Canaán nawabu dete keyutan jatun mae Hormá ibu wanibukiaki, na janchadan
21
Ja Négueb mai ewapa kesukaunanu Canaán nawa xanen ibujaida jawen mae ewapa Arad anu jiwexun Israelin enabu Atarim baiwen beaibu jaki chaniabu ninkatan jawen detenamenikabuya kainbain jatube detenamekin Israelin enabu jatu maemakin jatidi achitan jatu bichishinabun 2 januxun Israelin enabun Jehová yubakin: “Min nuku medabewaya nun jatu maemakin jatun mae tibi anua nun jatu detekin keyubauntiduki. Miauma nun atidumaki”, akabu 3 jaska yukabu ninkaxun Jehován jatu yuikin: “Peki”, ixun jatu yunuxun jau jatu maemanunbun itan jatu medabewaya Israelin enabun jatu detekin Canaán nawabu dasibi debuwakin keyuxun jatun mae tibi kuakin yamawakin keyunibukiaki. Jaska watan ja maewan kenakin: “Hormáki”, anibukiaki, nukun janchawen kenakin: “Jatu Keyunibu Maeki”, akinan.Moisin mane bronce dami wakin dunu wanikiaki, na janchadan
4 Edom nawabun mai pakea dunkebaunkatsi Mati Hor anua surkidi bui Ianenwan Tashipa dedunkebauni badi juaikidi dunkebauni jin jin ikama bebiashina bai itimaskawen taea sinatakin 5 Jehová inun Moiséski jancha chakabukin ana Moisés yuikin:
—Nenu janu tsua jiweabuma anua nun mawaxanun Egipto anua Jehovábetan min nuku iweniki. Uinwen. Piti kayabi nun jayamaki. Jawen nexuti unpax nun jayamadiki. Penaya tibi besti ja maná dudu nun bimis ja besti piti chakabu pi nun man jatsanki— akin kunyan akabu 6 jatu kupikin dunu paepajaida ichapa Jehován jatu yunua bexun jatu pikin bishakubauna Israelin enabu ichapa mawakubaunaibun 7 jatidi isin tenei Moisés anu ichaxun yuikin:
—Jehová inun mia ichai nun kanejaidashinaki. Dunu jau nichinun Jehová nuku yuixunwen— akabu Moisin jatu yukaxuna 8 ninkatan Jehován Moisés yuikin:
—Ja dunun jatun jatu piai keska jatu dami waxuntan chibu keyatapa mamaki jatu duntanxunwen. Dunu paepajaidatun tsuada jatu pikin bisha isin tenei juxun ja mane dunu uin mekei xuxaxankanikiki— aka 9 ninkaxun bronce mane tashipa dami wakin dunu keska Moisin axun chibu keyatapa mamaki anu puentan nichinkin duntanken tsuabuda dunun pikin bisha ja dunu dami dunua uiin xuxakubainibukiaki, ana mawamadan.
***************