2 Israelin enabun Amorreo nawabu detekin maemakin yamawakin jatu keyujaidashinabukidi Siporin bake Balacnen Moab nawabu xanen ibujaidatun ma jatu ninkashina datejaidaya 3 jabiaskadiai jawenabu Moab nawabu Israelin enabu midimajaidabuki datejaidadiaibun 4 Madián nawabu jatu dapi jiwebaunabun jatun xanen ibubube Moab nawabu jatu jancha wakin yuikin:

—Ja yuda midimajaidabun nukun mae tibi nuku mebin keyui bekanikiki, ina awan basi pikin keyumis keska wakinan— jatu akabu

jabiatiandi Moab anu Balac xanen ibukin 5-6 jawen jancha buxunikabu betsabu katuxun xanen ibujaida Balacnen jatu yuikin:

—Jaska Beorin bake Balaam man ea yuixuntanun eska matu yuinun ea ninkakanwen: “Nukun xanen ibujaida Balacnen jancha mia yuinun nuku ninkawe. Egipto anua nawa betsabu beimaxun en mai jidabi achikin ea bebun jatun tadi jiwe midima ma puntebaunshinabuki. Mikidi en ninkamis: ‘Min xun ika kushipayakiaki. Tsuabuda duawakin min jancha pe yuia pemisbukiaki. Ja inun, tsuabuda xun akin min jatu yupuaya mia dabanmisbukiaki.’ Jawaidakidan ea jatu yupukin xun axundiyuwe. Min jatu jaska waya jatu detekin en mae anua en jatu nichinxanimenkain. En mia kenai ea medabewai juwe”— jatu akin jenewan Éufrates dapi Amav nawabu mae betsa Petor anu Beorin bake Balaam anu Balacnen jatu yunua 7 Moab nawabu xanen ibu bexmasbu inun Madián nawabu xanen ibu bexmasbudi jawen jatu yupuxunai jawen pakati peiya bui mae Petor anu jikixun jatun xanen ibujaida Balacnen jancha dasibi Balaam yuiabu 8 Balaamnen jatu yuikin:

—Peki. Na jabia meshu medan en uinyuai jabianu iyukanwen, Jehován jaskadada ea yunua ninkatan en matu yuixanaidan— akin jatu yuia niti itan ja Moab xanen ibu bexmasbu jawen jiwetan uxaibun

9 meshu medan Balaamki Dios nukutan yukakin:

—¿Ja junibu min jiwe anu beabudan, tsuabumen?— aka

10 Balaamnen Dios kemakin yuikin:

—Siporin bake Balac Moab nawabu xanen ibun jatu yunua ea jawen jancha yui bea ikanikiki. 11 “Egipto anua nawa betsabu taxnibidanimaxun mae tibi ibuwaibun jawaida juxun ea jatu yupuxuniyuwe. Min ea jatu jaska waxunaya jatube detenamekin en mai pakea anua en jatu nichinxanimenkain”, akin ea yuikanxuki— aka

12 jaska Balaamnen yuia Diosun ninkatan yuikin:

—Jaskamaki. Jatube kayamaxanwen. Ja dikabi ja nawabu jatu yupuyamawe. Ja nawa betsabudan, enabuki. Ean en jatu duawakubainaii— aka ishin

13 janua penamajaida Balaam bestenkauan butukain Balacnen ja xanen ibubu yunushina jatu yuikin:

—En matube kanun Jehován ea jaska yunuamaki. Matun mai pakea anu chintundibaintankanwen— jatu wa

14 Moab nawabu xanen ibu bexmasbu chintunbaini Balac anu buxun yuikin:

—Balaam nukube jukatsi ikama nuku besti nichian nun juxuki— akabu

15 januxun jawen shinan betsa wakatsi ikama jabu dukun jatu yunushina kushipa bexmasbuwen taexun natian xanen ibu betsabudi ichapa kushipajaidabu Balacnen ana jatu katuxun bikakin Balaam anu jabudi yunua 16 chaijaida bukubaini Balaamki nukuxun yuikin:

—Nukun xanen ibujaida Siporin bake Balacnen jancha mia yuinun nuku ninkawe. Eanu min juyunun en mia ea akin bikajaidawaii. Ana juama ikama juwe. 17 Min juaya mia duawakin min en xanen ibu keska en mia kenjaidawaxanaii. Ja dikabi jawada min ea yukai dasibi en mia axunxanaiwen taexun juxun ja nawa betsabu ea jatu yupuxuniyuwe— akin jatun xanen ibujaida Balac yuixunabu 18 Balaamnen jatu kemakin yuikin:

—Eskaki, ea ninkakanwen. Dasibi oro inun plata mane pepajaida jawen jiwe mata jaya matun xanen ibu Balacnen ea inanbia en mekenika Dios Jehován ea yunuama en jawa waxuntidumaki, en Jehová Diosun yunua binukinan. 19 Jabiaskabiaken na meshu medan bashikua jabianu uxayukanwen. Natian jaskada Jehován ea yuimenkain, en ana matu ninkaxunyuaidan— jatu wa

20 ja meshu medan Dios Balaamki ana nukuxun yuikin:

—Minwen taea ja junibu bekanxudan, benitan jatube katanxanwen. Jakia jadixun en mia yunuai besti akubaintanwen— abaini kaken

21-22 penamajaida bututan jawen asno kabekantan jaki tsaukainti nexa akeaketan jaki katsaumekainkin jawen dayadu tsuma dabedi jatu iyui Moab nawabu xanen ibubube Balaam kaiwen taea Jehová jaki sinatakin jawen nai tsuma kushipa yunua bai namaki nixun kebenkin jadakidi katimawaken 23 asno kakin bechitan nai tsuman jawen machatu kenu dabeya chaipa sanan mesea niken asno bestitun uin jaki datei jamaudi texki baimaudi jikikainaya ja nai tsuma uianma jau baiwen ana chintunkainun jiwen Balaamnen jawen asno tekush tekush aka 24 janua Jehován nai tsuma bebukain janu uva bimi bai dabe mishki kenekauana yusiudi inun yusmaudi ja namakis bai jashu anu kebean ana niken 25 jawen asno bestitun ana uin dainbaini mishki keneki texke ikainkin Balaamnen tae texke abainkin isinwan jaki sinatakin ana jawen asno tekush tekush aka 26 jakia ana bebukain Jehován nai tsuma kushipa kai yusiudi inun yusmaudi jani dainbaintima bai jashujaida anu ana jadakidi katima wakin kebean niken 27 ana uin datei jawen asno di ikin Balaam tin aka benitan jaki sinatakin jawen asno jiwen makush makush akaya 28 Jehován jawen asno junin janchawen janchamaya asnon Balaam yuikin:

—¿En mia jaska wa min ea ma dabe inun bestiki kusha kusha aki ikai?— aka 29 Balaamnen kemakin yuikin:

—Min ea ichakawakin iyu pewama en mia aki ikaii. En meken anu nupe tsumaxunan, en ma mia tenanxu ikeanaii, ikisdan— aka 30 jakia jawen asna ana janchakin yuikin:

—Eadan, en min asnaki. Min bedunan eki katsaumetiani en mia nimakubainmiski. Jaska en mia waxudan, uatian mia nimaxun en mia jaska waisma min unanjaidaii— aka Balaamnen kemakin yuikin:

—Chanimaki. Min ea jaska waismaki— akaya

31 januxun Jehován Balaam bedu betsa watan uinmaya jawen machatu kenu dabeya chaipa sanan bai namaki Jehován nai tsuma kushipa nia Balaamnendi uin datejaidai danti iki main beti iken 32 jawen nai tsuman yuikin:

—¿Jaskakin dabe inun bestiki min asno min kusha kusha axumen? Ja min nawabube kaya jaska bechipaiama mia nemanun ixun en mia axuki. 33 Min asnon ea uin dabe inun bestiki ea dain texkikunkidanxuki. Jakia eki kemaya en mia besti detekeanxuki, jau min asno besti jiwenunan— aka 34 Balaamnen kemakin yuikin:

—Ea nemanun ika bai min kebean nibiaken jawa unanma en kanejaidaxuki. Ja nawabube en kaya min jaska bechipaiamakenan, jaskakenan, ma en jiwe anu en chintundikainaii— aka 35 jakia Jehován nai tsuma kushipatun ana kemakin yuikin:

—Ja nawabube jatube kayutanwen. Jadixunan, jaska en mia yuiai besti yuikubainxanwen— abaini kaken

Balacnen jatu yunushina xanen ibu bexmas shadabube Balaam jatube juaya 36 jawen mai pakea anu Balaam jui kemai Balacnen ninkatan jaki nukutanun ika jui paxku jawen kena Arnón anu jawen mai pakea kesua chaima Moab nawabun mae betsa anu Balaamki nukutan 37 Balacnen yuikin:

—Jau mia itanunbun en jatu yunujaidashinaki. ¿Jaskai uatian en mia kenakin bikawabia min juama ishianmen? En mia duajaidawatiduma min shinain ishiandaka. En mia atiduki. Dateyamawe— aka 38 Balaamnen kemakin yuikin:

—Mia uinun ika en juxudan, ma en nenuki. Eska besti en mia yuitiduki. En shinanen eiskauan emebi en kushipawen en yuismaki. Jakia jaska Diosun besti ea yunua en atiduki— aka 39 januxun Balacnen Balaam iyui mae betsa jawen kena Quiriat-husot anu jikiabu 40 januxun ina awa inun chaxuwan jau tesenunbun jawen dayadu Balacnen yunua detexunabu Balaam inun jawenabu xanen ibubu bexmasbu jabe beabu jatu pimabu 41 penamajaida Balacnen Balaam benabauni jaki nukutan mati pishta jawen kena Bamot-baal mapekemabain iyuxun uinmakin Israelin enabun jatun tadi jiwe puntebaunimabu xabakabi dasibi uinmakin keyua