskawen taexun Moisiin, mianan, min betsa Aarón inun jawen bake Eleazar Mati Hor mamaki anu jatu iyuwe. 26 Januxun Diosbe janchaxunika tadi chaipa Aarón anua pekatan Eleazar sawemaxanwen. Min jaska waya janua Aarón mawaikiki”, jatu wa
27 jaska Jehován Moisés yunua anun ika jatube kai Israelin enabu dasibibun uiainbun Mati Hor mamaki anu mapekeabu 28 januxun Moisin Aarón anua ja Diosbe jaya janchati tadi chaipa pekatan jawen bake Eleazar sawemaya mati mamaki jabianuadi Aarón mawaken Moisés inun Eleazar mati anua butubidan 29 Aarón ma mawa dasibi jatu banabimakin keyuabu ma mawawen taea Israelin enabu 30 día kaxakubainibukiaki.