24
Israelin enabu Jehován pepawa bestikatsis ikai unantan ana jabe janchakin jawen jancha ninkai Balaam ana Diosbe janchai kama jakia janu tsua jiweabuma anu ana uinbaunkin 2 Israelin juni bakebun enabu xukuabu tibi medibi jiwebaunabu uianyan Diosun Yushin Pepatun jawen janchati kushipa Balaam inankin unanmaiwen taea 3 jau jaska ikubainxanunbun Balaamnen Balac jancha wakin:“Beorin bake Balaam eska en janchaii.
Jaska junibun uinsbuma ma en uianki.
4 Nishi pae atan uian keska xabakabi en uinxuki.
Dios kushipajaida dasibi binuatun ea jancha inan nama keskawen en ma uianki.
5 Eska en jatukidi janchai ea ninkawe.
Jacobun enabuun, matun tadi jiwedan, jawenduajaidaki.
Israelin enabuun, matun maedan, jawendua pepajaidaki.
6 Matudan, jene kaya kexa xenpan tacha chaipaya bana man mapubaina keskabuki.
Matudan, Jehován man dau bana keskabuki.
Matudan, paxku kexa man kusha bana keskabuki.
7 Unpax ati inun jawen miban tacha ati jene ichapa netsunakama Israelin enabu jayaxankanikiki.
Amalec nawa xanen ibujaida Agag kushipajaidabiaken Israelin enabu xanen ibujaidakin jatu maemaxanikiki.
Israelin enabu xanen ibujaida kushipakunkainxanikiki, mai ewapa achi keyuidan.
8 Egipto anua Jehován jatu iwenidan, jawen kushipawen jatu nimadan, awa bene búfalo maxun chaipaya kushipa mesejaida keskabuki.
Israelbuki yuda betsa betsapa jatuki sinataibu
jatu yamawakin keyuxankanikiki,
pia kuinwen jatu tsakakinan, jatu xau tekekin keyukinan.
9 Israelin enabu juindukuin maniabun inu betsa león juindukuin daka keskaken datekin tsuan bestenwankatsi ikamaki.
Tsuabunda matu pepawaibu Jehován jatudi pepawaxanikiki.
Tsuabunda matu yupuaibu Jehován jatu kupikin yupudiaxanikiki”, ikaya
Jaskakubainxanaibukidi Balaamnen yuinikiaki, na janchadan
10 jaska ninkatan Balac Balaamki sinatajaidai meken nata chakan chakan akin yuikin:
—Min ea jatu yupuxuniyunun en mia kenashinxun iweaki. Jakia en jatuki sinatabiaya en jancha danankin min jatu duawakin pepawaxuki, dabe inun bestikidan. 11 Jaskakenan, min mae anu chintundikaintanwen. Mia kenwankin duajaidawanun, iwanan, en mibe yubakashina Jehován mia ea jawa amaxunama ixuki— aka
12 Balaamnen kemakin yuikin:
—Eska unankin minabu min jatu yunua ka bebunkidi en jatu yuimaki, eskakididan: 13 “Jaska man jakidi ea yuibiaibunan, jawen jiwe ewapa jawendua anua jawen oro inun plata mane adua ja dasibi min xanen ibu Balacnen ea inankuinbia jaska Jehován ea yunua jakidi shinanma ibubis en shinanen jawada pepa inun jawada chakabu en atidumaki. Jawada Jehován yunukin ea yuia ja besti en axuntiduki”, akin en jatu yuimaki. 14 Jaskakenan, en maekidi en ma kaii. Jakia en kadiama ja yudabu minabube jaskakubainxanaibu mia yuinun ea ninkawe— iwanan, 15 jaskaxanaibu Balaamnen jatu yuikin:
“Eadan, en Beorin bake Balaamki.
Jaska junibun uinsbuma ma en uianki.
16 Nishi pae atan uian keska xabakabi en uinxuki.
Dios kushipajaida dasibi binuatun ea jancha inan nama keskawen en ma uianki.
17 Jawada jaska taxnixanai ma en uinxuki.
Unu idiamajaida jaskakunkainxanai bebunkidi en unaiin.
Jacobun enabu anua juni kushipajaida taxnixanikiki, bishi bena chaxa chaxa ikai keskadan.
Israelin enabu anu xanen ibujaida benikaunxanikiki.
Jatun buxka buchusha keska wakin Moab nawabu yamawaxanikiki.
Setin enabu pabiakubainaibu jabudi buchushkin yamawadiaxanikiki.
18 Edom enabu Seír anuabu jatuki sinataibu jatun mae mebinxankanikiki.
Seír mebintan Israelin enabu puben kushipakin yuda betsa betsapa jatuki sinataibu binuxankanikiki.
19 Jacobun enabu betsa taxnitan kushipakunkainkin mae ichapa mebinanankin ja nawabu texe tibi jatu keyukin yamawaxankanikiki.”
20 Amalec nawabun maekidi uinkin jaska ixanaibu jatukidi Balaam juiwen nawakin:
“Amalecin enabun xukubauna kushipajaida jatu binukin keyubiabun
Israelin enabun jawaida jatu dasibi yamawakin keyuxankanikiki, betsa texe jeneamadan
21-22 Ja dikabi Quenita nawabun maekidi uinkin jaska ixanaibu Balaamnen jatukidi yuidiakin:
Caínen enabuun, matun mae anu paxati jiwe kushipa teketidumabiaken
mishki keyatapa anu matun iduti na betsa betsapa anu man idubiaken
Asiria nawabun matu achitan iyukin
chi jedewen matun iduti na tibi yamawakin keyuxankanikiki”, atan
23 januxun jaska ixanaibu Balaamnen ana jatukididi yuidiakin:
“¡Peidawa! Diosun jatu jaska wamayadan, tsua ana janu jiwexanimenkain.
24 Natukan ewapa Chipre kexa anua xaxu ewapa ichapawen puben detenamenika kushipabu bekin
Asiria nawabun mae tibi inun Éber nawabun mae tibi jatu detekin keyubidanxankanikiki, yamawakinan”, ikin
25 yui menetan Balaam jawen maekidi chintunkainaya Balacdi jawenabube jawen mae anu chintundiabainibukiaki.
***************