—Egipto anua nun mawai pe ikeanimaki. Jamen janu tsua jiweabuma anua mawa nun pediakeanaii. 3 ¿Jaskakin Jehován nenu nuku iweimamen? Ja nawabube nuku detenamemakin dateyabi nuku tenanun, iwananan, nukun ainbuaibu inun nukun bakebube nukuki sinatakin jau nuku tenananunbunan, ja kushipabukenan. Nukun jiwea benukatsi ikama Egipto anu nun ana chintuanan, peki— ikin 4 yuinameakeakekin yuikin:

—Juni betsa nukun xanen ibu katunankanwen, jau Egipto anu jatun nuku ana chintunmanunan— ikaibun

5 Moisés inun Aarónen jatu ninkatan dasibibu bebun danti iki beti ikabun 6 jaskaibun jabudi datejaidakin Nunen bake Josué inun Jefonen bake Caleb ja dabetun ja mai pakea betsa uintanshinabu jatuwen datei juinti nishmakin jatun tadi ushnitan 7 Israelin enabu dasibi jatu yuikin:

—Ja mai pakea nun june uinkubauntanshinadan, janu jiweti mai pepajaidaki. 8 Nukuwen benimakin ja maewan piti jamen ikai anu Jehován nuku iyuxun nuku medabewaya nun jikixanaii, nuku inan janu ibuwaidan. 9 Jakia Jehová nukun mekenika Dios dananyamakanwen. Ja dikabi, ja mai pakea anu jiweabuwen dateyamadiakanwen. Jehován nuku medabewakin jatun mekenika yushibu nemaya misi pia keska wakin nun jawaida jatu maemaxanaii. Nukudan, Jehováki nun chiti ikaki. Jakia jabudan, tsuan jatu mekeamaki. Jatuwen jawa dateyamakanwen— jatu abiabu 10 ninkama dasibitun mishkiwen tsaka tsaka akin jatu tenanpananbun janu jaki nukuti tadi jiwe anuxun Jehován jawen kushipa chaxa chaxa ikijaidaiwen jatu nemakin ana jatu uinmakin 11 Jehován Moisés besti ana yuikin:

—Ea danankubainkin jenekatsi ikabumaki. Jawen unanmati dami ichapa en jatu uinmabiakubidana ea ikunwankatsi ikabumadiki. 12 Jaskaken chami mesewen kupikin jatu yama watan mia inun min bakebu enabu waxun jatu pajaida wakin yudabu kushipa en mia jatu waxunxanaii, na Israelin enabun kushipa binumakinan— aka 13 Moisin Jehová nemakatsi ikin kemakin ana yuikin:

—Jaska Egipto anua min kushipawen na enabu min jatu iweima Egipto nawabun jaskakidi unanjaidakanikiki. 14 Jaska min ea dama yuixu min jatu akaya Egipto nawabun ninkatan Canaán mai pakea jidabi anu jiwebaunabundi ninkadiaxankanikiki. Jabianudi eska mikidi ma mia ninkaimabuki. Jehová na yudabu jatube kakin jatu beismakin min jatu kupiama ikimaki. Nai kuin medan min jatu bebun kai inun janua meshu medan nai kuin dami chi jede medan min jatu bebundi jukin iwekubidanaii. 15 Na enabu min jawaida jatu dete keyuaya yudabu xuku tibitun min kushipakidi unanbiakin eska yuikubaintidubuki: 16 “Janu Jehován jatu yubabiani anu jatu jikimatidumawen taexun janu tsua jiweabuma anuxun jatu debuwakin keyukin yamawashinaki”, akin mikidi yuikubaintidubuki. 17-18 Jaskakenan, Jehováan, min jaska jatu yubaima akin min kushipa jatu uinmakin iyukin jatu niti akama jeneyamawe. Yudabu chakabubu kupikin min jeneismabia jakia jatun ibubun chakabuwen taexun jawen bakebu inun, jawen bababu inun, jatun bababun bakebudi inun, jabun bababun bababudi min jatu kupimisbia ikis jawaida sinatama nuikipa benimanikajaidakin mia ninkaisbumabiaken jatun chakabu tede akin ana shinanma min jatu jakimawatiduki. 19 Jaskawen taexun min nui pae ewapa jatu uinmakin jatun chakabu jatu buaxunwen, ana shinanmadan. Egipto anua jin jin ikama jatu iwekubidankin na mae anuxun min jatu mekekubainaii— aka

20 Jehován Moisés kemakin yuikin:

—Peki. Jaska min ea yukaidan, jatun chakabu buakin ikis en jatu tenankin keyuamaki. 21 Jakia en jiwea inun en kushipa mae jidabi anuxun uinmisbuwen taea jaska en mia yuiai chanima kayabiki. 22 Egipto inun janu tsua jiweabuma anuxun en kushipa inun jawen unanmati dami betsa betsapa en ma jatu uinmabiakubidana uinbiakin jawenchains ea unanti wanun ixun en yunuti jancha chibankatsi ikama ikubidankanikiki. 23 Mae pepa jatun xenipabu en jatu yubani jabun ea ninkakatsi ikama ikubidanaibun tsuan uianmajaida ixankanikiki. Ea dananmisbutundi janu jikikin uintaskabuma idiaxankanikiki. 24 Jatun shinan keskama en tsuma Caleb bestitun shinankin chanimajaida en jancha ninkakin ea axunkubainmiski. Jaskawen taexun janu jatubetan uinbauntanimanu Caleb jau jikinun en nemama jikixanikiki. Janua jawenabu pai jiwekubainxankanikiki. 25 Jaskawen taea ana jadidi man buaibukidi napanpa ewapanu Amalec nawabu inun Canaán nawabu jiwebaunabuwen taea ana jadi buama meshukidi ana jawendi jatu chintuanbainkin Ianenwan Tashipakidi janu tsua jiweabumanu jatu ana iyutanwen— akin

26 Jehován Moisés inun Aarón ana jancha wakin:

27 —¿Jatian ea ninkaxanaibu tenexun jatu manakubainpa, ea yuain eki ja ikaibu en ninkaxuwen taea ja Israelin enabu chakabu yuananain janchawainbudan? 28 Ekidi eska ea jatu yuixunwen: “Eadan, Jehová ibubis en jiweawen taexun jaska ekidi man yuibaunaibu ninkatan jabiaskadi en matu akubainxanaii. 29 Dasibi junibus 20 badiya unudi jiwebainaibu unaki tanakin netanmisbu dasibi eki jancha chakabukubaini jabu mawaxankanikiki. Jatun yuda janu tsua jiweabuma anu jatu putakubainxankanikiki. 30 20 badi binubainabu man tsua jikiama ixanaii. Jakia Jefonen bake Caleb inun Nunen bake Josué janu en yubani anu jabu besti jikitan jiwexankanikiki. 31 Jakia: ‘Nukuki sinatakin nukun bakebu inun nukun bababu achitan dayadu watidubuki’, ikin ma yuishinabuwen taexun matun juni bake maxkubu inun matun bababu jatu iyukin janu man dananshinabu anu en jatu jikimaxanaii, jau jawenduai jiwexanunbunan. 32 Janu tsua jiweabuma anu mawa matun yuda putakin man jatu jenekubainaya 33 40 año inabu mekekubauni matun bakebu jiwekubaunxankanikiki. Jaska dayakin en jancha man ikunwainsbumawen taexun 40 año matun chakabu kupiti matun bakebun matu tenexunkubainxankanikiki, man debui keyuayadan. 34 40 día Canaán mai pakea man uiantanbaunimaki. Jaskawen taea 40 año matun chakabu pakai man yumanxanaii, día tibi man uinbaunima keska wakin año bestichai en matu kupia man uinxanaii, man eki sinataiwen taexunan”, akin ea jatu yuixunkanwen. 35 Chanima ea Jehová en jancha kayabiaii. Na yudabu chakabu eki dasibia sinataibudan, en jatu jaska waxanaii. Nenu janu tsua jiweabuma anu jatun jiwea benuxankanikiki, mawakinan.

36-37 Canaán anu buxun jau uinbauntanunbun junibu Moisin jatu yunuima chintunbidan: “Ja mai chakabujaidaki”, akin jatunabu jatu banabimabu Israelin enabun ninkatan jatunabu Jehová yuanmakin jatu ja imashinabuwen taexun ja 10 juni Jehován jatu jawaida debuwakin keyunikiaki. 38 Janua Canaán anu kaxun jatubetan uinbaunima Josué inun Caleb besti mawama inibukiaki.

39 Jaska Jehován ma yuixu Moisin jatu yuia ninkai Israelin enabu dasibi punu nukai keyuabun 40 uxashini penama bestentan kainbaini bui mati matipa mapekebaini bua yuinamekin:

—Ma nenu nun jubia chanima nun kanejaidashinaki. Jabiaskabia janu Jehován nukun xenipabu yubani anu budinankanwen, janu ibuwaidan— iake iakeaibun 41 jatu nemakin Moisin yuikin:

—¿Jaskai man patapamen, Jehován yunua besti ninkamadan? Jaska man shinainkididan, man kanejaidaxanaii. 42 Matunmebi bebunkidi bebuyamakanwen. Jamen man jaskakainayadan Jehován matu medabewaidan, ana matubemaki. Jakia ninkamas man kayadan, matu maemaxankanikiki, jabu nukuki sinataibunan. 43 Jabu dukuntun matu manakakanikiki, Amalec nawabu inun Canaán nawabunan, matube detenamekin matu tenanun ikadan. Jehová medabewanika man jeneshina ana matubemaki— jatu aka

44 ja yuda xuku betsabun Moisin jancha ninkama mati matipanu jabun dukun ibuwanun ika mapekeaibun jakia Jehová jatube yubakani jancha aduni bau buama inun Moisés jatube kamaken 45 janua Amalec nawabu inun Canaán nawabu ja mae anu jiwebaunabu janus ma ichatan butubidankin jatu detekin taewakin maemakin jatu chibankubidankin Hormá anuxun jatu maemakin yamawakin keyutan jatun mae tibi anu chintunbainibukiaki.