—Ja Mati Abarim anu mapekewe, ja maiwan Israelin enabu jatu inankatsi en jatu yubani jene kexa betsaudi en mia uinmaidan. 13 Min ma uinbaunkin keyua jabiatiandi min mawaxanaii, min betsa Aarón ini keskai min xenipabuki nukuidan. 14 Janu tsua jiweabuma jawen kena Sin anuxun unpax manujaidakin yudabu ja ikin unpax matu yukaibun xabakabi en matu yunubia ea kenwankin pewama en jancha chibanma matun shinan bestiwen shinankin unpax jatu tuexunkin jatu bebunxun man aniwen taea miadi min jadi jikitidumadiki— akinan, janu tsua jiweabumanu Sin mae Cadés anuxun ja Chacha Meribá tueimanuxun yuinikiaki. 15 Januxun Moisin Jehová yuikin:

16-17 —Jehová Diosuun, yudabu dasibi jiwea min jatu inanmisdan, minabu xanen ibu wakin juni betsa katuwe, jatun bebukainkin jau jatu yunununan, chaxuwan xukua mekenikauma jadidi kai unanbuma keska jau iyamakubainunbunan— aka

18 Jehován kemakin Moisés yuikin:

—Uinwen. Nunen bake Josué jawen unanepa yushin jayaki. Danti atan ea katuxunkin jawen buxkaki min meken mamepixanwen. 19 Januxun mamepitan Israelin enabu dasibibun uiainbun ebe jatu janchaxunika Eleazar bebun nichinxun min xantukun Josué xanen ibu waxanwen. 20 Israelin enabu dasibibun jau jawen jancha ninkakubainxanunbun min jawen kushipakin yunumis inandiaxanwen. 21 Min ana jiweamaken jawada ea yukakatsi iki ebe jatu janchaxunika Eleazar anu Josué kaxun jawadakidi Eleazarki chania januxun en kenawen taexun Eleazar jawen unanti wati Urimwen ea yukatan Josué unanma januxun ja unanti chibankin Israelin enabu jamapai tibi jatu axunkubainxanikiki— aka

22 Moisés butukidan jaska Jehován yunua keska dasibi axunkin Israelin enabu dasibibu jatu ichawa uiainbun ja dikabi Diosbe jatu janchaxunika Eleazar bebun Josué nichintan 23 jaska Jehován Moisés yunua akin Josuén buxkaki jawen meken mamepixun jawen kushipajaida inankin Israelin enabu xanen ibujaida wakin Moisin Josué jatu katuxunikiaki.