Números 23

jaska uintan Balaamnen Balac yuikin:

—Mishki chi tapu wakin 7 nenu ea waxunwen. Jaska waxun 7 ina awa bake inun 7 chaxuwan tesenxun ea pewaxundiawe, nun menukin keyununan— aka 2 jaska Balaamnen Balac yunua akin keyuxuna chi tapu bestibu tibiki ina awa bake inun chaxuwan bestichai ja dabetun kuakin menu keyukin 3 januxun Balaamnen Balac ana yuikin:

—Na jabia yuinaka menuai dapixun ea manayuwe. Jehová jui eki nukuxun jadakidi ea jancha waimenkain, en uinyui kaidan. Jawada ea unanma ninkabidan en miki chaniyuaii— aka

Israelin enabu Balaamnen jancha pe besti jatukidi yuinikiaki, na janchadan

mawa tenanma jawa jayama anu Balaam ka 4 janu Dios jaki nukutan Balaamnen yuikin:

—7 mishki chi tapu en mia pewaxunxuki. Ja bestibu tibiki ina awa bake inun chaxuwan bestichai en mia menukin keyuxunxuki, mia kenwankinan— aka 5 jau jaska jatu yuitanun jawen jancha Jehován Balaam unanmatan yuikin:

—Balac anu chintunkain na jabias jancha en mia yuixu ea yuixuntanwen— aka 6 jaska wa ninkatan chintunkidani chi tapu dapi Moab nawabu xanen ibu dasibibube Balac niaki nukutan 7 jau jaska ixanun Balaam jatukidi yuikin:

“ ‘En mae mati matipa badi juaikidia Aram anuxun jau jununwen’, iwanan,

Balacnen ea jatu iwemashinaki.

Moab nawabu xanen ibujaidatun ea kenashinxun ea yuikin:

‘Israelin enabu ea jatu yupuxunwen.

Jacobun enabu en jatu bechipaiama chakabuwaxunkin ea jatu yupuxunwen’, ea waxuki.

8 Jakia jabu Jehován jatu yupuama tsuan jatu yuputidumaki.

Jabu Diosun jatu chakabuwama tsuan jatu chakabuwatidumaki.

9 Na mishki mati keyatapa anuxun xabakabi en jatu uin keyutiduki,

na mati matipa anuxunan.

Yudabu medibi jiweabu ja yuda betsabu keskamaki.

Na mati matipa anuxun en jatu uiaiin.

10 ¿Ja yudabu mai mishpu keska tsuan tanatidumen?

¿Jatibudan, tsuan unantidumen?

Pepabu unanuma mawamisbu keska eadi en mawakatsis ikaii.

Jabu debumisbu keska eadi en debukatsis ikaii, jawa dateamadan”—

akin jadi Jehován yuixu Balaam jatu yuia 11 ja ikin Balacnen yuikin:

—¿Min jawai? Min ea jatu yupuxunyunun en mia kenakin iweshinaki. Jakia eki sinataibu min jatu pepa waxuki— aka 12 Balaamnen kemakin yuikin:

—Jaska ea yuimai besti en mia yuitidu Jehován ea yunua nun atiduki— aka 13 Balacnen Balaam bika wakin yuikin:

—Ua mati betsa anu ebe kawe. Jadixun jatun tadi jiwe puntebaunabu uin keyuama jatidi besti uinkin dateama jadixun min ea jatu yupuxuntidumenkain— atan 14 Mati Pisgá mamaki Sofimin mae anu Balaam iyuxun 7 mishki chi tapu jatu wamatan Dios daewakatsi ikin chi tapu bestibu tibi anuxun ina awa bake inun chaxuwan bestichai teseanbu Balacnen chiwen menua menui keyuaya 15 januxun Balaamnen Balac yuikin:

—Nenu chi tapu dapixun ea manayuwe, Dioski nukui en benanta kayuaidan— abaini ka 16 Dios jaki nukuxun jau yuinun jawen jancha Jehován Balaam unanmatan januxun yuikin:

—Janu Balac anu chintunkain na jabias jancha en mia yuixu ana yuiditanwen— aka

17 jaska wa ninkatan chintunkidani chi tapu dapi Moab nawabu xanen ibu dasibibube Balac niaki nukutushia Balacnen Balaam yukakin:

—¿Jawa Jehován mia yuixumen?— aka 18 ja nawabu jaskaxanaibu Balaamnen Balac janchaxunkin:

“Siporin bake Balacneen, pesxun ea ninkawe.

19 Yudabu jiwebia mawamisbu keskama Dios chanichakaismaki.

Ja inun, jawen shinan betsa waismaki.

Jawada yuixun amiski.

Jawada yubakaxun akin keyumiski.

20 Jakia en jatukidi pe yuikubainun ea yunuxuki.

Diosun jatukidi pe yuiaya jancha betsawen en nematidumaki.

21 Jacobun enabu anua tsua padan jancha jayamaki.

Israelin enabu anuxun chakabuaibu tsuan uinsbumaki.

Jehová jatun mekenika Dios jatube ikunkainmiski.

Jatun mae anuxun Jehová kenwankin: ‘Nukun Xanen Ibujaidaki’, akin

ja yudabun kenwanmisbuki.

22 Egipto anua Jehován jatu iwenixun awa bene búfalo maxun chaipaya kushipa mesejaida keska jatu wamiski.

23 Israelin enabuun, natian en matukidi pepa shinankin yuiaidan,

Diosun matuwen taexun jawen dami kushipa matu axunkin uinmai

yuda betsabu matu uin e ikanikiki.

Jacobun enabu tsuan jatu yupukantidumaki.

Israelin enabu tsuan jatu mukayatun dauntidumadiki.

24 Inu betsa leónen jawen piti yuinaka achixun debu waxun

jawen nami pikin jawen jimi akin keyudiama

yaushi tekeden tekeden imis keska ja yudabu puben mesebudiki”,

ikaya

25 xanen ibu Balacnen Balaam ana yuikin:

—Min ea jatu yupuxunamabia ana jatukidi pe janchayamawe— aka 26 Balaamnen kemakin yuikin:

—Jaska Jehován ea yunua ja besti en atiduki. Jabiaska bebunkidi en mia yuia min ninkaxuki— aka 27 jaska Balaamnen yuibia xanen ibu Balacnen ana yuikin:

—Mae betsa anu en mia iyuai unudi kaxun jadixun Israelin enabu min ea jatu yupuxunai min mekenika Diosun mia nemamamenkain, miki sinatamadan— akin 28 Balaam iyukin Mati Peor mapekema januxun janu tsua jiweabuma dasibi uinbaunti anu mapuxun 29 Balaamnen ana Balac yunukin:

—7 mishki chi tapu ea waxunwen. 7 ina awa bake inun chaxuwan tesenxun ea jatu pewamaxunwen— aka 30 jaska ma yunua akin keyutan chi tapu bestibu tibi anuxun ina awa bake inun chaxuwan bestichai tibi Balacnen chiwen menukin keyuxuna